နေဗျဳဒဝ်၊ သေပ်တေမ်ဗာ (၁၂)
သွက်ဂွံကံက်ဂလိုၚ်ပ္တိုန် ၚုဟ်နှေန်စပ်ကဵုပ္တိုန်စရၚ်ယာန်တံ ၃ ဆဂှ် နူကဵုဌာနက္ဍိုက်ပ်စၞောန်ပ္ညုၚ် ပရေၚ်ပလံၚ်ဗစိုပ်ဂၠံၚ်ကုန်ကံၚ်ဇြဳပၞာန် စၞောန်ကၠုၚ် နကဵုစၟတ်တ္ၚဲ ဂိတုသေပ်တေမ်ဗာ (၈) တေံရ။
အတိုၚ်တၚ်စၞောန် ကညန ကံၚ်ဇြဳပၞာန်ဂှ်မ္ဂး ၚုဟ်ပ္တိုန်စရၚ်ယာန် မကံက်ဒၟံၚ်လၟုဟ်ဂှ်ဝွံ ဟွံဗဗွဲကဵုခေတ်ကာလဂှ်ကီု၊ ၚုဟ်သြန်ဂိတုသ္ဇိုၚ်တံ သၠုၚ်တိုန်ကၠုၚ်ကီု၊ ၚုဟ်ယာန်တံ သၠုၚ်တိုန်ကၠုၚ်တံဂှ်တုဲ မ္ဒးကၠောန်လဝ် သွက်ဂွံကံက်ဂလိုၚ်ပ္တိုန် ၚုဟ်ပ္တိုန်စရၚ်ယာန်တံဂှ်ရောၚ် သ္ဂးလဝ်ရ။
ၚုဟ်ပ္တိုန်စရၚ်ယာန် မကံက်အာတံဂှ် သွက်ဂွံသၠုၚ်ပ္တိုန် လ္တူနူကဵုကၠာတေံ ၃ ဆဂှ် ရန်လဝ်တုဲ ၚုဟ်တၞဟ်ဟ် သှ်ေဒၟံၚ်သွက်ဂွံပလေဝ်ပလေတ်တံဂှ်လေဝ် စၟဳတ်တုဲ ဂိတုသေပ်တေမ်ဗာ ၁၃ ဏံ ညံၚ်ဂွံစိုပ်သွက်ဂွံပ္တိုန်ထ္ၜးဂှ် စၞောန်ပ္ညုၚ်လဝ် ရုၚ်ကညန ရးဒေသ ကေုာံ တွဵုရးတံ ပါလုပ်သီုကဵု နေဗျဳဒဝ်ရ။
နကဵုၚုဟ် ဂလိုၚ်ပ္တိုန်ကံက်အာတံဂှ် ယဝ်ရသၞာံ မစၟတ်သမ္တီလဝ် ကွဳစက်ဂှ် ဟွံတုပ်ဒှ်ဒၟံၚ်မ္ဂး ဇၟာပ်ပ်ခြာမွဲသၞာံဂှ် ကံက်အာ နူမွဲကိုဋ်ဒ္ကေဝ် စဵုကဵု ပိကိုဋ်ဒ္ကေဝ်ဏောၚ်တုဲ လျိုၚ်ဖ္ဍိုက်တၞဟ်ခြာအာ ဒဵုကဵုပိတာန်မ္ဂး နူမွဲကိုဋ်ဒ္ကေဝ် စဵုကဵုပိကိုဋ်ဒ္ကေဝ်၊ လ္တူပိတာန်မ္ဂး နူကဵုၜါကိုဋ်ဒ္ကေဝ် စဵုကဵုတြဴကိုဋ်ဒ္ကေဝ် သွက်ဂွံကံက်ဂလိုၚ်အာဂှ် စဳဇန်လဝ်ရ။
