ဖဏံဖေန်၊ သေပ်တေမ်ဗာ (၁၃)
သ္ကိုပ်ဝန်ဇၞော်ကာမ္ဗောဒဳယျာ ဟောန်မာနက်ဝွံ အပ္ဍဲသတ္တာဟဏံ သွက်ဂွံအာစိုပ်ဍုၚ်ကြုက်နွံတုဲ ဆဵုဂဗအာကဵု သမ္မတယှဳကျေန်ဖျေန်ဏောၚ်ဂှ် ဝန်ဇၞော်ကာဍုၚ်သ္အာၚ်ကြုက် ဟီုဂးလဝ် ပ္ဍဲတ္ၚဲစန်ဂှ်ရ။
အတိုၚ်ပရေၚ်ကော်ဘိက် ပူဂဵုကဆံၚ်သၠုၚ် လဳကျဳယာန်ဂှ်မ္ဂး သ္ကိုပ်ဝန်ဇၞော်ကာမ္ဗောဒဳယျာဂှ်ဝွံ ပ္ဍဲဂိတုသေပ်တေမ်ဗာ နူကဵု ၁၄ စဵုကဵု ၁၆ ဂှ် ကၠုၚ်စိုပ် နကဵုတရဴဂေတ်ဝေၚ်ဗွဲမလုပ်သၞောဝ်ရောၚ်ဂှ် ညးမၞုံအခေါၚ်ဟီုဂး ဝန်ဇၞော်ကာစဵုဒၞါဍုၚ်ကြုက် ဟီုရ။
မေဿတာဟောန်မာနက်ဝွံ အပ္ဍဲလၟေၚ်တရဴကြုက်ဂှ် ဆဵုဂဗအာကဵု ပူဂဵုကဆံၚ်သၠုၚ်ကြုက် လဳကျဳယာန်၊ ကောန်ကမ္မတဳလၟိုန် ဥက္ကဌ ဇြိုဝ်လဳဂျဳတံရောၚ်ဂှ် ဂွံတီကေတ်ရ။
အလဵုအသဳဖဏံဖေန်ဝွံ ပ္ဍဲကဵုသၟဝ်တဲသ္ကိုပ်ဝန်ဇၞော် ဟောန်သာန်ဂှ် ပၞောဝ်ကဵုမဟာမိတ်ကြုက်ခိုဟ်အိုတ်ဂမၠိုၚ်ဂှ် ဒှ်ကၠုၚ်မွဲတုဲ ကလိဂွံလဝ် ပရေၚ်ဓလိုက်တမ်ရိုဟ် နူကဵုကြုက်တံ နကဵုလၟိဟ်ဗွဲမဂၠိုၚ်ဂၠေၚ်ရ။
လၟေၚ်တရဴဏံဝွံ ကြဴနူကဵုကောံဓရီု ကုက္ဍိုပ်သ္ကိုပ်အာဇြဳယာန် ပ္ဍဲဂျာကာတာ အပ္ဍဲသတ္တာဟလောန်ကၠုၚ်ဏံဂှ်တုဲ မေဿတာဟောန်မာနက် ဒှ်သ္ကိုပ်ဝန်ဇၞော်တုဲဂှ် ဒှ်လၟေၚ်တရဴ မ္ဒးအာစိုပ်ဍုၚ်သ္အာၚ် အလန်ကိုပ်ကၠာအိုတ်မွဲရ။
နကဵုအလဵုအသဳဗေကျေန် နူကဵုလၟေၚ်တရဴဏံမွဲကဆံၚ် သွက်ပရေၚ်ပံၚ်တောဲရေၚ်တၠုၚ် စှ်ေကဵုမဟာဗျူဟာ အကြာကြုက်ကဵု ကာမ္ဗောဒဳယျာတံဂှ် သွက်ဂွံဖျေံစၟတ်အစဳဇန်မာန်ဂှ် စၟဳစလဝ်ဂှ်လေဝ် ဌာနဝန်ဇၞော်ကာဍုၚ်သ္အာၚ်ကြုက် ဟီုဂးလဝ်ရ။
အပ္ဍဲဂိတုအဝ်ဂါတ်တေံ ကြဴနူမေဿတာဟောန်မာနက် ဆဵုဂဗကဵု ဝန်ဇၞော်ကာဍုၚ်သ္အာၚ်ကြုက် ဝါန်ယဳတုဲဂှ် နကဵုအလဵုအသဳ ညးသ္ကိုပ်သ္ကဂှ်မ္ဂး စပ်ကဵုပရေၚ်ထိုၚ်ဝါန်တုဲ ညံၚ်ဂွိုအ်လုပ်စိုပ်ပလာပ်ပထုဲ ကုပရေၚ်ကောန်ဂကူကြုက်ဂှ် တၚ်ဒတူလိုၚ် အတိုၚ်မကဵုလဝ်ကတိဂှ် ဟွံပြံၚ်လှာဲပုဟ်ဂှ် ချူပ္တိုန်လဝ် လ္တူမုက်လိက်ဇာဇၞိက်ပရေၚ်မၞိဟ်ညးတံရ။
ပ္ဍဲကဵုလၟေၚ်တရဴမေဿတာဝါန်ယဳ ဆဵုဂဗလဝ်ကဵု အဖဝ်မိတ်ကာမ္ဗောဒဳယျာဂှ် သွက်ဂွံရှ်ေသှ်ေဒ္ဂေတ်ဗက် အဝဵုအပိုၚ်အခြာကၟိန်ဍုၚ်ဂှ် ထပ်သ္ပဒတန်လဝ် ကု “ကတိကဝတ် ဟွံချဳဒရာၚ်” ဗေကျေန်ဂှ်ရ။
သ္အာၚ်နူဂှ်ပၠန် သွက်ကၟိန်ဍုၚ်ဨကရာဇ်ကာမ္ဗောဒဳယျာဂှ် ဒဒှ်ရထ္ၜးလဝ် ပရေၚ်ထံက်ဂလာန်ဍုၚ်ကြုက်ဂှ် ထ္မံက်ထ္ၜးလဝ် ပ္ဍဲကဵုတၚ်လလောၚ်တြး ဌာနဝန်ဇၞော်ကာဍုၚ်သ္အာၚ် ကာမ္ဗောဒဳယျာရ။
Ref: AFP
sanlontai