ပ္ဍဲရေဝ် လွဟ်လက်နက်ဒတုံစှ်ေတုဲ ကောန်အရာပ် (၅) တၠ ကလိဂွံဝပ်

ရေဝ်၊ သေပ်တေမ်ဗာ (၁၄)

ပ္ဍဲတွဵုရးဍုၚ်မန်၊ ပွိုၚ်ဍုၚ်ရေဝ်၊ ပ္ဍဲကဵုကွာန်ဘာဂှ် ဟိုတ်နူလွဟ်ဇၞော် ဒတုံဗ္တိုဟ်ထ္ကးလဝ်ဂှ်တုဲ ညးဍုၚ်ကွာန်ကောန်အရာပ် (၅) တၠ ပ္ဍဲကဵုဏံ ညးဗြဴ ၄ တၠပါလုပ်ဂှ် ကလိဂွံလဝ်ဝပ်ညးသ္ကအ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

တုဲကၠုၚ် ပ္ဍဲဂိတုသေပ်တေမ်ဗာ (၁၂) တေံ အခိၚ်ဇိုၚ်သဝ်တ္ၚဲ ၜိုတ် (၃) နာဍဳဂှ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ပန်ပှော်ဗ္တိုက်လဝ် နကဵုလွဟ်ဇၞော် ကုတမ်ဒပ်ကံၚ်ဇြဳပၞာန် ခမရ စၟတ် (၅၉၁) ရ။

မကမ်လွဟ်ဇၞော် နူကဵုဂကောံဒပ်ပံၚ်ကောံတံ မပန်ပှော်လဝ်ဂှ်ဝွံ ဒတုံဗ္တိုဟ်ထ္ကးအာလဝ် ပ္ဍဲကဵုကွာန်ဘာကဵု ဗ္ဒါဲပွဳပွူ ဒပ်ကံၚ်ဇြဳပၞာန်တံဂှ်ရ။

ဟိုတ်နူလွဟ်ဇၞော်ဒတုံဗ္တိုဟ်ထ္ကးအာလဝ်ဂှ်တုဲ ညးဗြဴအယဲလ္ဒေါဝ် ၄ တၠ ဒဝ်ခေန်တာဥူ ၊ ဒဝ်ကျဳဝေန်တံပါလုပ်ဂှ်ကဵု ဥူချေတ်အံၚ် အာယုက် ၅၉ သၞာံ မဒှ်ညးဒေသတံဂှ် ဒးအာလဝ်ကဝေက်မာၚ် ပ္ဍဲကဵုက္ဍိုပ်၊ တဲ၊ ဇိုၚ်ဂၞိၚ်တံတုဲ ကလိဂွံဝပ်ညးသ္ကအ်အိုတ်ရ။

ဟိုတ်နူလွဟ်ဇၞော်တုဲ ညးဗြဴၜါတၠ မကလိဂွံလဝ်ဝပ် ပ္ဍဲကဵုက္ဍိုပ်ဂှ် ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန်ပွိုၚ်ဍုၚ်ရေဝ်တုဲ လွဳကဵုဒၟံၚ်ရောၚ် ဂွံတီကေတ်ရ။

ကြဴနူဒးဒုၚ်ပန်ပှော်လွဟ်ဇၞော်တုဲဂှ် နူကဵုဒပ်ကံၚ်ဇြဳပၞာန်တံ ကၠောန်သ္ပပန်ပှော်လဝ်လွဟ်ဇၞော် မ္ၚးကွာန်ဘာဂှ်ကဵု ဗ္ဒါဲပွဳပွူကွာန်လ္ၚဵုလ္ၚဵုတံဂှ်ရောၚ် ညးဒေသတံ ဟီုဂးလဝ်ရ။

ပ္ဍဲကဵုပွိုၚ်ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် အပ္ဍဲကာလသီအဝဵုဏံ အပ္ဍဲပရေၚ်ပန်ပှော်ၜါလ္ပာ် ဂကောံဒပ်ရပ်လွဟ်တံဂှ် ညးဍုၚ်ကွာန်ကောန်အရာပ်တံ ဇီုကပိုက်ချိုတ်တံ က္တဵုဒှ်ဒၟံၚ် မွဲဏှမွဲဏှရ။

ပရိုၚ်−သြၚ်လောန်တိုၚ်(မ်)

ဗီု−Saw Ba Maung