နကဵုယာန် ပ္တိတ်နူဒၞါဲဒေသအပိုၚ်အခြာကွတ်စက်တံဂှ်ဟွံသေၚ်မ္ဂး ယဝ်ရကပေါတ်ဍေံ ပြံၚ်လှာဲအာမွဲမွဲမ္ဂး ဒဏ်လှုဲဂှ် နူကဵု ၅ ကိုဋ်ဒ္ကေဝ် စဵုကဵု ၁၀ ကိုဋ်ဒ္ကေဝ် သွက်ဂွံသၠုၚ်ပ္တိုန်ကံက်အာဂှ်ကီု၊ ယာန်ပ္တိတ်နူဒေသအပိုၚ်အခြာကွတ်စက်တံဂှ် ယဝ်ရဒကုတ်ဒကာတ်ဍေံပြံၚ်လှာဲအာမွဲမွဲမ္ဂး တန်တဴကဵုလ္တူဂကူဍေံတုဲ နူကဵုကံက်အာ မသုန်ဠက်၊ မွဲကိုဋ်၊ မွဲကိုဋ်ဘာ်တံဂှ် သွက်ဂွံကံက်အာ စဵုကဵုပိကိုဋ်ဒ္ကေဝ်ဂှ် ပလေဝ်ပလေတ်လဝ်ရ။
ၚုဟ်ပ္တိုန်စရၚ်ယာန်ကဵု ၚုဟ်စၟဳတ်ယာန် တဲကၠာတံဂှ်လေဝ် ကွဳစက်ဇၞော်မွဲဖ္ဍိုက်ဂှ် ကံက်ဂလိုၚ်ပ္တိုန်အာ နူကဵုပန်ဠက်ဒ္ကေဝ် စဵုကဵု ၁၃၀၀၀၀ ဒ္ကေဝ်၊ ကွဳစက်ဍောတ်တံဂှ် နူကဵုၜါဠက်ဒ္ကေဝ် စဵုကဵု ၆၅၀၀၀ ဒ္ကေဝ်၊ ကွဳလိုန်ဓာတ်တံကဵု ကွဳလိုန်ဓာတ်စကာဓာတ်လလဳတံဂှ် နူကဵုၜါဠက်ဒ္ကေဝ်ဂှ် သၠုၚ်ပ္တိုန်ကံက်အာ စဵုကဵုမသုန်ဠက်ဒ္ကေဝ်ရောၚ် ဂွံတီကေတ်ရ။
ကွဳစက်ဖ္ဍိုက်ဗၞိက်တံဂှ် ဟိုတ်နူကိစ္စ ကၠေၚ်စက်က္ဍၚ် မက္တဵုဒှ်ဒၟံၚ်လၟုဟ်တံဂှ်ကီု၊ ဟိုတ်နူပေါဲဗ္တိုက်တံကီုတုဲ သွက်ဂွံအာကၠုၚ်တရဴ မ္ၚးနူခက်ခုဲဒၟံၚ်ဂှ် ပ္ဍဲကဵုအကာဲအရာ ဗၞိက်ဂေတ်ဂြိပ်ဗီုကၠာတေံ ဟွံမွဲဒၟံၚ်ဂှ် လ္တူအစဳဇန် သွက်ဂွံသၠုၚ်ပ္တိုန်ကံက်အာ ၚုဟ်ပ္တိုန်စရၚ်ယာန်တံသာ်ဏံဂှ် ပရေၚ်ပါ်ပါဲတံ နွံဒၟံၚ်ရ။
စပ်ကဵု ပရေၚ်ဂလိုၚ်ပ္တိုန်ကံက်အာ ၚုဟ်ပ္တိုန်စရၚ်ယာန်တံဂှ်တုဲ နူကဵုသြၚ်လောန်တိုၚ်(မ်) ၜိုန်ရဆက်စၠောံသၟာန်သၟုက်လဝ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန်ဂှ်ကီုလေဝ် ဒဵုကဵုအခိၚ်လၟုဟ် ကလေၚ်သှ်ကဵုလဝ်ဂှ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai