ပရေၚ်ဒက်ပ္တန် BNRA ဗိုလ်နဂါက္ဍိုက်လဝ်က္ဍိုပ်ဂှ် တၚ်သဳကၠဳလဝ်တုပ်လဝ်စိုတ် လးလးဟၟဲပုဟ်ဂှ် NUG ဟီုပလန်

လဂုၚ်၊ သေပ်တေမ်ဗာ (၁၃)

လ္တူဒက်ပ္တန်လဝ် ဒပ်ပၞာန်ဗၠးၜးကောန်ဂကူဗၟာ (BNRA) ဗိုလ်နဂါက္ဍိုက်လဝ်က္ဍိုပ်ဂှ် သဳကၠဳပ္ညဳပ္ညပ် ဂွံလဝ်တၚ်တုပ် ကုညးတာလျိုၚ် အလဵုအသဳညဳသၟဟ်ကောန်ဂကူ (NUG) ဟၟဲလဝ်လးလးရဂှ် ရုၚ်သမ္မတ NUG လလလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၂)ရ။

အတိုၚ်တၚ်လလောၚ်တြး ညးမၞုံအခေါၚ်ဟီုဂး ရုၚ်သမ္မတ NUG လလောၚ်လဝ်မ္ဂး ဒုၚ်သ္ဇိုၚ်ကဵု ပရေၚ်သ္ပသ္ပစၟတ်သမ္တီက္ဍိုပ်သ္ကိုပ်တအ်ကီု ပရေၚ်စန်ပကောံ သွက်ပၠန်ဂတးဂှ်တုဲ သမ္မတဒူဝါလယှဳလကေုာံ ဝန်ဇၞော်ပရေၚ်စဵုဒၞာဥူယျဳမန်တအ် ဒုၚ်တဲ ဆဵုဂဗလဝ်ကဵု က္ဍိုပ်သ္ကိုပ်မျာန်မတဝ်ဝေန်နဂါတာတ်တဝ် (MRDA) ပ္ဍဲဂိတုမေ သၞာံဏံ စၟတ်တ္ၚဲ (၂) နူကဵု Zoom Meeting မွဲကဆံၚ်ရဂှ် ဓမံက်ထ္ၜးလဝ်ရ။

တၚ်ရန်တၟံဆဵုဂဗအဓိကဂှ်မ္ဂး ဌာနဝန်ဇၞော်ပရေၚ်စဵုဒၞာ ကေုာံ မဟာမိတ်တအ်ဂှ် သွက်ဂွံပါလုပ်ပ္ဍဲသၞောတ်ကောပ်ကာဲကဵုအမိၚ် (COC) ဗက်ကဵုဒေသတုဲ ဒက်ပ္တန်လဝ်ဂှ်ကီု အလဵုအသဳပရေၚ်ညဳသၟဟ်ကောန်ဂကူဂှ် သွက်ဂွံပံၚ်တောဲရေၚ်တၠုၚ်ကဵု ယန္တရာပရေၚ်အုပ်ဓုပ်၊ ပရေၚ်စဵုဒၞာ ဒက်ပ္တန်လဝ် ပ္ဍဲဗလးမုက်တိဂှ် လ္ပာ် NUG သောၚ်ကလးလဝ်ရ။

သ္အာၚ်နူဂှ်ပၠန် သွက်ဂွံဒုၚ်တဲပါလုပ် ပ္ဍဲအစဳဇန်ဆေၚ်စပ်ကဵုပရေၚ်ပြံၚ်သၠာဲ ကဏ္ဍပရေၚ်ဂီုကၠီု ဒးဓမံက်ရုပ်ရဴ အခိၚ်ကာလပၠန်ဂတးလောန် ဟီုဂးလဝ်ဇြိုဟ်ဟ်နက်က်ရဂှ် ဓမံက်လဝ်ပ္ဍဲတၚ်လလောၚ်တြးဂှ်ရ။

နကဵုသမ္မတယာယဳ ဒူဝါလယှဳလကေုာံ ဝန်ဇၞော်ကၟိန်ဍုၚ်ဥူယျဳမန် ဌာနဝန်ဇၞော်ပရေၚ်စဵုဒၞာဂှ် သ္အာၚ်နူတၚ်သဳကၠဳ ပါလုပ်ပ္ဍဲလ္တူဏံတုဲ တၚ်သဳကၠဳတၞဟ်သ္အာၚ်၊ တၚ်တုပ်စိုတ်မမိက်ကဵုမွဲမွဲ ဟၟဲလဝ်လးလးရဂှ် ရုၚ်သမ္မတ NUG က္လေင်ပလန်လဝ်တဲရ။

