ပ္ဍဲဘာပန် ဟိုတ်နူဒးဒုၚ်ဂြာတ်ထောံဖျေံဗုမ် ကဵုက္ၜၚ်ကျာတုဲ ပါလုပ်သီုကွးဘာတအ် ဒးချိုတ်လဝ် (၄)တၠ၊ ဒးလဝ်ဝပ် (၆) တၠ

ဘာပန်၊ သေပ်တေမ်ဗာ(၁၀)

ခရိုၚ်ဘာပန် ဗော်သွးကောန်ဂကူကရေၚ် KNU၊ ပွိုၚ်ဍုၚ်ဒွေယ်လိုဝ်၊ ဂကောံကွာန်နာကိုဝ်ခဳ၊ ပ္ဍဲကွာန်ထဳဂဝ်ထာဂှ် ဟိုတ်နူဒပ်ကံၚ်ဇြဳပၞာန် ဂြာတ်ထောံဖျေံဗုမ်ကဵုက္ၜၚ်ကျာတုဲ ပါလုပ်သီုကွးဘာတြုံဗြဴတအ် ဒးချိုတ်လဝ် (၄)တၠတုဲ ဒးလဝ်ဘဲဝပ် (၆)တၠရဂှ် ဇာနှိက်အထံက်အရီုဓဝ်ၜိုဟ်လလံကရေၚ် KPSN လလောၚ်တြးလဝ်ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၆)ဂှ် ဒပ်ပၞာန်ဗၠးၜးကောန်ဂကူကရေၚ် KNLA၊ ဒပ်ပၞာန်တၟေၚ် (Special Force) ကေုာံ ဒပ်ပံၚ်ကောံတအ် ဗတိုက်သီကေတ်လဝ် ဗဒိုပ်ခေပူကံၚ်ဇြဳပၞာန် မၞုံပွိုၚ်ဍုၚ်လူတဝ် တိဍာ်ဒပ်မဟာ (၅) ခရိုၚ်ဘာပန် KNU ရ။

ဒးဒုၚ်သီကေတ်လဝ်ဗဒိုပ်တုဲ ပ္ဍဲဂိတုသေပ်တေမ်ဗာ စၟတ်တ္ၚဲ (၇)အခိၚ်နူဂယးဂှ် ဒပ်ကံၚ်ဇြဳပၞာန် ကၠုၚ်ဂြာတ်ထောံဖျေံဗုမ် ပ္ဍဲကွာန်ထဳဂဝ်ထာ မၞုံဂကောံကွာန်နာကိုဝ်ခဳ ပွိုၚ်ဍုၚ်ဒွေယ်လိုဝ်၊ ခရိုၚ်ဘာပန် KNU ကဵုက္ၜၚ်ကျာရ။

ဟိုတ်နူဒးဒုၚ်ဗတိုက်ဂြာတ်ထောံဖျေံဗုမ်ကဵုက္ၜၚ်ကျာဂှ်တုဲ အ္စာဘာ (၁)တၠ ကေုာံကွးဘာ (၃)တၠ ဒးချိုတ်လဝ်တုဲ အ္စာဗြဴ (၁) တၠ ကေုာံကွးဘာတြုံဗြဴ (၅)တၠ ဇီုကပိုက်ဒးလဝ်ဘဲဝပ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြး KPSN ရ။

သ္အာၚ်နူဂှ်ပၠန် ပ္ဍဲဂိတုသေပ်တေမ်ဗာ စၟတ်တ္ၚဲ (၈)အခိၚ်ဒေါဝ်တ္ၚဲ (၁၂)နာဍဳဂှ်လေဝ် ကံၚ်ဇြဳပၞာန် ကၠုၚ်ဂြာတ်ထောံဖျေံလဝ်ဗုမ် ပ္ဍဲကဵုကွာန်ခလေဝ်ထာ ဒေသတာခေဝ်ဒေဝ် ကေုာံ ဒေသဂေဝ်ယူ ခရိုၚ်ဘာပန် KNU ဂှ် နကဵုက္ၜၚ်ကျာ စဵုကဵုဗၞတ် (၄) ဝါတုဲ ပရိုၚ်ကောန်အရာပ် ညးဍုၚ်ကွာန်တအ်ဒးချိုတ်လဝ် သ္ပဒ္တန်ဟွံမာန်ဏီရဂှ် KNU ဒပ်မဟာ (၅) လလောၚ်တြးလဝ် ပရိုၚ်ရ။

သ္အာၚ်နူဂှ်ပၠန် ဗဒိုပ်ခေပူဂှ် ဟိုတ်နူပန်ဖျေံဒၟံၚ်လွဟ်ဇၞော်ဍောတ် ပ္ဍဲကွာန်တအ်ကီု၊ ရပ်စပ်စၟဳစၟတ်ဒၟံၚ် ကောန်ကွာန်ကီု သုၚ်စောဲနဲကဲစုၚ်တုဲ သီုဖံက်ပ္ကဝ်ဒၟံၚ်အခေါၚ်အရာမၞိဟ် လ္တူညးဒေသတအ် အဆက်ဟွံပိုတ်သ္ကိုတ်ဂှ်ရ ဒးဗတိုက်သီကေတ်လဝ်ဗဒိုပ်ရဂှ် KNU ဟီုလဝ်ရ။

ပ္ဍဲပေါဲဗတိုက်သီဗဒိုပ်ဂှ် လ္ပာ်ကံၚ်ဇြဳပၞာန်ဒးချိုတ်လဝ်ဗွဲမဂၠိုၚ်တုဲ သီဂွံလဝ်လွဟ်ဇၞော်၊ လွဟ်ဍောတ် ကေုာံမကမ်တအ်တုဲ လ္ပာ်ဒပ်ပံၚ်ကောံ ဒပ်ပၞာန်ဗၠးကောန်ဂကူကရေၚ် KNLA ဂှ် ညးဒးလဝ်ဘဲဝပ်လ္ၚဵု နွံဒၟံၚ်ရဂှ် ဒပ်မဟာ (၅) KNU လလောၚ်တြးလဝ် ပရိုၚ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – CJ