ကၠောန်ဗဒှ်အခန်ကၞာ PDF အေန်လေဝ် ပေၚ် (၁) သၞာံ

အေန်လေဝ် – သေပ်တေမ်ဗာ(၁၃)

အလဵုအသဳညဳသၟဟ်ကောန်ဂကူ၊ ဌာနဝန်ဇၞော်ပရေၚ်စဵုဒၞာ တွဵုရးသေံသၠုၚ်ကျာ၊ ရးဒေသပၞာန်သ္ကုတ်လဒေါဝ် (၃)၊ တံဒပ်စဵုဒၞာညးဍုၚ်ကွာန် (၁၀၀၉) ကၠောန်ဗဒှ်လဝ် အခန်ကၞာစၟတ်သမ္တီ တ္ၚဲပေၚ် (၁)သၞာံရဂှ် Inle People Defense Force – IPDF လလောၚ်တြး ပ္တိတ်လဝ်ပရိုၚ်ရ။

မွဲကရောံအခန်ကၞာ Inle People Defense Force – IPDF ပေၚ်သၞာံဂှ် ပေါဲစှ်ေဘာပၞာန် လၟေၚ် ၅/၂၀၂၃ ဂှ်လေဝ် ကၠောန်ဗဒှ်လဝ်ရဂှ် ဂွံတီကေတ်ရ။

တံဒပ် (၁၀၀၉) ဒပ်ပၞာန်စဵုဒၞာညးဍုၚ်ကွာန်အေန်လေဝ် ကေုာံ အခန်ကၞာပေၚ်သၞာံဂှ် မွဲကရောံကဵု သ္ဂံၚ်မၞုံတံဒပ်ကြဴမုက်ပၞာန်၊ သ္ဂံၚ်ဗြဴ၊ ကွးဘာပၞာန်တအ်၊ တံဒပ်မဟာမိတ်ကောဒေံတအ်ဂှ် ညးတာလျိုၚ်တအ် ကၠောန်ဗဒှ်လဝ် ဗွဲခမ္ဍန်ရ။

ပ္ဍဲအခန်ကၞာဂှ် ဗှ်လၟိၚ်လဝ် လိက်သဝဏ် ဌာနဝန်ဇၞော်ပရေၚ်စဵုဒၞာ၊ အလဵုအသဳညဳသၟဟ်ကောန်ဂကူပလံၚ်ဗစိုပ်လဝ်ကီု၊ လဴထ္ၜးလဝ် ဝၚ်တံဒပ် (၁၀၀၈)အေန်လေဝ် ဗီုမံက်တိတ်ကၠုၚ်လဝ်ကီု၊ ပါ်ပရအ်ကဵုလဝ် ပရေၚ်ဆဵုဂဗပေါဲဗတိုက်ကီု သွက်ပၞာန်ဒစဵုဒစးပၠန်ဂတးညးဍုၚ်ကွာန် ဂွံကေတ်ဇြဟတ် ဆက်အာဂတတေံဂှ် ဟီုလဝ်ဂလာန်ကဵုဇြဟတ်ရဂှ် ဓမံက်ထ္ၜးလဝ်ရ။

ပ္ဍဲပွိုၚ် (၁)သၞာံ သ္ဂံၚ်နူတံဒပ် (၁၀၀၉)လာဘ် စေဝ်ပၞောန်ဍိုက်ပေၚ်၊ မွဲကရောံကဵုလာဘ်က္လၚ်အမိၚ်ဂှ် ပရေၚ်ရေၚ်တၠုၚ်ပ္တိတ်ဇြဟတ် ကောန်တန်ဗ္တောန်တၟိတအ် ပ္တိတ်လဝ်ဇြဟတ် မွဲကာလအခိၚ်တန်ဗ္တောန်ဂှ် ဗက်ကဵုလၟေၚ်စေဝ်ပၞောန်ကဵုစၟတ်တုဲ ဖျေံကဵုလဝ်လာဘ်ရဂှ် ဂွံတီကေတ်ရ။

သ္အာၚ်နူဂှ်ပၠန် သ္ဂံၚ် CDM ဒပ်ပၞာန်ကျာ စိုပ်ဒၟံၚ်ပ္ဍဲကဵုတံဒပ်စဵုဒၞာညးဍုၚ်ကွာန်အေန်လေဝ်ဂှ် အပ်ပြာပ်ကဵုလဝ် စၟတ်သမ္တီအာဇာနဲပ္တိုန်ဂုဏ်စရာဲ ပၞာန်ဒစဵုဒစးပၠန်ဂတး ပေၚ်(၂)သၞာံ နူကဵု MOD ပလံၚ်ဗစိုပ်ကဵုလဝ်ဂှ်လေဝ် ဓမံက်ထ္ၜးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – IPDF