ပလဝ်၊ သေပ်တေမ်ဗာ (၁၀)
ရးဒေသဇၞော်တၞၚ်သြဳ၊ ပွိုၚ်ဍုၚ်ပလဝ်၊ နူဒပ်ပၞာန်ဍာ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန်လက္ကူတုဲ ညးဒေသ ဒးချိုတ်လဝ် (၁)တၠ ဒးလဝ်ဘဲဝပ် (၄)တၠရဂှ် ဂွံတီကေတ် နူဒပ်စဵုဒၞာဒေသတအ်ရ။
ဂိတုသေပ်တေမ်ဗာ စၟတ်တ္ၚဲ (၉)အခိၚ်နူဂယး ၜိုတ် (၁၀)နာဍဳဂှ် နူက္ၜၚ်ဒပ်ပၞာန်ဍာ်ကံၚ်ဇြဳပၞာန် ဒေါံဒၟံၚ်ပ္ဍဲပါၚ်ၜဳပလဝ်ဂှ် ပေါဲဗတိုက်ဟၟဲမွဲသာ် ပန်ဖျေံလဝ်လွဟ်ဇၞော် ပ္ဍဲကွာန်လက္ကူ၊ မျဒေါၚ် ကေုာံ ကွာန်ပျေန်ဖျူရ။
မကမ်လွဟ်ဇၞော်ကံၚ်ဇြဳပၞာန် ပန်ဖျေံနၚ်တအ်ဂှ် ဒတုံစှ်ေပါ်ခတိုဟ်လဝ် ပ္ဍဲကွာန်လေက္ကူကဵု မ္ၚးကွာန်တုဲ ပါ်ခတိုဟ်လဝ်ရ။
ဟိုတ်နူလွဟ်ဇၞော်တုဲ ကောန်ဒေသဂှ်ကိုဝ်မျေတ်ဖျိုဝ်ဝေ အယုက် ၂၅ သၞာံ ဒးချိုတ်လဝ် ပ္ဍဲဒၞာဲဒှ်ပရေၚ်ပရောဂှ်တုဲ ပါလုပ်သီုကောန်ၚာ်အယုက် (၄)သၞာံ ၁တၠ ဒးလဝ်ဘဲဝပ် (၄)တၠရ။
ဟိုတ်နူလ္ပာ်ဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော်ကြာန်ကြာန်တုဲ ညးဒေသတအ်ဂှ် ဒးဖေက်ဂၟံက်ဒၟံၚ်တုဲ ပလေဝ်ပလေတ်လဝ် သွက်ဂွံဂြိပ်ဒဴပါဲဓလေတ်ရဂှ် ဂွံတီကေတ် အတိုၚ်လဟီုညးဒေသတအ်ရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၇)တုဲကၠုၚ်တေံဂှ် ပ္ဍဲဗလးၜဳ ဗ္ဒာဲတ္ကအ်မျေန်အောက် မ္ၚးကွာန်ကျောက္ကာ၊ ပွိုၚ်ဍုၚ်ပလဝ်ဂှ် အကြာဒပ်ကံၚ်ဇြဳပၞာန်ကဵု ဒပ်စဵုဒၞာဒေသတအ် ပေါဲဗတိုက် ဒှ်လဝ်ဏီရ။
ပ္ဍဲဂိတုအဝ်ဂါတ်တုဲကၠုၚ်တေံလေဝ် ဟိုတ်နူလ္ပာ်ကံၚ်ဇြဳပၞာန် ပန်ဖျေံလွဟ်ဇၞော် ပ္ဍဲကွာန်လေက္ကူတုဲ ဒဝ်တာန်ကျဳ အယုက် ၇၆ သၞာံ ဒးလွဟ်မကမ်တုဲ ဒးချိုတ်လဝ်ဏီရ။
ပရိုၚ်- သြၚ်လောန်တိုၚ်(မ်)
ဗီုရုပ် -CJ
sanlontai