မေဝ်သေအ်၊ သေပ်တေမ်ဗာ (၁၃)
သၟိၚ်တၠအဝဵုသေံတံ ကလေၚ်ပလံၚ်ဖျဴဒၟံၚ် ညးဒေသပါဲဒဴဘဲပၞာန် ပွိုၚ်ဍုၚ်မေဝ်သေအ် တွဵုရးကရေၚ်ဍာဲ မ္ဒးဂြိပ်ဒဴစ္ၜုဲစ္ၜော်ဒၟံၚ် ပ္ဍဲဍုၚ်သေံ ဒၟါနူပေါဲဗ္တိုက်တံဂှ် ညးမရီုဗၚ်ကဵုဒၟံၚ် ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် အပ္ဍဲဂိတုဂျောန်တေံ ဟိုတ်နူပေါဲဗ္တိုက် ဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးကရေၚ်ဍာဲတံတုဲ ညးဒေသ ပွိုၚ်ဍုၚ်မေဝ်သေအ် ၅၀၀၀ ပြၚ်ဝွံ ဒးဂြိပ်ဒဴပါဲဒလေတ်လဝ် ပ္ဍဲခရိုၚ်မေဝ်ဟံၚ်သံၚ်၊ ဍုၚ်သေံရ။
ပ္ဍဲကဵုဏံ ညးဍုၚ်ကွာန်ပါဲဒဴဘဲပၞာန် ၆၀၀၀ ပြၚ်ဂှ် အပ္ဍဲဂိတုသေပ်တေမ်ဗာ သတ္တာဟပထမဂှ် သၟိၚ်တၠအဝဵုသေံတံ ကလေၚ်ပလံၚ်ဖျဴကၠုၚ်ဌာန်ဒၟံၚ် အလန်ပထမကိုပ်ကၠာအိုတ်ရ။
ညးဍုၚ်ကွာန်ပါဲဒဴဘဲပၞာန် မ္ဒးပလံၚ်ဖျဴဌာန်ဒၟံၚ် ဗွဲမဂၠိုၚ်ဂှ်ဝွံ ဟိုတ်နူဇြဟတ်ဂရိုဟ် သၟိၚ်တၠအဝဵုသေံတံတုဲ ဒးစဴကၠုၚ်လဝ်ဌာန်ဒၟံၚ်တံအိုတ်တုဲ ဗၞတ်ဗ္ၜတ်ညိညဓဝ်ရ ကလေၚ်စဴကၠုၚ် အတိုၚ်ဆန္ဒဇကုတံရောၚ် မဒှ်ရ။
ဥူဗညာ ညးအုပ်ကာ (၂) ကံၚ်ဇြဳအုပ်ဓုပ်ကာလအကြာ တွဵုရးကရေၚ်ဂှ် ပ္ဍဲကဵုညးဍုၚ်ကွာန်ပါဲဒဴဘဲပၞာန် သၟိၚ်တၠအဝဵုသေံတံ ကလေၚ်ပလံၚ်ဖျဴဂမၠိုၚ်ဂှ် မၞိဟ်အယဲလဒေါဝ်တံ ပါလုပ်ဂၠိုၚ်အိုတ်ရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍုၚ်သေံဂှ်တှ်ေ ဂကောံနူကဵုမေဝ်သေအ်တံဂှ် ကဵုစဴမေဝ်သေအ်။ အေဂှ်တှ်ေ ညးတံဂှ် အတိုၚ်ကတိညးတံဂှ် ပေါဲဗ္တိုက်ညိၚ်ဒၟံၚ်ညိညတုဲ စဴဂွံရ။ ဒးဟီုတပ်ပ်မ္ဂး ဗၠာဲဗၠာဲတံဂှ် ကဵုက္ဍိုပ်တုဲ မၞိဟ်တြုံတံဂှ် ကဵုက္ဍိုပ် ကဵုစဴဒၟံၚ်တံ နွံရ။ ဟိုတ်ဂှ်ရ မၞိဟ်တြုံဂမၠိုၚ် ကလေၚ်စိုပ်ကၠုၚ်ရ။ တုဲမှ ကဵုညးဗြဴတံ၊ ကောန်ၚာ်တံစဴ “ သာ်ဝွံ သ္ဂးရ။
ညးဍုၚ်ကွာန်ပါဲဒဴဘဲပၞာန် ကလေၚ်စဴကၠုၚ်ဌာန်ဒၟံၚ်ဂမၠိုၚ်ဝွံ ဒဵုကဵုအခိၚ်လၟုဟ် ကလေၚ်စဴအာ ဇရေၚ်ဒေသတမ်မူလတံဂှ် ဟွံမွဲတုဲ မၚ်ရံၚ်ဒၟံၚ်အကာဲအရာ ပ္ဍဲကဵုဗ္ဒိုပ်ပါဲဒဴဘဲပၞာန်မေဝ်သေအ် မၞုံပ္ဍဲပယျဵုတွဵုရးကရေၚ်ဍာဲ−ဍုၚ်သေံတံဂှ်တုဲ ဆက်မံၚ်ဒၟံၚ်ရောၚ် ဂွံတီကေတ်ရ။
ပ္ဍဲကဵုဗ္ဒိုပ်ပါဲဒဴဘဲပၞာန်မေဝ်သေအ်ဂှ် ဟိုတ်နူညးဍုၚ်ကွာန်ပါဲဒဴဘဲပၞာန်တံ ထပ်ဂၠိုၚ်ကၠုၚ်ဂှ်ရ ၚုဟ်ဖျာ သၠုၚ်တိုန်ဒၟံၚ် ဂၠိုၚ်ကဵုဆတုဲ ဇွောံမစၞစသ္ဇိုၚ်တံ ပိုတ်အိုတ်အာဂှ် ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဂွိၚ်ဒၟံၚ်အိုတ်ရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ သွက်ဂွံကလေၚ်သီ ဗ္ဒိုပ်မေဝ်သေအ် မ္ဒးဗလးလဝ်တဲဂှ် မ္ၚးနူကရောၚ်ပၞာန်ဗလးတိတံဂှ် ပရေၚ်ဗ္တိုက်တရဴကျာတံလေဝ် ဟိုတ်နူကၠောန်ဒၟံၚ်ဟွံပိုတ်သ္ကုတ်ဂှ်ရ ပရေၚ်ဂွိၚ်ဂွါဲ ပ္ဍဲညးဍုၚ်ကွာန်ပါဲဒဴဘဲပၞာန်တံဂှ် သၠုၚ်တိုန်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−Thai PBS
sanlontai