ၜိုန်ပရေၚ်ကဵုသတိအမေရိကာန် နွံကီုလေဝ် က္ဍိုပ်သ္ကိုပ်ကိုဝ်ရဳယာသၟဝ်ကျာ အာစိုပ်ရုယှာ

ပျုမ်ယာမ် -သေပ်တေမ်ဗာ(၁၃)

က္ဍိုပ်သ္ကိုပ်ကိုဝ်ရဳယာသၟဝ်ကျာ ကေမ်ဂျုမ်အာန်ဂှ် အကြာဝါယှေန်တာန် ကဵုဒၟံၚ်သတိ ညံၚ်ဟွံဂွံကၠောန်သ္ပ ပရေၚ်သွံရာန်လွဟ်ဂှ် အာစိုပ်ဒၟံၚ် ကၟိန်ဍုၚ်ရုၚ်ယှာရဂှ် တံရိုဟ်တၚ်ဂၞၚ်ပရိုၚ်မွဲဂှ် သ္ပလဝ်ဒ္တန်ကဵု ရိုက်တာရ။

ကေန်ဂျုမ်အာန်ဂှ် ပ္ဍဲတ္ၚဲအဒိုတ်တ္ၚဲကၠုၚ်တေံ တိတ်အာကၟိန်ဍုၚ်ရုယှာ နကွဳပၟတ်ညးပိုၚ်ရဂှ် မဳဒဳယာကၟိန်ဍုၚ်ကိုဝ်ရဳယာသၟဝ်ကျာ ဓမံက်ထ္ၜးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၂)ဂှ်တုဲ မ္ၚးနူညးတာလျိုၚ်ကမၠောန်လွဟ်လက်နက်ကဆံၚ်လ္တူတအ်တုဲ သၞာဲဒဴသွာၚ်ပၞာန်တအ်လေဝ် ပါဗက်အာရဂှ် ဟီုလဝ်ရ။

စပ်ကဵုလၟေၚ်တရဴဂှ်တုဲ တံရိုဟ်ပရိုၚ်ရုယှာ မဆက်စပ်မွဲဂှ်မ္ဂး ကေန်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၂) အခိၚ်နူဂယး စိုပ်ကၠုၚ်လဝ်ရုယှာတုဲ ကွဳပၟတ်ညး တိတ်အာ လ္ပာ်ခါသာန် မဒှ်ပၞော်တိတ်ဂၠံၚ်ကွဳပၟတ်အဓိက မၞုံတၞုၚ်မုဟ်ဗၟံက်ကၟိန်ဍုၚ်ရုယှာ သွက်ဂွံဆဵုဂဗ ညးတာလျိုၚ်ဌာန်မဆေၚ်စပ်တအ်ရဂှ် ဟီုလဝ်ရ။

ဓမံက်ထ္ၜးလဝ် ကွဳပၟတ်ဗဂိုဟ်လဝ်ဍာ်ဂဥုဲ အရံၚ်သာ်ဍီုတာန်လွေန်မွဲဖ္ဍိုက် တတ်ကၠောံဒၟံၚ် ဒဒန်မွဲတၞုၚ် မဒးပတှ်ေကေတ် ကွဳပၟတ်ပ္ဍိုက်နၚ်က္ဍိုပ်သ္ကိုပ်ကိုဝ်ရဳယာသၟဝ်ကျာတုဲ ဌာန်ပရိုၚ်ရုပ်ဂမျိုၚ် ကၟိန်ဍုၚ်ရုယှာပိုၚ် Rossiya 1 ဂှ်လေဝ် ဓမံက်ထ္ၜးလဝ် ကေန်ဂျုမ်အာန် စိုပ်ကၠုၚ်ဒၟံၚ်ရ။

“အရာဏံ ဒှ်တရဴဂေတ်ကြေဝ်ပေၚ်ၚ်မွဲရ။ အကြာညးစၞး ၜါဂကောံ ကၠောန်ပရေၚ်ပ္ညဳပ္ညပ်တုဲတှ်ေ ယဝ်က္ဍိုပ်သ္ကိုပ်တအ် ပၟိက်ဒှ်မ္ဂး ဆက်အာ နကဵုဗီုပြၚ်ပရေၚ်ဆက်ဆောံဏောၚ်” ဂှ် ညးမၞုံအခေါၚ်ဟီုဂးကရေန်မလေန် ဒီမီထရီပက်စကအ် ဟီုလဝ်ရ။

ပ္ဍဲပရေၚ်သဳကၠဳဂှ် တၚ်သ္ဂုတ်သွာတ် ကိုဝ်ရဳယာသၟဝ်ကျာဂှ် အရီုဗၚ်ဗ္စာရဏာပရေၚ်မၞိဟ် ကေုာံကံၚ်ဇြဳပရေၚ်ဂီုကၠီုကုလသမဂ္ဂတအ်လေဝ် ပါလုပ်မာန်ရဂှ် ညးတာလျိုၚ်ရုယှာတအ် ဟီုလဝ်ရ။

