ပလဝ်၊ သေပ်တေမ်ဗာ(၁၂)
ရးဒေသဇၞော်တၞၚ်သြဳ၊ ပွိုၚ်ဍုၚ်ပလဝ်၊ ပ္ဍဲကဵုပေါဲဗတိုက်ဒှ်လဝ် ဗ္ဒာဲကွာန်ပိတာတ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၁) အခိၚ်နူဂယးပြဟ်ဂှ် ကောန်အရာပ်မွဲတၠ သီုကောန်ဒပ်ကံၚ်ဇြဳပၞာန် (၂)တၠ ဒးချိုတ်လဝ်ရဂှ် ဂွံတီကေတ် နူတံဒပ် (၁)ခရိုၚ်ဗိက်ရ။
တ္ၚဲဏံ အခိၚ်နူဂယး ၜိုတ် (၅)နာဍဳဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲလ္ပာ်ကွာန်ပိတာတ် နကဵုဇြဟတ်ဒပ်မၞုံၜိုတ် ၁၀၀ တုဲဂှ် ပေါဲဗတိုက်ၜါလ္ပာ် ဒှ်လဝ်ကဵုဒပ်ပံၚ်ကောံ ဒပ်စဵုဒၞာဒေသတအ်ရ။
ပ္ဍဲကဵုပေါဲဗတိုက်ဂှ် ဟိုတ်နူဒးဒုၚ်ပန်လဝ်ကဵုသနိုက်ဗာတုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၂)တၠတုဲ ပေါဲဗတိုက်ဆက်ဒှ်ဒၟံၚ် စဵုကဵုအခိၚ်ဒေါဝ်တ္ၚဲရဂှ် ညးတာလျိုၚ် တံဒပ်(၁) ခရိုၚ်ဗိက် မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲကဵုပေါဲဗတိုက်ၜါလ္ပာ်ဂှ် ကိုဝ်ယုပ်သိုဝ်(ရုပ်ဆိုး) အယုက် ၂၅ သၞာံ ကောန်ဒေသဂှ် ဟိုတ်နူဘဲဝပ်ဒးလဝ်လွဟ်မကမ် ပ္ဍဲက္ဍိုပ်တုဲ ဒးချိုတ်လဝ် ပ္ဍဲဒၞာဲဒှ်ပရေၚ်ပရောဂှ်ရဂှ် ဂွံတီကေတ် အတိုၚ်လဟီုညးဒေသတအ်ရ။
ဟိုတ်နူပေါဲဗတိုက်ၜါလ္ပာ်တုဲ ညးဒေသလ္ၚဵုတအ် ဂြိပ်ဒဴပါဲဓလေတ်ဒၟံၚ်နွံတုဲ ဗွဲမဂၠိုၚ်ဂှ် အောပ်မာဒၟံၚ်ပ္ဍဲသ္ၚိညးသ္ကအ်ရဂှ် ညးဒေသတအ် ဟီုထ္ၜးလဝ်ရ။
ဂိတုသေပ်တေမ်ဗာ စၟတ်တ္ၚဲ (၉) တုဲကၠုၚ်လေဝ် ပွိုၚ်ဍုၚ်ပလဝ်၊ ပ္ဍဲကဵုကွာန်လက္ကူဂှ် နူဒပ်ပၞာန်ဍာ်ကံၚ်ဇြဳပၞာန် ပန်ဖျေံလဝ်လွဟ်ဇၞော်တုဲ ကောန်အရာပ် ဒးချိုတ်လဝ် (၁) တၠတုဲ ဒးလဝ်ဘဲဝပ် ၄ တၠရ။
ပ္ဍဲရးဒေသဇၞော်တၞၚ်သြဳဂှ် ပ္ဍဲဂိတုအဝ်ဂါတ်တုဲကၠုၚ်တေံဂှ် မ္ၚးနူပေါဲဗတိုက်တုဲ ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ညးဒေသ ၃၅၀၀၀ ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် ဂကောံအထံက်အရီု ညးပါဲဘဲပၞာန်ဒဵုဟနာတ်တၞၚ်သြဳ လလောၚ်တြးလဝ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai