ပ္ဍဲစရၚ်ဍုၚ် ကဏ္ဍပရေၚ်ပညာဒးဒုၚ်ဗ္တိုက်ဂၠိုၚ်အိုတ်တံဂှ် ဍုၚ်ဗၟာပါလုပ်ကၠုၚ် 

နေဗျဳဒဝ်၊ သေပ်တေမ်ဗာ(၁၃)

 ပ္ဍဲလက်ထက်ကံၚ်ဇြဳပၞာန် ပ္ဍဲစရၚ်ဍုၚ် ကဏ္ဍပရေၚ်ပညာဒးဒုၚ်ဗ္တိုက်ဂၠိုၚ်အိုတ် အလုံမွဲဂၠးကဝ်ဂှ် ဍုၚ်ဗၟာပါလုပ်ကၠုၚ်ရဂှ် ဂွံတီကေတ် အတိုၚ်တၚ်လလောၚ်တြး ဂကောံမၚ်ရံၚ်ပရေၚ်ပညာဍုၚ်နာနာ (GCPEA)ရ။ 

ပရေၚ်ကဏ္ဍပရေၚ်ပညာဒးဒုၚ်ဗ္တိုက်တံဂှ် တုဲကၠုၚ်ပ္ဍဲသၞာံ ၂၀၂၂ဂှ် ပ္ဍဲဍုၚ်ယူကရုၚ်၊ ဍုၚ်ဗၟာကေုာံ ဍုၚ်ဘာကဳနာဖာသဵု (၃)ဍုၚ်တံဂှ် က္တဵုဒှ်လဝ် ဂၠိုၚ်အိုတ်ရဂှ် ထ္မံက်ထ္ၜးပါလုပ်မံၚ် ပ္ဍဲတၚ်လလောၚ်တြး တ္ၚဲစဵုဒၞါပရေၚ်ပညာဂၠးကဝ် မကၠုၚ်စိုပ်ပ္ဍဲဂိတုသေပ်တေမ်ဗာ စၟတ်တ္ၚဲ(၉)ဂှ်ရ။ 

ပ္ဍဲသၞာံတုဲကၠုၚ်တေံဂှ် အလုံမွဲဂၠးကဝ် လၟေၚ်ဒဒှ်ကဏ္ဍပရေၚ်ပညာဒးဒုၚ်ဗ္တိုက်တံ ၃၀၀၀ ပြၚ်နွံလဝ်တုဲ ပ္ဍဲကဵုဂှ် ကွးဘာတံကဵု အ္စာ၊အ္စာၝောံအပံၚ် ၆၇၀၀ ပြၚ် ဒးဒုၚ်ရပ်ဒက်၊ က္လိဂွံဝပ်တံကဵု ဒးဒုၚ်ဂစိုတ်ဂယိုၚ်တံ နွံလဝ်ရောၚ်ဂှ် သ္ဂးလဝ်ရ။

 သ္အာၚ်နူဂှ်ပၠန် ဂကောံရပ်လွဟ်အလဵုသဳတံကီု၊ ဂကောံရပ်လွဟ်အလဵုသဳဟွံသေၚ်တံကီုဂှ် ပွစွံပွန်ဗ္တိုက်လ္တူဘာဗ္တောန်လိက်တံ နွံမံၚ်တုဲ နကဵုပရေၚ်ဗ္တိုက်ဏံဂှ် လၟေၚ်ဒဒှ်အပံၚ် နွံမံၚ် ၅၀၀ ပြၚ်ရဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။ 

အ္စာဗြဴCDM မွဲတၠဂှ်တှ်ေ နူကဵုကံၚ်ဇြဳပၞာန်တံ ပွစွံပွန်ဗ္တိုက်ကၠုၚ်လ္တူပရေၚ်ပညာတံဂှ် ဂွံဆဵုကေတ်မံၚ်တုဲ ပရေၚ်ပညာဂှ် ဒးဒုၚ်ဍဵုဍိုက်မံၚ်ပရေံအိုတ်ရဂှ် ပါ်ပါဲလဝ်ရ။ 

