ဂိုဏ်ကဝ်(လ်)သေန်တာသေံ လီဠာန်မၞိဟ် မဆက်စပ်ဒၟံၚ်ကဵု အမှုဂြောဝ်ဂတာမွဲ ဒးဒုၚ်ဂစိုတ်ဂှ် ရပ်ဂွံ ပ္ဍဲကာမ္ဗောဒဳယျာ

ဖဏံပေန်၊ သေပ်တေမ်ဗာ (၁၂)

ရပ်ဂွံလဝ် ကောန်ဍုၚ်သေံပန်တၠ မပါလုပ်ဆက်စပ်ဒၟံၚ် ပ္ဍဲကဵုဂိုဏ်ကဝ်(လ်)သေန်တာလီဠာန်တံ ပ္ဍဲကဵုကာမ္ဗောဒဳယျာဂှ် ဂကောံဒပ်ဗၠာဲသၟိၚ်တံ ဟီုရ။

ညးမဒှ် သူဗိုဝ်ဝါန်ဝုၚ်ဂှ်ဝွံ ပ္ညဳပ္ညပ်ရေၚ်တၠုၚ်ကဵုလဝ် ပရေၚ်ဇာဇၞိက်ကဝ်(လ်)သေန်တာလီဠာန်တံဂှ်တုဲ ကရောံညးဂှ် ညးဗြဴဍောတ်တ်ပိတၠလေဝ် သွက်ဂွံလီဠာန်ဂှ် ကော်လဝ်ဖုၚ် ကုမၞိဟ်ဒးဒုၚ်သ္ပပရန်တံဂှ်ရောၚ် သ္ဂးရ။

ညးတံဝွံ ဒးဆေၚ်အာမုက် နကဵုတၚ်စောဲစပ် စပ်ကဵုအမှုရာဇဝတ်ကောန်ပျူတာ၊ ဂဗုတ်လီဠာန် ကေုာံ ပွမပါလုပ် ပ္ဍဲကဵုဂိုဏ်ရာဇဝတ်ကၠောံဍုၚ်တံဂှ်မဒှ်တုဲ သွက်ဂွံကေတ်ဒုဟ် လ္ဂောံကဵုသၞောဝ်ဂှ် ကလေၚ်ပလံၚ်ဖျဴ ဍုၚ်သေံပၠန်ဏောၚ် မဒှ်ရ။

သၟိၚ်တၠအဝဵုတံဂှ် နူကဵုညးမၞုံသံသယတံဂှ် သီဂိုၚ်ဂွံလဝ် ဖုၚ်တဲဂမၠိုၚ်၊ တၞးကာဒ် ATM ၊ လိက်အုပ်ဗာန် ကေုာံ သြန်တၞး ဗၞတ် (၂၄၀၀၀၀) ၝာတ်တံရောၚ်ဂှ် သ္ဂးရ။

မၞိဟ်ပန်တၠဏံ မဒးဒုၚ်ရပ်လဝ် ပ္ဍဲကဵုဒေသပေက်ပက် ဍုၚ်ကာမ္ဗောဒဳယျာဂှ်ဝွံ ဒဒှ်ရ ဒှ်ရဲကၠုၚ်နူကဵု ဂိုဏ်ကဝ်(လ်) သေန်တာလီဠာန် ကောန်ဂကောံ (၃၀) ပါလုပ်ဂှ်ရောၚ် ဒုသ္ကိုပ်ဗၠာဲသၟိၚ်ကောန်ဂကူ သူရာချိုက်ဟက်ကာမ် ဟီုဂးလဝ်ရ။