အကြာရုယှာကဵု ကိုဝ်ရဳယာသၟဝ်ကျာဂှ် ပေါဲသဳကၠဳဆေၚ်စပ်ကဵုလွဟ်လက်နက် ဂၠိုၚ်ကၠုၚ်ဒၟံၚ် နကဵုအသိၚ်ဒမြိပ်တုဲ ကေန်ကဵုပူတေန်တအ်ဂှ် သွက်ဂွံကဵုရုယှာ လွဟ်လက်နက် သွက်ပေါဲပၞာန်ယူကရုၚ် သဳကၠဳမာန်ဒၟံၚ်ရဂှ် လ္ပာ်အမေရိကာန်ဟီုဂးဒၟံၚ်လေဝ် နွံရ။

ကွဳပၟတ်ကေန်ဂှ် ပ္တဝ်ဏာဒၟံၚ်က္ဍိုပ် လ္ပာ်သၟဝ်ကျာဒေသအာမ်မာ ရဂှ် နိဿဲကဵု တၚ်သၞာဲဒဴရုယှာ ဟွံမိက်ဓမံက်ယၟုမွဲတၠ ဟီုဂးလဝ် ပ္ဍဲဌာန်ပရိုၚ်ကျိုဝ်ဒိုဝ် ကၟိန်ဍုၚ်ဂျပါန်တုဲ ဓမံက်ထ္ၜးလဝ်ကီု ပ္ဍဲကဵုဒၞာဲဂှ် သွက်ဂွံသဳကၠဳကဵုပူတေန် ပ္ဍဲဗာသတိုဝ်ချဳနိ ကိုဝ်သမိုဝ်ဒိုဝ် ဒှ်မာန်ဒၟံၚ်ရဂှ် ဟီုလဝ်ရ။

နူကိုဝ်ရဳယာသၟဝ်ကျာ ထံက်ပၚ်ကဵုရုယှာ မသုၚ်စောဲလဝ်လွဟ်လက်နက်ဂိုၚ်သီလဝ် ဗွဲမဂၠိုၚ် ပ္ဍဲပေါဲပၞာန်ပွိုၚ်(၁၈) ဂိတုဟွံသေၚ်ရဂှ် သီုကဵုၜါလ္ပာ် ဟီုတးပါဲလဝ်ရ။

အမေရိကာန် ကေုာံမဟာမိတ်တအ်ဂှ်မ္ဂး မ္ၚးနူရုယှာတုဲ ကိုဝ်ရဳယာသၟဝ်ကျာပိုၚ်ပြဳလဝ်လွဟ်လက်နက်နျူကလဳယာတအ်ဂှ် အခိၚ်တုဲကၠုၚ်ဟွံလအ်ဏီဏံ စပ်ကဵုလက္ချဏ်ပံၚ်တောဲပရေၚ်ပၞာန် သာစုက်လုက်ဒၟံၚ်ဂှ်တုဲ ဓမံက်ထ္ၜးလဝ် ဒဒှ်ရဒးဒှ်ဒၟံၚ်ဓဝိၚ်ရ။

ပရေၚ်ပိုန်ဒြပ်ကောန်ဂကူ ကၟိန်ဍုၚ်ရုယှာဂှ် မူဝါဒကၟိန်ဍုၚ်ဟေၚ် ကဵုအာသ္ဂုတ်သွာတ်ရောၚ်ဂှ် ညးမၞုံအခေါၚ်ဟီုဂး ဟီုလဝ်တုဲ “အတိုၚ်တီဒၟံၚ်သီုညးဖအိုတ်ရ အခိၚ်ပိုဲဓမံက်ဒၟံၚ်ရုပ်ရဴ ပရေၚ်ဆက်ဆောံကဵု ကၟိန်ဍုၚ်ဇိုၚ်ဝုတ်ဒိုဟ် ပါလုပ်သီုကိုဝ်ရဳယာသၟဝ်ကျာဂှ် ဒတုဲဖိုလ်သွက်ကၟိန်ဍုၚ်ပိုဲ ၜါကၟိန်ဍုၚ်ဂှ် သာတုဲ ပၟိက်ဇၞော်ဒၟံၚ်ရ။ ပရေၚ်ကဵုသတိဝါယှေန်တာန် ဟွံသေၚ်ပုဟ်”ဂှ် ပက်သကအ်ဖ် ဟီုလဝ်ကဵု မဳဒဳယာရုယှာရ။

Ref,CNA