“ကဵုက္ၜၚ်ကျာကီုဒှ်၊ ထ္ပက်ကရောၚ်ပၞာန်နူကဵုဗလးတိဏံကီုဒှ်၊ ဇၟာပ်ကွာန်ဍေံတံလုပ်အာဂှ်တှ်ေ တၚ်ပ္တဝ်က္ဍိုပ်အဓိကတံဂှ် စွံလဝ်ပွန်လ္တူဘာဗ္တောန်လိက်တံတုဲ စံၚ်ဘာဗ္တောန်လိက်တံဏောၚ်၊ ပန်ဏောၚ်။ ပွိုၚ်ဍုၚ်ပိုဲဏံဂှ် သီုကဵုဒှ်ပွိုၚ်ဍုၚ်အ္စာ၊ အ္စာၝောံတံ ဒးဒုၚ်ရပ်ဂၠိုၚ်အိုတ်မွဲရ။ ပွရပ်ဒက်တုဲ ဂစိုတ်ဂယိုၚ်တံလေဝ် နွံမံၚ်ရ။ ပိုဲဂှ်တှ်ေ ရန်တၟံလဝ် ကောန်ၚာ်တံဂှ် ညံၚ်ဂွံဒှ်တၠပညာရ။ သွက်ကၟိန်ဍုၚ်လေဝ်ဂွံပဓါန်စ။ တၚ်ပ္တဝ်က္ဍိုပ်ဍေံတံဂှ် တၠပညာတံဏံ ဟၟဲမ္ဂး ဍေံတံရဆက်တုဲ အုပ်ဓုပ်ဏောၚ်။ နကဵုဗီုပြၚ် ဍေံတံဒုၚ်တဲ ကုတၞောဝ်ဒတောဝ်မတိုန်ကၠုၚ်တၟိတံ ဟွံမာန်ဂှ် နူကဵုအခိၚ်လၟုဟ်ဂှ် ဍဵုလဝ်တၠပညာတံရ ခယျကေတ်ဗီုပြၚ်ဏံရ။ ဒှ်မံၚ်ဗီုပြၚ် ဍေံတံရအုပ်ဓုပ်ဏောၚ်၊ ဍေံတံရက္ဍိုက်က္ဍိုပ်ဏောၚ် မဒှ်ရ” သာ်ဝွံသ္ဂးရ။ 

သ္အာၚ်နူဂှ်ပၠန် ရံၚ်အာအကာဲအရာဗလးတိပြဟ်ဟ်ဏံဏောၚ်မ္ဂးလေဝ် ဟိုတ်နူကံၚ်ဇြဳပၞာန်တံ ကၠောန်မံၚ် ပွဗ္တိုက်တရဴကျာတံ၊ ပွပန်ပှော်လွဟ်ဇၞော်တံ၊ ပွထ္ပက်ကရောၚ်ပၞာန်ပ္ဍဲဒေသတံ အဆက်က်ဂှ်ရ မပ္တံသွက်ဂွံကတ်ပညာဂှ် ဒးဒှ်မံၚ်အခက်အခုဲရဂှ် ညးဆက်ဟီုရ။ 

အ္စာဘာ CDM မွဲတၠဂှ်လေဝ် ဟိုတ်နူပရေၚ်ဗ္တိုက်ကံၚ်ဇြဳပၞာန်တံတုဲ စိုပ်ကၠုၚ်အကာဲအရာ ပံက်ဘာဟွံမာန်လးလးတံတုဲ အနာဂတ်ကောန်ၚာ်သၟတ် အယဲတိုန်ဘာတံ ကၠေံကၠုၚ်ရဂှ် ဟီုရ။ 

“ဒးဒုၚ်ဗ္တိုက်မံၚ်ဗီုဏံသိုက်က် သိုက်က်ဏောၚ်ဟီုတှ်ေ ဘာတံပံက်ဟွံမာန်လးလးရပုဟ်။ လ္တူဍုၚ်တံကီု သီုပ္ဍဲရးတံကီုရ။ တုဲပၠန် အ္စာၝောံဂအုပ်ဘာတံ၊ အ္စာ၊အ္စာၝောံသ္ပCDMတံဂှ် ဂကောံပၞာန်တံရပ်လဝ် ဗွဲမဂၠိုၚ်ရ။ ဂၠံၚ်တရဴအနာဂတ်ကောန်ၚာ်သၟတ်တံ ကၠေံအာရဒှ်။ ပ္ဍဲကောန်ၚာ်တံဂှ် စိုတ်ဒးဒုၚ်စသိုၚ်လေဝ်ဒှ်၊ ဂွံဆက်တိုန်ဘာလေဝ်ဟွံဒှ်။ ပရေၚ်ပညာကီု၊ စိုတ်ကီုဂှ် ဇီုကပိုက်ဒးရ။ ပွကမၠောန်ကံၚ်ဇြဳပၞာန်တံဂှ် ပရေံတဴကွေံကွေံရ။ ဒှ်ဒဒိုက်ကွေံကွေံရ။ မိမတံဂှ်လေဝ် မုလေဝ်သ္ပဟွံမာန်တုဲ ဒှ်မံၚ်ဘဝ ဒးဗဵုမံၚ်အတိုၚ်ဏံရ။ ပွကမၠောန်ကံၚ်ဇြဳပၞာန်တံဂှ် ဟွံတုပ်ကဵုမၞိဟ်ပုဟ်ဂှ် ဒးဟီုစရ။ ပရေၚ်ဗ္စာရဏာပရေၚ်မၞိဟ်ဟၟဲ ဗီုလဵုဂွံဟီုရောတှ်ေ စိုပ်ကၠုၚ်ဘဝ ဟွံဗ္စာရဏာ ကောန်ဇာတ်ရေၚ်သ္ကအ်ရ” သာ်ဝွံ သ္ဂးရ။ 

