ပံၚ်၊ သေပ်တေမ်ဗာ(၁၂)
ကြဴနူဗၠာဲသၟိၚ်ထိၚ်ရးကံၚ်ဇြဳပၞာန်မွဲတၠ ဒးဒုၚ်ပန်လဝ်တုဲဂှ် ညးဒေသဒၟံၚ်ကွာန်ဥတ္တတာ၊ ပွိုၚ်ဍုၚ်ပံၚ်၊ တွဵုရးဍုၚ်မန် ဟွံအောန်နူ (၁၅)တၠ ဒးဒုၚ်ရပ်စပ်စၟဳစၟတ်ဒၟံၚ်ရဂှ် ညးဒေသတအ် ဟီုကဵုဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၃)တုဲကၠုၚ်တေံ ကောန်ဒပ်ဗၠာဲသၟိၚ်ထိၚ်ရး ကိုဝ်ကိုဝ်လွေန်ဂှ် နူကဵုအရာပ်မုဟ်နာၚ် ဃောကလေၚ်စဴကၠုၚ် ဗဒိုပ်ဗၠာဲသၟိၚ်ပံၚ် ကဵုကွဳလိုန်ဓာတ်ဂှ် ဒးဒုၚ်ပန်ပသောၚ်လဝ် လ္တူဂၠံၚ်ဇၞော် မတ်မလီု-လဂုၚ်ရ။
ကြဴနူပရေၚ်ဒဒှ်ဏံ သ္ပတံနူ ဂိတုသေပ်တေမ်ဗာ စၟတ်တ္ၚဲ (၆)တုဲ ဒပ်ကံၚ်ဇြဳပၞာန် ဇြဟတ်ဒပ် မၞုံဗ္ဒာဲ ၁၀၀ ဂှ် လုပ်စိုပ်ကၠုၚ်ကွာန်ဥတ္တတာတုဲဂှ် ရပ်ကေတ်ဒၟံၚ် ညးဒေသတအ်ရ။
ပ္ဍဲကဵုညးဒးဒုၚ်ရပ်လဝ်တအ်ဂှ် ပါလုပ်သီုမၞိဟ်ဗြဴမၞုံကဵုဒၟုၚ်ဒၠေၚ် ဒဝ်ခေန်မျေအ်ဝေန် မၞိဟ်ဗြဴပါလုပ်ဒၟံၚ် စဵုကဵု (၈)တၠတုဲ ကောန်ဒေသသှ်ေဒၟံၚ် (၇)တၠ ဒှ်မၞိဟ်တြုံရဂှ် ဂွံတီကေတ်ရ။
ညးဒေသ ဒးဒုၚ်ရပ်လဝ်တအ်ဂှ် ရပ်ဒက်ချုက်လဝ် ပ္ဍဲဗဒိုပ်ဗၠာဲသၟိၚ်တိဍာ်ဇိုၚ်ကျာ်တုဲ မၞိဟ်တြုံလ္ၚဵုဂှ် ပလံၚ်ဗစိုပ်လဝ် ဇရေၚ်ပရေၚ်စၟဳစၟတ်ရဂှ် ညးစုက်လုက်ကဵုကံၚ်ဇြဳပၞာန်တအ် ဟီုလဝ်ရ။
အခိၚ်လၟုဟ်ဏံ ကရောၚ်ပၞာန်ကံၚ်ဇြဳပၞာန် ဂေတ်ဂေၚ်အာကၠုၚ်ဒၟံၚ် ပ္ဍဲကွာန်ယျေန်ညုၚ်၊ ဇိုၚ်ကျာ်၊ ဥတ္တတာ ကေုာံအရာပ်လ္တူဍုၚ်ပံၚ်တအ်နွံတုဲ ပရေၚ်လုပ်စိုပ်ဂၠိုက်ဂၠာဲသၟာန်စၟဳစၟတ် အခိၚ်ဒေါဝ်တ္ၚဲ မွဲလွာဲဓဝ် နွံဒၟံၚ်ရဂှ် ဂွံတီကေတ် အတိုၚ်လဟီု ညးဒေသတအ်ရ။
တွဵုရးဍုၚ်မန်၊ ပ္ဍဲပွိုၚ်ဍုၚ်ပံၚ်ဂှ် ပ္ဍဲကဵုဂိတုအဝ်ဂါတ် သတ္တာဟလကြဴအိုတ်တေံကဵု ဂိတုသေပ်တေမ်ဗာ ပထမသတ္တာဟဏံ ကောန်ဒပ်ကံၚ်ဇြဳပၞာန်တအ် ဒးဒုၚ်ပန်၊ ဗဒိုပ်ဗၠာဲသၟိၚ်ဍုၚ်ပံၚ်၊ ဗဒိုပ်ကၚ်ယျေန်ညုၚ်ကဵု ရုၚ်ဌာနက္ဍိုက်က္ဍိုပ်ပရေၚ်အုပ်ဓုပ် ပွိုၚ်ဍုၚ်တအ် ဒးဒုၚ်ဗတိုက်လဝ်ကဵုဒရုမ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai