ကျာ်ထဝ်၊ သေပ်တေမ်ဗာ(၁၃)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ဍုၚ်တုၚ်ဇြယာတ်၊ သ္ၚိဒၟံၚ်သ္ဂံၚ် ဒပ်စဵုဒၞာညးဍုၚ်ကွာန် PDF မွဲတၠ မၞုံအရာပ် စၟတ်(၃)ဂှ် နူကံၚ်ဇြဳပၞာန် ကၠုၚ်ကၟာတ်ဒၞာဏာလဝ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဒပ်ကံၚ်ဇြဳပၞာန်၊ ဗၠာဲသၟိၚ်ကေုာံ ညးလုပ်ဂကောံအုပ်ဓုပ်တအ်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၁)အခိၚ်ဒေါဝ်တ္ၚဲဂှ် နကဵုတၚ်စောတ်စောဲ နသၞောဝ်ဥပဒေဗတိုက်သရိုဟ်ပွပ္ကီုပရာပ် ကၠုၚ်ကၟာတ်ဒၞာဏာလဝ် သ္ၚိဒၟံၚ်ဥူသာန်ယျ သ္ဂံၚ် PDF ရ။
ဥူသာန်ယျ ဒးဒုၚ်ကၟာတ်ဒၞာလဝ်သ္ၚိဒၟံၚ်ဂှ် ဒှ်ကောန်ဗော်ဒဳမဝ်ကရေဇြဳကောန်ဂကူ NLD ဍုၚ်တုၚ်ဇြယာတ်မွဲတၠတုဲ ကြဴနူဒပ်ပၞာန်သီအဝဵုတုဲ ဟိုတ်နူဒပ်ပၞာန်ကၠောန်သ္ပကၠုၚ် ပရေၚ်ဗတိုက်သရိုဟ်ဗွဲပ္ကီုပရာပ်တုဲ ရုဲစှ်ကၠုၚ်လဝ် ဂၠံၚ်တရဴရပ်လွဟ်ရ။
ဥူသာန်ယျဂှ်မ္ဂး ကံၚ်ဇြဳပၞာန် ပံက်လဝ်ဂဗုတ် နကဵုသၞောဝ်ဥပဒေဗတိုက်သရိုဟ်ပွပ္ကီုပရာပ် မ္ၚးနူဒဏ်ထံၚ်မွဲအယုက်တုဲ စဵုကဵုဂစိုတ် ဖျေံမာန်ဒၟံၚ်ရ။
ၜိုန်သ္ၚိဒၟံၚ်သ္ဂံၚ်ပၠန်ဂတးတအ် ဒးဒုၚ်ကၟာတ်ဒၞာကၠုၚ်ဒၟံၚ် အဆက်က်ကီုလေဝ် သွက်တၠအဝဵုပၞာန် ဂွံဒေါံကၟိုၚ်စှ်ေဂှ် ဆက်လုပ်အာပေါဲဗတိုက် မွဲကရောံမွဲစွံရောၚ်ဂှ် ညးတာလျိုၚ် PDF ပွိုၚ်ဍုၚ်ကျာ်ထဝ်မွဲတၠဂှ် ဟီုရ။
ကံၚ်ဇြဳပၞာန်ဂှ် ပ္ဍဲဂိတုအဝ်ဂါတ် တုဲကၠုၚ်တေံလေဝ် သ္ၚိဒၟံၚ်ကိုဝ်ယျေဝ်တွေညဳ၊ ကိုဝ်ယာန်ယှေန် မဒှ်ကောန်ဒပ် PDF ပွိုၚ်ဍုၚ်ကျာ်ထဝ်တအ်ဂှ်လေဝ် ကၠုၚ်ကၟာတ်ဒၞာလဝ်ရ။
ပွိုၚ်ဍုၚ်ကျာ်ထဝ်ဂှ် ပ္ဍဲမွဲကာလဒပ်ပၞာန်သီအဝဵုဏံ ပါလုပ်သီုသ္ၚိဒၟံၚ် ညးစၞးကၠတ်ထဝ် ဗော် NLD တအ် သ္ၚိဒၟံၚ် ကေုာံပရေၚ်ပိုၚ်ပြဳ ညးပါလုပ်ချဳဒရာၚ်ကတိုၚ်ကၟဟ်တအ်၊ ကောန်ဒပ် PDF တအ် ကၟာတ်ဒၞာလဝ် ဟွံအောန်နူ ၁၅ မနွံရ။
ပရိုၚ် – သြၚ်လောန်တိုၚ်(မ်)
ဗီုရုပ် – SBM
sanlontai