အတိုၚ်တၚ်နၚ် ဂကောံအခေါၚ်အရာမၞိဟ်ကရေၚ် KHRG ဂှ်မ္ဂး ပ္ဍဲကာလဒပ်ပၞာန်သီအဝဵု ပ္ဍဲဒေသသ္ကုတ်အဂၞဲဍုၚ်ဗၟာတံဂှ် ပွဗ္တိုက်ပကီုပရာပ် ကံၚ်ဇြဳပၞာန် လ္တူဘာဗ္တောန်လိက်တံ နွံမံၚ်လ္တူ ၂၄ ဝါတုဲ စမြိုၚ်ဘာဗ္တောန်လိက် ၃၇ မပြၚ် လီုလာ်ဆောံလေၚ်အာလဝ် ပေၚ်ၚ်ရဂှ် လလောၚ်ပ္တိတ်လဝ်ရ။ 

သ္အာၚ်နူဂှ်ပၠန် ပွဗ္တိုက်ပကီုပရာပ် ဂကောံပၞာန် လ္တူပရေၚ်ပညာတံဂှ် မွဲသၞာံတုဲမွဲသၞာံဂၠိုၚ်တိုန်မံၚ်ဂှ် ဂွံဆဵုကေတ်မံၚ်တုဲ နကဵုဗျူဟာပရေၚ်ပၞာန်မွဲဂှ် ကုပွကမၠောန် စွံပွန်ဗ္တိုက်လ္တူဘာဗ္တောန်လိက်တံဂှ် ပျုတ်ဗ္ဒေက်ဗွဲမသ္ကာတ်မြဟ်ရောၚ် KHRG သ္ဂးလဝ်ရ။

 ၜိုန်ရကဏ္ဍပရေၚ်ပညာဒးဒုၚ်ဍဵုဓလိုက်မံၚ်ကီုလေဝ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော်မေန်အံၚ်လှာၚ်ဂှ် ဖအောန်ဖျေံပရေၚ်ဒိုက်ဝါတ်တံတုဲ သွက်ဘဝပိုန်ဒြပ်ပရေၚ်မၞိဟ်တံ ဂွံတဴတက်ဂှ် ပ္ဍဲရးတံကဵု ဒေသတၞုၚ်ကၞောတ်တံဂှ် သွက်ဂွံကၠောန်သ္ပညံၚ်ဂွံလေပ်လိက်အိုတ်ညိဂှ် တြးဝါဒဖ္တိုက်ဖ္အောဝ်မံၚ်ရ။

 အတိုၚ်တၚ်လလောၚ်တြး ဂကောံမၚ်ရံၚ် ကဏ္ဍပရေၚ်ပညာ (ECW)ဂှ်မ္ဂး ကောန်ၚာ်သၟတ် နူဍုၚ်ဗၟာ ၁၇ ပြကောဋိကိုတ်တံဂှ် ဟိုတ်နူပဋိပက္ခရပ်လွဟ် က္တဵုဒှ်ကၠုၚ် ဟိုတ်နူသီအဝဵုတုဲ ဒးဆောံလေၚ်မံၚ် အခေါၚ်ဗ္တောန်ပညာတံရောၚ်ဂှ် လလောၚ်ပ္တိတ်လဝ်ရ။ 

ပရိုၚ်-သြၚ်လောန်တိုၚ်မ်

 ဗီု-KHRG