သၞေဟ်ကၚ်စၟဳတ်ထဝါဲ ဒးဒုၚ်ဗ္တိုက်တုဲ ကောန်ဂကောံဒပ်ကံၚ်ဇြဳပၞာန် ၂ တၠ ချိုတ်အာ

ထဝါဲ၊ သေပ်တေမ်ဗာ (၁၃)

ဟိုတ်နူသၞေဟ်ကၚ်စၟဳတ်ဖယျာမေဝ် ကံၚ်ဇြဳပၞာန် မၞုံဗ္ဒါဲကွာန်မံၚ်မေဝ်၊ ပွိုၚ်ဍုၚ်ထဝါဲ၊ ရးဒေသဇၞော်တၞၚ်သဳတံ ဒးဒုၚ်ဗ္တိုက်ဂှ်တုဲ ကောန်ဒပ်ကံၚ်ဇြဳပၞာန် ၂ တၠ ချိုတ်အာလဝ်ရောၚ် ဂကောံဒပ်ပၠန်ဂတးဒပ်ဒမၠုက်ထဝါဲ (DGRF) တံ လလောၚ်ပ္တိတ်လဝ်ရ။

ပ္ဍဲဂိတုသေပ်တေမ်ဗာ (၁၁) အခိၚ်လဒေါဝ်တ္ၚဲ ၜိုတ် (၂) နာဍဳဂှ် ဂကောံဒပ်ပံၚ်ကောံဂကောံဇြဟတ်ပၠန်ဂတးတံ ပန်ပှော်ဗ္တိုက်လဝ် သၞေဟ်ကၚ်စၟဳတ်ဖယျာမေဝ် ဒၞါဲဂကောံဒပ်ဗၠာဲသၟိၚ်၊ ဒပ်ကံၚ်ဇြဳပၞာန်တံ မဖျေံဒၟံၚ်ဒပ်ဂှ် သီုကဵုသနာ်ပါ သီုကဵုလွဟ်ဇၞော်တံရ။

အပ္ဍဲကဵုပရေၚ်ပန်ပှော် ကဵုသနာ်ပါဂှ် ကောန်ဂကောံဒပ်ကံၚ်ဇြဳပၞာန် ၂ တၠဝွံ ချိုတ်အာလဝ် ပ္ဍဲကဵုဒၞါဲဒှ်ပရူတံဂှ်ရောၚ်ဂှ် ညးဒုၚ်တာလျိုၚ်လလောၚ်ပရိုၚ် ဂကောံဒပ်ပၠန်ဂတးဒပ်ဒမၠုက် (DGRF) တံ ဟီုဂးလဝ်ကဵု ဌာန်ပရိုၚ်သြၚ်လောန်တိုၚ်(မ်) ရ။

ကြဴနူပရေၚ်ပန်ပှော်ဂှ်တုဲ အခိၚ်ကောန်ဂကောံဒပ်စဵုဒၞါညးဍုၚ်ကွာန်တံ ကလေၚ်ဆုတ်ကၠုၚ်ဂှ် သၞေဟ်ကၚ်စၟဳတ်တံလေဝ် ကလေၚ်ပန်ပှော်လဝ်ကဵု နကဵုလွဟ်ဇၞော်၊ လွဟ်ဍောတ်တံဂှ်ကီုလေဝ် ဇီုကပိုက်ဒးဟွံမွဲပုဟ်ဂှ် သ္ဂးရ။

သၞေဟ်ကၚ်စၟဳတ်ဖယျာမေဝ်ဂှ်ဝွံ ဟိုတ်နူကံက်ဒၟံၚ်လှုဲ နူကဵုညးဍုၚ်ကွာန်အာတရဴတံကီု၊ ဟိုတ်နူရပ်ဒက်ဒၟံၚ် ညးဍုၚ်ကွာန်ဒေသတံဂှ်တုဲ ဒယှ်ဒၟံၚ် နကဵုယၟုပရေံပရေံရ။

ပ္ဍဲဂိတုသေပ်တေမ်ဗာဏံ ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ကၠုၚ်စိုပ်ဗ္တိုက်လဝ် သၞေဟ်ကၚ်စၟဳတ်ဖယျာမေဝ်တံ စဵုကဵုပိဝါတုဲ လ္ပာ်ကံၚ်ဇြဳပၞာန် ဒးဂိဒၟံၚ်ရ။

ပရိုၚ်−သြၚ်လောန်တိုၚ်(မ်)

ဗီု−DGRF