ပွပ္ကီုပရာပ်ဂကောံပၞာန် လ္တူပရေၚ်ပညာ ဂၠိုၚ်တိုန်ကၠုၚ်ဒၟံၚ် ဂကောံအခေါၚ်အရာမၞိဟ်ကရေၚ် ဟီု

ညံၚ်လေဝ်ပေန်၊ သေပ်တေမ်ဗာ (၁၀)

ပ္ဍဲဒေသသ္ကုတ်ဒိုဟ်အဂၞဲ ကၟိန်ဍုၚ်ဗၟာဂှ် ပွပ္ကီုပရာပ်ဂကောံပၞာန် လ္တူပရေၚ်ပညာဂှ်တအ်ဂှ် မွဲသၞာံကဵုမွဲသၞာံဂၠိုၚ်တိုန်ကၠုၚ်ဒၟံၚ် ဂွံညာတ်ကေတ်ဒၟံၚ်ရဂရဂှ် ဂကောံအခေါၚ်အရာမၞိဟ်ကရေၚ် KHRG လလောၚ်တြး ဟီုပ္တိတ်လဝ်ရ။

ပ္ဍဲလ္တူ “တ္ၚဲစဵုဒၞာ နူပွပ္ကီုပရာပ်ပရေၚ်ပညာဂၠးကဝ်” ကၠုၚ်စိုပ် ပ္ဍဲဂိတုသေပ်တေမ်ဗာ စၟတ်တ္ၚဲ (၉)ဂှ် ဂကောံအခေါၚ်အရာမၞိဟ်ကရေၚ် KHRG ပ္တိတ်လဝ်တၚ်လလောၚ်တြးတုဲ နဒဒှ်ဗျူဟာပၞာန်မွဲ ပ္တဝ်လဝ်ကဵုဘာဗ္တောန်လိက် ကမၠောန်ပြဝ လ္ပာ်ကံၚ်ဇြဳပၞာန်ဗတိုက်ဒၟံၚ်တအ်ဂှ် ပျုတ်ဗ္ဒေက်အာ သ္ကာတ်တ်မြဟ်ဟ်ရဂှ် ဓမံက်ထ္ၜးလဝ်ရ။

နူသၞာံ ၂၀၂၁ သီကေတ်အဝဵုတုဲဂှ် အတိုၚ်တၚ်ဂၞၚ် KHRG ပကောံပကေဝ်လဝ်ဂှ်မ္ဂး ပွပ္ကီုပရာပ်ဗတိုက်လဝ် လ္တူဘာဗ္တောန်လိက် နွံဒၟံၚ် ၂၄ ဝါ လ္ပာ်လ္တူတုဲ စမြိုၚ်ဘာဗ္တောန်လိက် ၃၇ မ ဒးလီုလာ်လဝ်ပေၚ်ၚ်တုဲ ပရေၚ်ဇီုကပိုက်လီုလာ် ပ္တိုန်လဝ်စၟတ်သမ္တီဟွံမာန် သ္အာၚ်နူဏံလေဝ် နွံဒၟံၚ်ရဂှ် KHRG ဟီုသ္ဂးလဝ်ရ။

သ္အာၚ်နူဂှ်ပၠန် ပွပ္ကီုပရာပ်ကံၚ်ဇြဳပၞာန် လ္တူပရေၚ်ပညာဂှ် မွဲသၞာံကဵုမွဲသၞာံ ဂၠိုၚ်တိုန်ကၠုၚ်ဒၟံၚ်ဂှ် ဂွံညာတ်ကေတ်တုဲ စဵုကဵုဂိတုသေပ်တေမ်ဗာ သၞာံ ၂၀၂၃ ဏံ ပွပ္ကီုပရာပ်လ္တူဘာဗ္တောန်လိက် က္တဵုဒှ်လဝ် ပ္ဍဲသ္ကုတ်ဒိုဟ်အဂၞဲကၟိန်ဍုၚ်ဗၟာတအ်ဂှ် လ္တူနူသၞာံ ၂၀၂၁ ကဵု ၂၀၂၂ သီုၜါသၞာံ ပွပ္ကီုပရာပ်တအ် သာဂၠိုၚ်တိုန်ကၠုၚ်ဒၟံၚ်ရဂှ် ဓမံက်လဝ် ပ္ဍဲတၚ်လလောၚ်တြးရ။

