ပ္ဍဲပွိုၚ်ဍုၚ်မုၚ် KNU ဂှ် လွဟ်လက်နက်ဇၞော်စှ်ေတုဲ မၞိဟ်ဗြဴမွဲတၠ ကလိဂွံဝပ်

မုၚ်၊ သေပ်တေမ်ဗာ (၁၃)

ဟိုတ်နူကဵု ဗ္ဒိုပ်ဒပ်ကံၚ်ဇြဳပၞာန်တံ ပန်ပှော်စုတ်လဝ် လွဟ်ဇၞော် အပ္ဍဲကွာန်မိချံၚ်ခံၚ် ပွိုၚ်ဍုၚ်မုၚ် ဒပ်မဟာ (၃) ၊ ခရိုၚ်ညံၚ်လေဝ်ပေန် ဗော်သွးကောန်ဂကူကရေၚ် KNU တံဂှ်တုဲ မၞိဟ်ဗြဴဒေသမွဲတၠ ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ်ရ။

တုဲကၠုၚ် ပ္ဍဲဂိတုသေပ်တေမ်ဗာ (၁၀) တေံ အခိၚ်ဇိုၚ်သဝ်တ္ၚဲ ၜိုတ် ၅ နာဍဳဂှ် နူကဵုဗ္ဒိုပ်ဗိုဝ်မတဳ ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်မုၚ်ဂှ် ဟိုတ်နူပန်ပှော်စုတ်လဝ် လွဟ်ဇၞော် အပ္ဍဲကွာန်မိချံၚ်ခံၚ်ဂှ်ရ ဒဝ်ခေန်သာန်ဝေန် အာယုက်မၞုံ ၆၁ သၞာံ ဒးမကမ်ကလိဂွံလဝ်ဝပ်ရ။

သ္အာၚ်နူဂှ်ပၠန် ပ္ဍဲဂိတုသေပ်တေမ်ဗာ ၈ တေံဂှ်လေဝ် ဒပ်ကံၚ်ဇြဳပၞာန် ကၠုၚ်ဂြာတ်လဝ်မခတိုဟ် ၂ မ နကဵုက္ၜၚ်ကျာဗ္တိုက်ဂျက် အပ္ဍဲကဵုကွာန်ထဝ်ယျေဒါ၊ ပွိုၚ်ဍုၚ်မုၚ် KNU တံဂှ်တုဲ ဒတုံဗ္တိုဟ်ထ္ကးအာလဝ် ပ္ဍဲကဵုဝါ မၞုံဗ္ဒါဲကွာန်ဂှ်ရ။

ဟိုတ်နူပရေၚ်ဗ္တိုက်ဂြာတ်ဗုမ်ဏံဂှ်တုဲ ပရေၚ်ဇီုကပိုက်လီုလာ်တံ ဟွံမွဲကီုလေဝ် ညးဍုၚ်ကွာန်ဒၟံၚ်ပ္ဍဲကွာန်ဂမၠိုၚ်ဝွံ ဒးဂျိုၚ်လမျီုမံၚ်တန်တဴဒၟံၚ် နကဵုဖေက်က်လကိုတ်တ်တံရောၚ်ဂှ် KNU သ္ဂးလဝ်ရ။

ဟိုတ်နူပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန် အပ္ဍဲကဵုခရိုၚ်ညံၚ်လေဝ်ပေန် KNU ဂှ်တုဲ ညးဍုၚ်ကွာန်ဒေသ ၜါကိုဋ်ပြၚ် ဒးဂြိပ်ဒဴပါဲဒလေတ်ဒၟံၚ်တုဲ သွက်ညးဍုၚ်ကွာန်ပါဲဒဴဘဲပၞာန်တံဂှ် နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး ဇာဇၞိက်အထံက်အရီုပရေၚ်ၜိုဟ်လလမ်ကရေၚ် (KPSN) ရ။

ပရိုၚ်−သြၚ်လောန်တိုၚ်(မ်)

ဗီု−KNU