ဗဒိုပ်ဒဵုသုက်ဖူကံၚ်ဇြဳပၞာန် ဒးဒုၚ်က္ဍိုက်ဗတိုက်လဝ်

တံၚ်ဥူ – သေပ်တေမ်ဗာ (၁၂)

ရးဒေသဗဂေါ၊ ပ္ဍဲပွိုၚ်ဍုၚ်တံၚ်ဥူ ဗဒိုပ်ဒဵုသုက်ဖူ ဒပ်ကံၚ်ဇြဳပၞာန် ဖျေံလဝ်ဗဒိုပ်ဒ္တန်ဂှ် ဟိုတ်နူဒပ်စဵုဒၞာညးဍုၚ်ကွာန်တအ် ဗတိုက်လဝ်တုဲ ဒးချိုတ်လဝ် (၁၅)တၠရဂှ် PDF ဗဂေါ လလောၚ်ပ္တိတ်လဝ် ပရိုၚ်ရ။

ပ္ဍဲဂိတုသေပ်တေမ်ဗာတုဲကၠုၚ် စၟတ်တ္ၚဲ (၉)တေံ အခိၚ်နူဂယးပြဟ်ဂှ် ဗဒိုပ်ဒဵုသုက်ဖူ ဒပ်ကံၚ်ဇြဳပၞာန် ဖျေံလဝ်ဗဒိုပ် ဇြဟတ်(၂၀) ပ္ဍဲဂၠံၚ်ပရဟ် (၁၆၂)မိုၚ် ဍုၚ်တံၚ်ဥူဂှ် ဂကောံပံၚ်တောဲ ဒပ်စဵုဒၞာညးဍုၚ်ကွာန်-PDF တအ် ဗတိုက်လဝ်ရ။

ပေါဲဗတိုက်ဂှ် ဒှ်လဝ် လအ်ဗ္ဒာဲ ပွိုၚ်(၃၀)မိနေတ်တုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၁၅)တၠရဂှ် PDF ဗဂေါဟီုလဝ်တုဲ ဃောစၟဳစၟတ်ဒၟံၚ်ကဆံၚ်ဌာနန္တရ ညးဒးချိုတ်လဝ်ရဂှ် ဓမံက်လဝ် ပ္ဍဲတၚ်လလောၚ်တြးဂှ်ရ။

ပ္ဍဲပေါဲဗတိုက်ဂှ် လ္ပာ်ဂကောံ ဒပ်စဵုညးဍုၚ်ကွာန်ပံၚ်ကောံတအ်ဂှ် ဇီုကပိုက်ဒးလဝ်ဘဲဝပ် ဟွံဒးဒှ်ဓဝိၚ်(၂)တၠရဂှ် ဂွံတီကေတ်ရ။

ဗဒိုပ်ဖျေံသ္ဇိုၚ်ကံၚ်ဇြဳပၞာန်ဂှ် တံဒပ်ခရိုၚ်တံၚ်ဥူ – ၃၅၀၁၊ ဇြဟတ်ပ္တိတ်နုက် နူရေၚ်ဒဵုပလိုတ် (၁၆)တၠ ကေုာံဂကောံစဵုဒၞာကွာန်တအ် ပံၚ်တောဲဗတိုက်လဝ်ရဂှ် ဂွံတီကေတ်ရ။

လ္ပာ်ဒပ်စဵုဒၞာညးဍုၚ်ကွာန်တအ်ဂှ် သွက်ဂွံသီကေတ်ဗဒိုပ် ၜိုန်ရစဳဇန်လဝ်ကီုလေဝ် ဟိုတ်နူမကမ်ဟွံရုမ်ဂပ်တုဲ ဒးက္လေၚ်ဆုတ်တိတ်လဝ်ရဂှ်လေဝ် ဓမံက်ထ္ၜးလဝ်ရ။

စပ်ကဵုဗဒိုပ်ဖျေံသ္ဇိုၚ်ကံၚ်ဇြဳပၞာန် ဒးဒုၚ်ဗတိုက်လဝ်တုဲ အကာဲအရာဒးချိုတ်လဝ်ဂှ် လလောၚ်တြးပ္တိတ်လဝ်ပရိုၚ် ဟၟဲဏီတုဲ နကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်လဝ် ဂအုပ်ဗိုလ်ဇြဝ်မေန်ထောန်ကဵုဖုၚ်ကီုလေဝ် က္လေၚ်ဟီုသှ်ကဵုလဝ် ဟၟဲရ။

ပရိုၚ် – သြၚ်လောန်တိုၚ်(မ်)

ဗီုရုပ် – PDF-ဗဂေါ