ဟိုတ်နူပြဝ ဂိုဏ်မၞိဟ်ပရေံပရေံတံဏံဂှ်တုဲ မၞိဟ်ဒးချိုတ်အာတံလေဝ် နွံလဝ်ရ။ စပ်ကဵုဂိုဏ်လီဠာန်မၞိဟ်ဏံဂှ်တုဲ ပ္ဍဲဂိတုအဝ်ဂါတ် (၂၈) တေံ မၞိဟ်တြုံမွဲတၠ ဟိုတ်နူခတှ်မဂၠိုၚ်ဂၠေၚ်တဂှ်တုဲ စဵုကဵုက္တဵုဗဒှ် ဂစိုတ်ထောံ သမ္ဘာညး အာယုက် (၄၄) သၞာံမၞုံဂှ်ကဵု ကောန်ၚာ် အာယုက်အကြာ (၉) သၞာံကဵု (၁၃) သၞာံ ၜါတၠတံဂှ်တုဲ ပရေၚ်သ္ဒးဂၠိုက်ဂဟောံမွဲ က္တဵုဒှ်လဝ်ရ။

မၞိဟ်တြုံ အာယုက် ၄၁ သၞာံမၞုံဂှ်ဝွံ သွက်ဂွံရာန်ကွဳစက် အရေၚ်မၞိဟ်မွဲတၠတုဲ စုတ်လဝ်လျိုၚ်တုဲ ဒှ်အာလဝ်ခတှ် သြန်ၝာတ်ဂၠိုၚ်ကဵုကိုဋ်ရ။ ညံၚ်အခက်အခုဲသြန်ညးတံ ဂွံပြေပြံၚ်ဂးတုဲ ညးမဒှ်သမ္ဘာဂှ် နူကဵုအာပ်ပလဳကေယှေန်ဂလေံလှုဲ ညးလီဠာန်တံဏံ မခၞံဗဒှ်လဝ်ဂှ်မွဲကဆံၚ် ဒးဒုၚ်လီဠာန်လဝ် သြန်ၝာတ် (၁ ဒဿမ ၇) ပြကောဋိကိုဋ်ရ။

ဟိုတ်နူပရေၚ်သြန်ဆောံလေၚ်သာ်ဏံတုဲ ညးမဒှ်တၠသ္ၚိဂှ် သွက်ဂွံဂစိုတ်ဇကုဇကုကီု သွက်ဂွံဂစိုတ်မၞိဟ်ဂှ် ဒှ်အာလဝ် ဇြဟတ်ဂရိုဟ်မွဲတုဲ ညးဂှ်တှ်ေ ၜိုန်ရဂျိုၚ်တဴလမျီု သှ်ေဒၟံၚ်ကီုလေဝ် ဒးပ္တိုန်လဝ်ရုၚ်ဂဥုဲ နကဵုဝပ်ၜုန် ပ္ဍဲကဵုကအ်ညး ပ္ဍဲကဵုကအ်တဲတံဂှ်ရ။

ပ္ဍဲကဵုကောန်ဂကောံ (၃၀) တၠ နူကဵုဂိုဏ်ကဝ်(လ်)သေန်တာလီဠာန်ဂှ် မ္ၚးနူပန်တၠဏံဂှ် (၁၆) တၠ ဒးဒုၚ်ရပ်ဒက်လဝ်တုဲ တၠအကံက်ဗာန် ပရံက်သဳတံ၊ ပူဂဵုမၞုံတာလျိုၚ် သွက်ဂွံပ္တိတ်သြန်တံ၊ မၞိဟ်ထိၚ်ဒက်လဝ် စရၚ်အကံက်ပရံက်သဳတံ၊ မၞိဟ်လီဠာန်တံကဵု မၞိဟ်ကောပ်ကာဲ နူကဵုဍုၚ်ကြုက်ပၟိက်ဇၞော်ၜါတၠတံ ပါလုပ်ဂှ် ထ္မံက်ထ္ၜးလဝ် ပ္ဍဲကဵုလိက်ပရိုၚ် Bangkok Post ရ။

မၞိဟ်သံသယနွံသှ်ေဒၟံၚ်တံဂှ် သၟိၚ်တၠအဝဵုတံ ဒဒှ်ရဗက်ဂၠိုက်ဂၠါဲဒၟံၚ်အိုတ်အစောန်ဂှ် သၞာဲဒဴဗၠာဲသၟိၚ်တံ ထပ်ဟီုဂးလဝ်ရ။

Ref: The Thaiger