သွက်ဂွံသၠုၚ်ပ္တိုန်ကေတ်ကဵုအရေဝ် ကုပရေၚ်ဗ္တိုက်တရဴကျာတံ နကဵုနဲကဲစှ်ေကဵုနတဲတံညိဂှ် KNU အာတ်မိက်

ဘာပန်၊ သေပ်တေမ်ဗာ(၁၂)

ကုကံၚ်ဇြဳပၞာန်သီအဝဵု ဖံက်ပ္ကဝ်က္လိလောန်မံၚ် အမှုရာဇာဝတ်ပၞာန် ပွဗ္တိုက်တရဴကျာဟၟဲကဵုဥပဒေတံ မံက်က်ထေၚ်ၚ်ဂှ် နကဵုဂကောံဍုၚ်သ္အာၚ်တံ သွက်ဂွံသၠုၚ်ပ္တိုန်ကေတ်အရေဝ်ကၟာတ်လဒဵုကဵု နကဵုနဲကဲသာတုဲစိုပ်တရဴစှ်ေကဵုနတဲတံအိုတ်ညိဂှ် ဗော်သွးကောန်ဂကူကရေၚ် (KNU) အာတ်မိက်လဝ်ရ။

တုဲကၠုၚ်ပ္ဍဲဂိတုသေပ်တေမ်ဗာ၊ စၟတ်တ္ၚဲ(၇)တေံဂှ်လေဝ် ပ္ဍဲခရိုၚ်ဘာပန် (KNU)၊ကုကွာန်ပိကွာန် နူကဵုပွိုၚ်ဍုၚ်လူတဝ်ဂှ် နူကဵုဒပ်ကျာကံၚ်ဇြဳပၞာန်တံ ကၠုၚ်စိုပ်ဗ္တိုက်ဂြာတ်လဝ်ဗမ်နကဵုက္ၜၚ်ကျာဗ္တိုက်ဂျက်တုဲ ကြဴနူ အ္စာဗြဴ၊ ကွးဘာတြုံ၊ဗြဴတံမပါလုပ် ဂၠိုၚ်ကဵုစှော် ဒးချိုတ်လဝ်တုဲဂှ် KNU အာတ်မိက်လဝ် ဗီုလၟုဟ်ရ။

ဟိုတ်နူကဵုပွဗ္တိုက်ဂြာတ်ဗမ် ကဵုက္ၜၚ်ကျာဒပ်ကံၚ်ဇြဳပၞာန်တံတုဲ ဘာဗ္တောန်လိက်မွဲဘာ၊ ဗ္ဒမ်ကွးဘာမံၚ်မွဲဗ္ဒမ်၊ ဘာကျာ်မွဲဘာ၊ ဒၞါဲသ္ပဝတ်ရာဒနာမိက်ဂှ်မွဲဒၞါဲ ကေုာံ သ္ၚိမၞိဟ်ဒၟံၚ် (၁၀)မ ဒးလီုလာ်ဆောံလေၚ်လဝ်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲခရိုၚ်ဘာပန်ဂှ် ဟိုတ်နူပရေၚ်ဗ္တိုက်တရဴကျာကံၚ်ဇြဳပၞာန်တံတုဲ အ္စာဘာ ကေုာံ ကွးဘာတံမပါလုပ် (၁၂)တၠချိုတ်တုဲ ဆေၚ်စပ်ကဵုပရေၚ်ဇီုကပိုက်က္လိဂွံဝပ်တံကဵု စမြိုၚ်ပရေၚ်ဘာသာ၊ ဘာဗ္တောန်လိက်တံမပါလုပ် သ္ၚိဒၟံၚ်တံ ဒးလီုလာ်ဆောံလေၚ်လဝ်ဂှ်တုဲ ကဝ်မတဳကေၚ်ကာဗဟဵု(KNU)ဂှ် လလောၚ်ပ္တိတ်လဝ်လစွံစိုတ် နကဵုစၟတ်တ္ၚဲ ဂိတုသေပ်တေမ်ဗာ စၟတ်တ္ၚဲ ၁၁ ရ။