ဟိုတ်နူပွကံၚ်ဇြဳပၞာန် ပန်ပှော်ဗတိုက်လဝ် လ္တူဘာဗ္တောန်လိက် နကဵုလွဟ်ဇၞော်က္ၜၚ်ကျာဂှ် ပါလုပ်သီုကွးဘာတြုံဗြဴ ကောန်ၚာ်သၟတ် (၄၈)တၠ ဒးချိုတ်လဝ်တုဲ ဇီုကပိုက်ဒးလဝ်ဘဲဝပ် (၁၀၀)ပြၚ်ရဂှ် ညးတာလျိုၚ် ဆဝ်ပ္ၚုဟ်စန္ဒက် KHRG သဝ်နန္ဒသူ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲပွဗတိုက်ပ္ကီုပရာပ်တအ်ဂှ် ၜိုန်ရကောန်ၚာ်သၟတ်တအ် ဒးချိုတ်ကၠေံလဝ် နွံဒၟံၚ်ကီုလေဝ် ဟိုတ်နူပွကံၚ်ဇြဳပၞာန် ဗတိုက်ဒၟံၚ် လ္တူပရေၚ်ပညာ ပ္ဍဲလ္တူပရေၚ်ဇီုကပိုက် ကေုာံပရေၚ်ဆောံလေၚ်တအ်ဂှ် သ္ပဂရု ဟွံသေၚ်မ္ဂး ပရေၚ်ကေတ်လျိုၚ် ညိဟၟဲကီု ဟိုတ်နူဆက်ဗတိုက်ပ္ကီုပရာပ်ဒၟံၚ် လ္တူပရေၚ်ပညာဂှ်ရ ပ္ဍဲအကြာကွးဘာ၊ အာစာ ကေုာံ မိဘကွးဘာတအ်ဂှ် က္တဵုဗဒှ်ကဵုဓဝ်ဗဟေက် ဖေက်ဂၟံက်ဒၟံၚ် ဇြိုဟ်ဟ်နက်က်ရဂှ် KHRG ဟီုသ္ဂးလတ်ရ။

ညံၚ်ကံၚ်ဇြဳပၞာန် ဂွံထပ်ကၠောန် ပွဗတိုက်ပန်ပှ်ော လ္တူကောန်အရာပ်တအ်ဟွံဂွံမာန်ဂှ် ညးတာလျိုၚ်ကၟိန်ဍုၚ်နာနာ ကေုာံညးတာလျိုၚ်ပ္ဍဲဒေသတအ် သွက်ဂွံထပ်ကၠောန် ကဵုအာဇြဟတ်ဓရိုဟ်ဂှ် သာနွံဒၟံၚ်ပၟိက်တုဲ ပရေၚ်စောဲဂဗုတ်လ္တူကံၚ်ဇြဳပၞာန် ကၠောန်ဗဒှ်လဝ် ပ္ဍဲကၟိန်ဍုၚ်ဂျာမနဳဂှ် ဒုၚ်ဒၟံၚ်တၠုၚ်တုဲ သွက်ဂွံထပ်ကၠောန်ကဵု ပရေၚ်ကၟာတ်လဒဵုစဵုဒၞာပရေၚ်ပိုန်ဒြပ် ကဵုအာဇြဟတ်ဓရိုဟ်ဂှ် KHRG ဗတိုက်ဖ္အောဝ်လဝ်ရ။

သွက်ဂွံကဵုအခေါၚ် ပရေၚ်ဂကောံဒုၚ်သ္ဇိုၚ်ညးဍုၚ်ကွာန် နူကဵုကၟိန်ဍုၚ်ဇိုၚ်ဝုတ်ဒိုဟ် ကေုာံဂကောံညးအရာပ် တတ်ကၠောံပယျဵုတုဲ ကဵုအရီုဗၚ်တအ်ကီု၊ ကုလသမဂ္ဂကီု သီုကၟိန်ဍုၚ်နွံအခေါၚ်စဳရေၚ်သၞောဝ်ဓဝ်ဂၠးကဝ်တအ်ဂှ် သွက်ပွကံၚ်ဇြဳပၞာန် ကလိလောန်လဝ်ဒုဟ်ဒဏ်ရာဇဝတ် လ္တူကောန်ဂကူမၞိဟ် ကေုာံဖံက်ပ္ကဝ်လဝ် အခေါၚ်အရာမၞိဟ်တအ် ညံၚ်ပရေၚ်ကေတ်လျိုၚ် ပရေၚ်ဒုၚ်လျိုၚ်ဂွံနွံကၠုၚ် သွက်ဂွံကၠောန်သ္ပကဵုဂှ်လေဝ် ဒဒှ်ရ KHRG ကဵုလဝ်ကသပ်ဂှ် ဂွံတီကေတ် အတိုၚ်တၚ်လလောၚ်တြးရ။

ပရိုၚ် – သြၚ်လောန်တိုၚ်(မ်)

ဗီုရုပ် – KHRG