မတ်မလီု – သေပ်တေမ်ဗာ (၁၂)
ပ္ဍဲတၚ်ဂကောံစဵုဒၞာညးဍုၚ်ကွာန် ကၠောန်ရေၚ်တၠုၚ်လဝ်လ္ၚဵုတအ်ဂှ် အကာဲအရာသ္ပကဵု ဇီုကပိုက်ဒးဒၟံၚ် ပရေၚ်အုပ်ဓုပ်သၞောဝ်ဓဝ် ဂွံဆဵုကေတ်ဒၟံၚ်ရဂှ် ဝန်ဇၞော်ကၟိန်ဍုၚ် ဥူတုၚ်ဥူ ဌာနဝန်ဇၞော်သၞောဝ်ဓဝ် NUG ဟီုလဝ်ရ။
ပ္ဍဲကောံဓရီုဆဵုဂဗသဳကၠဳ ဌာနဝန်ဇၞော်သၞောဝ်ဓဝ်၊ အလဵုအသဳညဳသၟဟ်ကောန်ဂကူ ကေုာံ နာဲဗ္စာသၞောဝ်ဓဝ် နူရုၚ်သၞောဝ်ဓဝ်ပွိုၚ်ဍုၚ်တအ် ဆဵုဂဗသဳကၠဳ ကၠောန်ဗဒှ်လဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၉)တုဲကၠုၚ်တေံဂှ် ဟီုသ္ဂးလဝ်သာ်ဏံရ။
“မွဲလ္ပာ်တေံဂှ် ပွသၞတအ်ဗတိုက်ဒၟံၚ်ဂှ် နွံဒၟံၚ်တုဲ လ္ပာ်ဇကုဇကုတအ်လေဝ် တၚ်ကၠောန်ရေၚ်တၠုၚ် ဂကောံပိုၚ်ပြဳအဝဵုမဆေၚ်စပ် လ္ၚဵုတအ်ဂှ် အကာဲအရာသ္ပကဵုဒၟံၚ် ပရေၚ်ဇီုကပိုက်နွံဒၟံၚ် ဒဒှ်ရဂွံညာတ်ကေတ်လဝ်ကီု၊ တၚ်ဂမၠိုၚ်ဏံ ဟိုတ်နူဒှ်ဒၟံၚ်ကာလပၠန်ဂတးတုဲ ကၟိန်ဍုၚ်ပိုဲဟေၚ်ဟွံသေၚ် ပ္ဍဲပရေၚ်ကၠောန်ရေၚ်တၠုၚ်ပၠန်ဂတး အလုံဂၠးကဝ်လေဝ် ဒှ်တၚ်က္တဵုဒှ်လေပ်ဒၟံၚ်ရ”ဂှ် ဝန်ဇၞော်ပရေၚ်သၞောဝ်ဓဝ် ဟီုသ္ဂးလဝ်ရ။
သ္အာန်ူဂှ်ပၠန် ပ္ဍဲမွဲကာလပၠန်ဂတးဏံ ပရေၚ်အုပ်ဓုပ်သၞောဝ်ဓဝ်ဂှ် တၚ်ဍိုန်လျၜိုတ်ထေက်ကြိုက် နွံမာန်ဒၟံၚ်တုဲ ညံၚ် ပရေၚ်ဇီုဓဗတ်၊ ပရေၚ်ဇီုကပိုက် အတိုၚ်တၚ်ဂမၠိုၚ်တအ်ဏံ ဟွံဂွံက္တဵုဒှ် ဒးတာဒၞာရောၚ်တုဲ ယဝ်ရတာဒၞာဟွံမာန်မ္ဂး ဇီုကပိုက်ဒး ဓဝ်ပတှ်ေညးဍုၚ်ကွာန် လ္တူပၠန်ဂတးက္ညၚ်မာန်တုဲ ယဝ်ရစိုတ်ဓာတ်ပၠန်ဂတးညးဍုၚ်ကွာန်တအ် အောန်ယအ်စှ်ေကၠုၚ်မ္ဂး ဒှ်အရာဒပ်ကံၚ်ဇြဳပၞာန် သ္ဂောံမိပ်စိုတ် ဒှ်အာမာန်ရဂှ် ဟီုလဝ်ဏီရ။
ပ္ဍဲအရာကၠောန်ရေၚ်တၠုၚ် ပရေၚ်အုပ်ဓုပ်သၞောဝ်ဓဝ်ဂှ် နကဵုဌာနဝန်ဇၞော်သၞောဝ်ဓဝ် မွဲဂကောံဓဝ် ကၠောန်ရေၚ်တၠုၚ်အာဟွံဂွံတုဲ နကဵုဂကောံဂမၠိုၚ် ပံၚ်တောဲကၠောန်ရေၚ်တၠုၚ်အာဟေၚ်မှ သ္ဂောံက္လိဂွံပေါဲအံၚ်ဇၞး ဂွံကိတ်ညဳကဵု သၞောတ်ဗ္ၜတ်ပၠန်ဂတးရောၚ်ဂှ် ဟီုသ္ဂးလဝ်ရ။
အခိၚ်လၟုဟ်ဏံ ဒက်ပ္တန်လဝ် ကဝ်မတဳဓမံက်ရုပ်ရဴစဳရေၚ်သၞောဝ်ဓဝ်ကာလအကြာတုဲ သွက်ပရေၚ်အုပ်ဓုပ်သၞောဝ်ဓဝ်ဂှ် ကၠောန်ရေၚ်တၠုၚ် ဓမံက်ဒၟံၚ်ရုပ်ရဴကီု၊ အတိုၚ်သၞောတ်အထံက်ပိတၞုၚ် ဒးကၠောန်ရေၚ်တၠုၚ်အာ ပ္ဍဲရုၚ်သၞောဝ်ဓဝ်ဗလးမုက်တိ ပွိုၚ်ဍုၚ်ကီု၊ ရုၚ်သၞောဝ်ဥပဒေပွိုၚ်ဍုၚ်၊ ဌာနက္ဍိုက်က္ဍိုပ်ထံၚ်စာတ်တအ် သွက်ဂွံရေၚ်တၠုၚ်ပံၚ်ကောံအာ ကောံကောံကလောံကလောံဂှ်လေဝ် ဝန်ဇၞော်ကၟိန်ဍုၚ်ဗတိုက်ဖ္အောဝ်လဝ်ရ။
အလဵုအသဳညဳသၟဟ်ကောန်ဂကူဂှ် အခိၚ်လၟုဟ်ဏံ သွက်ဂွံဒက်ပ္တန်ကဝ်မတဳ ပ္ညဳပ္ညပ်ပံၚ်ဗစိုပ်လၟေၚ်ကမၠောန် ဆေၚ်စပ်ကဵုအုပ်ဓုပ်သၞောဝ်ဓဝ် မဒှ်တၚ်အဓိကအခိၚ်ကာလလၟုဟ်ဏံရဂှ် ဂွံတီကေတ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – NUG
sanlontai