ပြံၚ်လှာဲခါန်ကၞက် သ္ကိုပ်ဒပ်မဟာ KNLA (၃) တၠ

မတ်မလီု၊ သေပ်တေမ်ဗာ (၁၂)

ပြံၚ်လှာဲခါန်ကၞက်လဝ် သ္ကိုပ်ဒပ်မဟာတၟိ နူကဵုဒပ်မဟာ ဒပ်ပၞာန်ဗၠးၜးကောန်ဂကူကရေၚ် KNLA (၃) ဒပ်တံဂှ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ သ္ပဒတန်လဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

သ္ကိုပ်ဒပ်မဟာ ကေုာံ သ္ကိုပ်ဗျူဟာ နူကဵုဒပ်မဟာ (၃) ဒပ် မပ္တံကဵုဒပ်မဟာ (၄) ၊ ဒပ်မဟာ (၆) ၊ ဒပ်မဟာ (၇) နူကဵုဂကောံဒပ်ရပ်လွဟ် KNLA မဒှ်သၟဝ်တဲဗော်သွးကောန်ဂကူကရေၚ် KNU တံဂှ် အပ္ဍဲအကြာတ္ၚဲတံဏံဂှ် ပြံၚ်လှာဲခါန်ကၞက်လဝ်ရ။

သ္ကိုပ်ဒပ်မဟာ နူကဵုဒပ်မဟာ (၃) ဒပ်ဏံဂှ် ပြံၚ်လှာဲခါန်ကၞက်လဝ် နူကဵုကောံဓရီု သ္ကိုပ်ဒပ်ဇၞော် ဒပ်ပၞာန်ဗၠးၜးကောန်ဂကူကရေၚ် KNLA တံရောၚ် မဒှ်ရ။

သ္ကိုပ်ဒပ်မဟာ နူကဵုဒပ်မဟာ (၇) KNLA ဂှ် သ္ကိုပ်ဗိုလ်ဇၞော် သဝ်ဒိဂွါထူ၊ သ္ကိုပ်ဒပ်မဟာ နူကဵုဒပ်မဟာ (၄) ဂှ် ဒုသ္ကိုပ်ဗိုလ်ဇၞော် သဝ်ဖိုဝ်လေဝ်၊ သ္ကိုပ်ဒပ်မဟာ ဒပ်မဟာ (၆) ဂှ် သ္ကိုပ်ဗိုလ်ဇၞော် သဝ်ကိုဝ်ထူတံ မဒှ်တုဲ သ္ကိုပ်ဗျူဟာတၟိဂှ် နူကဵုဒပ်မဟာ (၇) ဂှ် သဝ်ဖိုဝ်ထူ၊ နူကဵုဒပ်မဟာ (၄) ဂှ် သဝ်လေဝ်တုၚ်၊ နူကဵုဒပ်မဟာ (၆) ဂှ် သဝ်နေဝ်ဒါထူတံ မဒှ်ရောၚ် ထ္မံက်ထ္ၜးလဝ် ပ္ဍဲပရိုၚ်မဳဒဳယျာကရေၚ်တံရ။

ကၠာတေံဂှ် သ္ကိုပ်ဒပ်မဟာ ဒပ်မဟာ (၇) KNLA ဂှ် ဂအုပ်ဗိုလ် သဝ်ဖဝ်ဒိုဝ်၊ သ္ကိုပ်ဒပ်မဟာ နူကဵုဒပ်မဟာ (၆) ဂှ် ဂအုပ်ဗိုလ်သဝ်သာမိသေဖိုဝ် မဒှ်ဒေံ ဥက္ကဌတြေံ KNU သ္ကိုပ်ဗိုလ် သဝ်မူတူသေဖိုဝ်၊ သ္ကိုပ်ဒပ်မဟာ နူကဵုဒပ်မဟာ (၄) ဂှ် ဂအုပ်ဗိုလ် သဝ်လေဝ်မူတံ မဒှ်ရ။

ပြံၚ်လှာဲခါန်ကၞက်လဝ် သ္ကိုပ်ဒပ်မဟာ ကေုာံ သ္ကိုပ်ဗျူဟာ နူကဵုဒပ်မဟာ (၃) ဏံမာန်ဂှ်ဝွံ သွက်ညးဍုၚ်ကွာန်တံဂှ် ဒှ်ပရေၚ်အံၚ်ဇၞးမွဲရောၚ် ညာတ်ကေတ်သာ်ဏံရောၚ် သၟတ်ကရေၚ်မွဲတၠ ဟီုဂးလဝ်ရ။

အပြံၚ်အလှာဲဒပ်မဟာ KNLA ဂှ်ဝွံ လ္တူပရေၚ်ပၞာန်ဂှ် ဇီုကပိုက်အာ တိုက်ရိုက်ဟွံသေၚ်ကီုလေဝ် အတိုၚ်မူဝါဒ KNU သွက်ဂွံဆက်ကၠောန်အာ ညံၚ်သၞောတ်တၠအဝဵုပၞာန် ဂွံသရိုဟ်စှ်ေရနွံဂှ် ပဒိုဝ်သဝ်တဝ်နဳ သ္ပလဝ်တၚ်စၟတ်ရ။

ပၞောဝ်ကဵုဒပ်မဟာ KNLA (၃) ဒပ်ဂှ် ပ္ဍဲကဵုခရိုၚ်ဒူပလာယာမွဲဓဝ်ဟေၚ် က္တဵုဒှ်လဝ်ပေါဲဗ္တိုက် ကုဒပ်ကံၚ်ဇြဳပၞာန် ဗွဲမဂၠိုၚ်ဂၠေၚ်တုဲ ပ္ဍဲကဵုဒပ်မဟာ (၇) ခရိုၚ်ဘာအၚ်ကဵု ဒပ်မဟာ (၄) ခရိုၚ်ဗိက်ထဝါဲတံဂှ် ပေါဲဗ္တိုက်က္တဵုဒှ် နွံဒၟံၚ်ညိညရဂှ် ဂွံတီကေတ် အတိုၚ်တၚ်လလောၚ်တြး နူကဵု KNU ဗဟဵု မလလောၚ်ပ္တိတ်လဝ်ဂှ်ရ။

ပရိုၚ်−သြၚ်လောန်တိုၚ်(မ်)

ဗီု−မဳဒဳယာကောန်ဂကူကရေၚ်