လ္တူတၚ်လလောၚ်တြး ရုၚ်သမ္မတ အလဵုအသဳညဳသၟဟ်ကောန်ဂကူ NUG လလောၚ်တြးလဝ်ဂှ် ဥက္ကဋ္ဌဒပ်ပၞာန်ပၠန်ဂတးကောန်ဂကူဗၟာ (BNRA) ဗိုလ်နဂါဂှ် ဟိုတ်နူဂွိၚ်ဖေက်ဒှ်အာ ဗီုပြၚ်ကယျာန်ဓဝါတ်တုဲ မုလေဝ် ဟွံမိက်ဟီုရကီု ဆက်တုဲပ္တိတ်အာဇြဟတ် သွက်ပၠန်ဂတးရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲကဵုရးသေတ်ဂါၚ် မၞုံသ္ကုတ်လဒေါဝ်ကၟိန်ဍုၚ် ပရေၚ်ပၞာန်သ္ကာတ်မြဟ်ဒၟံၚ်ဂှ် သၟာပၠန်ဂတးဗိုလ်နဂါ မဒှ်က္ဍိုပ်သ္ကိုပ် MRDA ဂှ် ဒဒှ်ရဒက်ပ္တန် ဒပ်ပၞာန်ပၠန်ဂတးကောန်ဂကူဗၟာ (BNRA) ဂှ် လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၉)ရ။

ပံၚ်တောဲကဵု ဒပ်စဵုဒၞာညးဍုၚ်ကွာန် ဖျေံသ္ဇိုၚ်ဒေသ ဟိုတ်နူဟိုတ်နာနာတုဲ ဟွံဂွံအခေါၚ်ပါလုပ် သၟဝ်သၞောတ်ကောပ်ကာဲကဵုပၟိၚ် (COC) ဌာနဝန်ဇၞော်ပရေၚ်စဵုဒၞာ NUG မပါလုပ် သီုတံဒပ် ဒပ် MRDA တအ်တုဲ ဒက်ပ္တန်လဝ် ဒပ်ပၞာန်ပၠန်ဂတးကောန်ဂကူဗၟာရဂှ် ဗိုလ်နဂါ ဟီုလဝ်ရ။

သ္အာၚ်နူဂှ်ပၠန် ပွမဒက်ပ္တန် (BNRA) ဂှ် ဒှ်ပ္တန်ပ္တဴ မွဲစၚ်တၞဟ်ပၠန်ဟွံသေၚ်တုဲ မ္ၚးနူသမ္မတ NUG ဒူဝါလယှဳလ၊ ဝန်ဇၞောန်ပရေၚ်စဵုဒၞာ ဥူယျဳမန်တအ်တုဲ ပ္ညဳပ္ညပ်သဳကၠဳလဝ် ကရောံညးတာလျိုၚ် ဌာနမဆေၚ်စပ်တအ်တုဲ ပံၚ်တောဲကၠောန်ရေၚ်တၠုၚ်အာ မွဲကရောံအလဵုအသဳ NUG၊ ဌာနဝန်ဇၞော်ပရေၚ်စဵုဒၞာရောၚ်ဂှ် ညးဟီုသ္ဂးလဝ်ရ။

လ္တူတၚ်ဗိုလ်နဂါဟီုဂးလဝ် ပ္ဍဲတ္ၚဲဒက်ပ္တန် ဒပ်ပၞာန်ပၠန်ဂတးကောန်ဂကူဗၟာ (BNRA) ပ္ဍဲဂိတုသေပ်တေမ်ဗာ စၟတ်တ္ၚဲ (၉)ဂှ် နူကဵုလ္ပာ်ရုၚ်သမ္မတ အလဵုအသဳညဳသၟဟ်ကောန်ဂကူ (NUG) ​လလောၚ်တြးကၠုၚ်လဝ် တၚ်လလောၚ်တြး သာ်ဏံရ။

ပရိုၚ် – သြၚ်လောန်တိုၚ်(မ်)

​ဗီုရုပ် – BNRA