ကုကံၚ်ဇြဳပၞာန်ဂှ် ဟိုတ်ဟၟဲမွဲသာ်က္လိလောန်မံၚ် ပွဗ္တိုက်တရဴကျာဟၟဲကဵုသၞောဝ်ဥပဒေ လ္တူညးဍုၚ်ကွာန်တံတုဲ ဖံက်ပ္ကဝ်မံၚ်ရာဇဝတ်ပၞာန်မံက်က်ထေၚ်ၚ်တံဂှ် နူကဵုကုလသမဂ္ဂဂၠးကဝ်တံ၊ အလဵုသဳဍုၚ်သ္အာၚ်တံ၊ ယန္တယာပရေၚ်သၞောဝ်ဓဝ်တံ ကေုာံ ဂကောံနာနာတံဂှ် သွက်ဂွံရေၚ်တၠုၚ် ကေတ်အရေဝ်ကၟာတ်လဒဵု နကဵုနဲကဲ သာတုဲစှ်ေနတဲစိုပ်တရဴတံအိုတ်ညိဂှ် KNU အာတ်မိက်လဝ်ရ။

“ပိုဲတံ မိက်ဂွံအာတ်မိက်ဍုၚ်ဂမၠိုၚ်တံဂှ်တှ်ေ ပွမရေၚ်တၠုၚ်ကေတ်အရေဝ်စှ်ေကဵုနတဲတံဂှ် နွံပၟိက်မံၚ်ကွေံကွေံယျဏောၚ်ဂှ် မိက်ဂွံဟီုရ။ ဗွဲတၟေၚ် ပူဗိုၚ်ရေၚ်သ္ကအ်တုဲ မွဲအလန်ဓဝ် မိက်ဂွံကဵုကၠောန်သ္ပပရေၚ်ကၟာတ်လဒဵု ကုကံၚ်ဇြဳပၞာန်တံရ။ ပရေၚ်ပၞာန် ညံၚ်ပရေၚ်ဇီုကပိုက်လ္တူညးဍုၚ်ကွာန်တံ ဟွံမွဲလးလး၊ စွံပွန်လ္တူညးဍုၚ်ကွာန်တံတုဲ ပွဗ္တိုက်ဂစိုတ်ဂယျိုၚ်မံၚ်တံ သ္ဂောံဒေါံဒေၚ်အာဂှ် သွက်ဂွံကၟာတ်လဒဵုထောံ ပွကမၠောန်ဍေံတံဗွဲတၟေၚ်ဂှ် နွံပၟိက်ရ။ နွံပၟိက်မံၚ် ကုပွကၟာတ်လဒဵုကေတ်အရေဝ် သာတုဲဇြဟတ်သ္ကာတ်တံရဂှ် အဲမိက်ဂွံဟီုရ ဏး” သာ်ဝွံ ညးမၞုံအခေါၚ်ဟီုဂး KNU ဗဒိုသဝ်တဝ်နဳ သ္ဂးရ။

ဒပ်ကံၚ်ဇြဳပၞာန်ဂှ် စွံပွန်လ္တူညးဍုၚ်ကွာန်ကောန်အရာပ်တံတုဲ နကဵုတၚ်ရန်တၟံနွံနွံဂှ် ကၠောန်သ္ပလဝ် ပွဗ္တိုက်ဂြာတ်ဗမ် လ္တူစမြိုၚ်ပရေၚ်ဘာသာတံ၊ ဘာဗ္တောန်လိက်တံကဵု စမြိုၚ်မၞိဟ်မံၚ်တံရဂှ် KNU လလောၚ်ပ္တိတ်ဟီုဂးလဝ်ရ။

နကဵုဗော်သွးကောန်ဂကူကရေၚ် KNU တံဂှ် သွက်ဂွံစဵုဒၞါ လမျီုကၠအ်သွဝ် ညးဍုၚ်ကွာန်ဇကုတံဂှ် စဵုဒၞါအာနကဵုနဲကဲစုၚ်ရောၚ်ဂှ်လေဝ် ထ္မံက်ထ္ၜးလဝ် ပ္ဍဲတၚ်လလောၚ်တြးရ။

ပ္ဍဲလ္ပာ်တိဍာ် ခရိုၚ်ဘာပန်ဒပ်မဟာ(၅)ကဵု ခရိုၚ်ညံၚ်လေဝ်ပေန်ဒပ်မဟာ(၃) တံဂှ် ဟိုတ်နူပရေၚ်ဗ္တိုက်တရဴကျာကဵု လွဟ်ဇၞော်ကံၚ်ဇြဳပၞာန်တံတုဲ ညးဍုၚ်ကွာန်ကောန်အရာပ်တံ သာတုဲဇီုကပိုက်ကၠုၚ်မံၚ်ရဂှ် ညးမၞုံအခေါၚ်ဟီုဂး KNU ဗဒိုသဝ်တဝ်နဳ ဟီုရ။

