ကျေပ်၊ သေပ်တေမ်ဗာ (၉)
မၞိဟ်ကူသာန်သွံလဝ်မၞိဟ် (၁၇) တၠ မတံၚ်ဂြဲလဝ် ညးသၟတ်ကျူဗာတံ သွက်ဂွံကေတ်တာလျိုၚ် ပ္ဍဲကဵုဒပ်ပၞာန်ရုယှာ အပ္ဍဲပဋိပက္ခယူကရုၚ်ဂှ် ရပ်ဂွံလဝ်ရောၚ် သၟိၚ်တၠအဝဵုကျူဗာတံ ဟီုရ။
ကျူဗာဝွံ လ္တူတိဍာ်ညးတံသၟးဟွံက ဇာဇၞိက်မကၠောန်ဒၟံၚ် ပ္ဍဲဍုၚ်ရုယှာတေံလေဝ် ညံၚ်ဂွံလီုအာ ဒဒှ်ရကၠောန်ဗ္တိုက်သ္အးဒၟံၚ်ဂှ် ပ္ဍဲသတ္တာဟဏံပြဟ်ဟ်တေံ သၟိၚ်တၠအဝဵုတံ ထ္မံက်ပ္တိတ်ဟီုဂးလဝ်ရ။
“နဒဒှ်သွဟ် ပရေၚ်ဂၠိုက်ဂၠါဲစၟဳတ်တံဂှ်မ္ဂး ဒဵုကဵုအခိၚ်လၟုဟ် ရပ်ဒက်လဝ် မၞိဟ်ကလိလောန်လဝ်ဒုဟ် (၁၇) တၠဂှ်တုဲ ပရေၚ်ချဳဒရာၚ်ဏံဂှ် မၞိဟ်စဳဇန်အပ္ဍဲဌာနတံလေဝ် ပါဒၟံၚ်ရောၚ်” သာ်ဝွံ ဗိုလ်ဇၞော် ရိုဝ်ဒရဳဂေါသ် နူကဵုဌာနဝန်ဇၞော်အပ္ဍဲဍုၚ်ကျူဗာ ဟီုဂးလဝ် ပ္ဍဲကဵုအစဳဇန်တဳဗွဳမွဲ ပ္ဍဲကဵုဂိတုသေပ်တေမ်ဗာ (၇) တေံရ။
ရိုဝ်ဒရဳဂေါသ်ဝွံ ယၟုယၟာမၞိဟ်မပါလုပ်ဆက်စပ် အပ္ဍဲဂကောံဂှ်ဂှ် ဟွံမံက်ထ္ၜးလဝ်ရ။ ဆ္ဂး က္ဍိုပ်သ္ကိုပ်ဂကောံဂှ်ဝွံ သွက်ဂွံလိၚ်ဗ္တိုက် ပ္ဍဲယူကရုၚ် စၞးရုယှာဂှ် သွက်ဂွံကော်ကေတ် ကောန်ဍုၚ်ကျူဗာတံဂှ် ဒးသ္ပပဓာန်ဒၟံၚ် လ္တူညးမသ္ပဒတဴဒၟံၚ် ပ္ဍဲတ္ကအ်ၜါတၠဂှ်ရောၚ်ဂှ် သ္ဂးလဝ်ရ။
မၞိဟ်မပါလုပ်ဆက်စပ် အပ္ဍဲပရေၚ်ဒဒှ်ဏံဂှ် တန်တဴကဵုလ္တူဂကူအဇာ အမှုရာဇဝတ်သ္ကာတ်မြဟ် မပ္တံကဵုကူသာန်သွံမၞိဟ်၊ လိၚ်ဗ္တိုက် နဒဒှ်ရဲစၚုဟ်ကီု၊ မၞုံပၟိက်ကဵုသၞ လ္တူဍုၚ်သ္အာၚ်တံ ဒှ်တမ်တုဲ ဒဏ်ထံၚ် ၃၀ သၞာံ၊ မွဲအာယုက် ဟွံသေၚ်မ္ဂး စဵုကဵုဒဏ်ဂစိုတ် ဒးမာန်ရောၚ်ဂှ် ညးရေၚ်တၠုၚ်ဂဗုတ်အလဵုအသဳ ဂျဵု(သ်) ဟီုလဝ်ရ။
ဍုၚ်ရုယှာ လ္ဂောံကဵုပရေၚ်ဍုၚ်ကွာန်တုဲ ပရေၚ်ဆက်ဆောံ ခိုၚ်ၚ်ကၠိုက်က် ကုဍုၚ်ကျူဗာ မအုပ်ဓုပ်ဒၟံၚ်သၞောတ်ကောန်မျူနေတ် နွံဂှ်ဝွံ ဒှ်ဒၟံၚ်ဒၞါဲပၟိက်ဇၞော်မွဲ သွက်ညးသ္ပဒတဴဆုဲပြံၚ်ကျူဗာတံ မပ္တိတ်ဒၟံၚ်ဇြဟတ် သွက်ဂွံဗၠးၜးနူ အကာဲအရာပရေၚ်ပိုန်ဒြပ်အပ္ဍဲဍုၚ် ဟွံတောတက်ဒၟံၚ်တံ အခိၚ်ကာလဗွဲမဂၠိၚ်သ္ၚောဲရ။
သမ္မတရုယှာ ဗလာဒဳမာပူတေန်ဂှ်ဝွံ ကောန်ဍုၚ်သ္အာၚ်တံ သွက်ဂွံယိုက်ဂၠေၚ်တာလျိုၚ် ပ္ဍဲဒပ်ပၞာန်ရုယှာဂှ် ပ္ဍဲသၞာံတုဲကၠုၚ်တေံ မြက်က်ဇက်က် ထ္ပက်လဝ်စၟတ်တဲ အမိၚ်ကဵုအခေါၚ်ဂွံဒုၚ်ယၟုကောန်ဍုၚ်ရ။
နကဵုကျူဗာ ဒဒှ်ရဟီုဂးလဝ် ပါလုပ် ပ္ဍဲကဵုပေါဲပၞာန်ယူကရုၚ်တံ ဟွံမွဲပုဟ်ကီုလေဝ် ပွမရပ်စပ်စကာ ကောန်ဍုၚ်ညးတံ နဒဒှ်ကောန်ပၞာန်စလိၚ်ဂှ်လေဝ် ဒဒှ်ရတးပါဲဂှ် ဟီုဂးလဝ်ရ။
Ref: Reuters
sanlontai