ကျာ်ထဝ်၊ သေပ်တေမ်ဗာ(၁၀)
တွဵုရးဍုၚ်မန်၊ ဍုၚ်ကျာ်ထဝ်၊ ပ္ဍဲအရာပ်တောၚ်ဒူသုဂှ် ဂကောံသ္ၚိကၟိန် ဥူအောၚ်လွေန် ဒေါံဇူလဝ် နူဒပ်ပၞာန် နကဵုကဆံၚ် ဒုသ္ကိုပ်ဗိုလ်ဇၞော် ဒးဒုၚ်ပန်ပှော်လဝ်တုဲ ညးမဒှ်သမ္ဘာ ဒးချိုတ်လဝ်တုဲ ပါလုပ်သီုကောန်ဗၠာဲညး ဒးလဝ်ဘဲဝပ် (၂) တၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုသေပ်တေမ်ဗာ တုဲကၠုၚ် စၟတ်တ္ၚဲ (၈) အခိၚ်ဗ္တံၜိုတ် (၅) နာဍဳဂှ် ဥူအောၚ်လွေန်ဥူ ဒေါံဇူလဝ် နူဒပ်ပၞာန် အယုက် ၄၈ သၞာံ အခိၚ်က္လေၚ်စဴကၠုၚ်သ္ၚိ နကဵုကွဳစက်ဂှ် သၟာရပ်လွဟ်ဟွံတီယၟုတအ် ပန်ပှော်လဝ်ကဵုလွဟ်သေနာတ် ဂတမုကသ္ၚိညးတအ်ရ။
ပ္ဍဲပရေၚ်ပန်ပှော်ဏံ ဒဝ်စန္ဒာသိုဝ် ညးမဒှ်သမ္ဘာ ပါဗက်ကၠုၚ် ပ္ဍဲကွဳစက်ဂှ် ပ္ဍဲဒၞာဲဒှ်ပေရၚ်ပရောဂှ်ဟေၚ် ဒးချိုတ်လဝ်တုဲ ညးမဒှ်ကောန်ဗၠာဲညး ကေုာ ဥူအောၚ်လွေန်တအ် ညး (၂)တၠဂှ် ဂွံလဝ်ဘဲဝပ်ညးသ္ကအ်ရ။
ပ္ဍဲပရေၚ်ဒဒှ်ပန်ပှော်ဏံ မောၚ်အောၚ်ညုၚ် ညးမဒှ်ကောန်ဗၠာဲ အယုက် (၇)သၞာံ ဒးလဝ်ဘဲဝပ်မကမ် ဖံက်လုပ်ဂွံပ္ဍဲမတ်ပုၚ်ဂှ် ဟိုတ်နူအကာဲအရာဒးဒှ်ဓဝိၚ်တုဲ ပလံၚ်ဗစိုပ်ဏာလဝ် ရုၚ်ဂဥုဲလဂုၚ်လွဳလွတ်ဒၟံၚ်ရဂှ် ဂွံတီကေတ်ရ။
ဥူအောၚ်လွေန် ညးမဒှ်ကောန်ဂကောံ YMBA ပွိုၚ်ဍုၚ်မွဲတၠဂှ် ပံက်လဝ်ဆေၚ်ထဝ် ပ္ဍဲဍုၚ်ကျာ်ထဝ် နကဵုယၟုသိုဝ်ယျတနာတုဲ ပံၚ်ကဵုကံၚ်ဇြဳပၞာန်တုဲ ကၠောန်စဒၟံၚ် ပရေၚ်ပိုန်ဒြပ်ရဂှ် ညးဒေသတအ်ဟီုသ္ဂးလဝ်ရ။
ဂကောံလဵု ပန်ပှော်လဝ် ဂကောံသ္ၚိကၟိန်သၞာဲဒဴဒေါံဇူဒပ်ပၞာန်ရောဂှ် စဵုကဵုအခိၚ်လၟုဟ်ဏံ လလောၚ်တြးကၠုၚ်လဝ် ဟွံဂွံညာတ်ကေတ်ဏီရ။
ညးတာလျိုၚ် ဂကောံပကဖပွိုၚ်ဍုၚ်ကျာ်ထဝ်မွဲတၠဂှ်မ္ဂး ပရေၚ်ပန်ပှော်ဏံဂှ် ဒဒှ်ရဂကောံညးတအ် ပန်ပှော်လဝ်ဟွံသေၚ်ကီု ဟိုတ်နူကောန်အရာပ် ညးဟွံဆေၚ်ဆက်တအ် ဇီုကပိုက်ဒးလဝ်ချိုတ်လဝ်ဂှ် ဒဒှ်ရစိုတ်ဟွံမိပ်ရဂှ် ဟီုသ္ဂးလဝ်ရ။
ပ္ဍဲဂိတုအဝ်ဂါတ် စၟတ်တ္ၚဲ (၂၇) တုဲကၠုၚ်တေံလေဝ် အကြာကွာန်ကအ်ထေန်ကဵုကွာန်ဘိုဝ်ယျာဂျဳ၊ ပွိုၚ်ဍုၚ်ကျာ်ထဝ်ဂှ် ဗိုလ်ဒပ်ပၞာန်မၚ်ပယျဵု BGF သီုကဵုသမ္ဘာညး ဟိုတ်နူဒးဒုၚ်ပန်လဝ်တုဲ ဒးချိုတ်လဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – ချာန်နေဝ်တြးဝါဒကံၚ်ဇြဳပၞာန်
sanlontai