“ကြဴနူဒးဒုၚ်သီဗဒိုပ်တုဲ ပရေၚ်ဗ္တိုက်တံ သာဂၠိုၚ်တိုန်ကၠုၚ်ရဂှ် ဂွံဆဵုကေတ်ရ။ ဆ္ဂး တံဏံဂှ် ဟွံဗ္တိုက်လေဝ် ဗီုဍေံကဵုဍေံ ဍေံကၠောန်မံၚ်ကေတ်တ်ဂှ် နွံမံၚ်ဗွဲမဂၠိုၚ်ရ။ ဥပမာဍေံတှ်ေ ပ္ဍဲခရိုၚ်ညံၚ်လေဝ်ပေန်ဂှ် ပ္ဍဲအခိၚ်ဗ္တံ ညာတ်ပၟတ်တှ်ေ ညးပါဲဓလေတ်ဘဲပၞာန်တံနွံမံၚ်။ ပွပန်ပှော်လွဟ်ဇၞော် ဒၞါဲကောန်ကွာန်တံနွံသီုဖအိုတ်တံဂှ် ဒှ်ပွက္တဵုဒှ်မံၚ် မွဲခဏမွဲခဏရ။ ပွကမၠောန်ဍေံဂှ် ပေါဲဗ္တိုက်ဒှ်ကီု၊ ဟွံဒှ်ကီု ကၠောန်မံၚ်ဗီုဏံဂှ် ဒှ်မံၚ်လၟေၚ်တ္ၚဲရ။ ဍေံတံဂှ် ဒှ်ညးက္လိလောန်မံၚ် အမှုရာဇဝတ်ပၞာန် ပေၚ်ၚ်ရ” သာ်ဝွံ ဟီုရ။

အပ္ဍဲခရိုၚ်ဘာပန်ဂှ် ဟိုတ်နူပွဗ္တိုက်ဂြာတ်ဗမ် ကံၚ်ဇြဳပၞာန်တံတုဲ ဘာဗ္တောန်လိက် (၁၁)ဘာ ဒးကၟာတ်လဝ်တုဲ အ္စာဘာတံကဵုကွးဘာတံဂှ် ဟွံဂံၚ်တိုန်ဘာရတုဲ ဒးဂြိပ်ဒဴပါဲဓလေတ်မံၚ် ဒၞါဲဗၠးဘဲရဂှ် KNU လလောၚ်ပ္တိတ်လဝ်ရ။

တုဲကၠုၚ်ပ္ဍဲဂိတုသေပ်တေမ်ဗာ၊ စၟတ်တ္ၚဲ (၅)ဂှ်လေဝ် ပ္ဍဲခရိုၚ်ညံၚ်လေဝ်ပေန် KNU၊ ပွိုၚ်ဍုၚ်ကျံက်ကျဳဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ဂြာတ်လဝ်ဗမ်နကဵုက္ၜၚ်ကျာ ပ္ဍဲကွာန်လဝ်မူတဝ်ကဵု ကွာန်(ဘုရားလေးကုန်း) တံဂှ်တုဲ ဘာတန်သၠုၚ်လဝ်မူတဝ် ကွးဘာမၞုံ (၂၇၂)တၠကဵု ဘာတန်မူလလဝ်မူဗာ ကွးဘာမၞုံ(၃၃)တၠ ၜါဘာတံ ဒးကၟာတ်ထောံလဝ်ယာယဳတုဲ ပရေၚ်ကတ်လ္ၚတ်ကွးဘာတံ ဒးလဇုဲလဇလဝ်ရဂှ် KNU သ္ဂးရ။

ပ္ဍဲတိဍာ်အုပ်ဓုပ်ကဝ်တူလေဝ် KNU ဂှ် ဟိုတ်နူပွဗ္တိုက်စွံပွန်လ္တူညးဍုၚ်ကွာန်ကောန်အရာပ်တံကဵု ပွက္လိလေလာန်ဝးပ္ကဝ်အခေါၚ်အရာမၞိဟ်တံတုဲ ညးဍုၚ်ကွာန်ဒေသ(၆)ကိုဋ်ပြၚ် ဒးပါဲမံၚ်ဘဲပၞာန်တုဲ ဆက်နွံပၟိက်မံၚ် အရီုဗၚ်ပရေၚ်ဗ္စာရဏာမၞိဟ်တံဖိုဟ်ရဂှ် ဂကောံညးအရာပ်ကရေၚ်တံ ဟီုဂးလဝ်ရ။

ပရိုၚ်-သြၚ်လောန်တိုၚ်မ်

ဗီု-MOI/KNU