ပံၚ်၊ သေပ်တေမ်ဗာ (၁၄)
ပ္ဍဲတွဵုရးဍုၚ်မန်၊ ပွိုၚ်ဍုၚ်ပံၚ်၊ ပ္ဍဲကွာန်ယျေန်ညုၚ်ဂှ် ပ္ဍဲဂိတုသေပ်တေမ်ဗာ ၁၃ အခိၚ်နူဂယး ၜိုတ် ၈ နာဍဳတေံ ကောန်ပၞာန်ညးဍုၚ်ကွာန်တြေံမွဲတၠ ဒးဒုၚ်ပန်လဝ်ကဵု သေနာတ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဥူကျာကျဳ မဒှ်ကောန်ပၞာန်ညးဍုၚ်ကွာန်တြေံ အာယုက် ၆၀ သၞာံပြၚ်ဂှ်ဝွံ အခိၚ်တိတ်ကၠုၚ် နူကဵုသ္ၚိဒၟံၚ်ညး မၞုံသ္ကုတ်လ္တူဒဵု ကွာန်ယျေန်ညုၚ် နကဵုကွဳလိုန်ဓာတ်ဂှ် သၟာတ်သေနာတ်ဟွံတီယၟု ၂ တၠ မၚ်ဒၟံၚ်တုဲ ပန်ပှော်လဝ်ကဵုသေနာတ်ရ။
ဟိုတ်နူဒးဒုၚ်ပန်ပှော်လဝ်ကဵုသေနာတ်ဂှ်ရ ဥူကျာကျဳဝွံ ဟိုတ်နူကလိဂွံလဝ်ဝပ် မကမ်ကၠိုဟ်အာ ပ္ဍဲကဵုဒဳလ္ပာ်ပုၚ်ဂှ်ရ နူကဵုရုၚ်ဂဥုဲပွိုၚ်တိုက်ယျေန်ညုၚ်ဂှ် ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန်ခရိုၚ်သဓီုရောၚ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ဥူကျာကျဳဝွံ ပ္ဍဲကဵုကွာန်ယျေန်ညုၚ်ဒံၚ်ဂှ် အခိၚ်တိုန်ဘာဗလးဘာ ကောန်ၚာ်သၟတ်တံ ညံၚ်အန္တရာယ်ယာန်ဂွိုအ်မွဲဂှ် ဒှ်ညးပသောၚ်ကဵုဒၟံၚ်ဂၠံၚ်မွဲတၠရောၚ် သ္ဂးရ။
ဥူကျာကျဳ သီုကဵုဒှ်ကောန်ဒပ်သိုဟ်ပၠိုတ်ပၟတ်အရန်ဂှ်ဝွံ ဆက်စပ်ဒၟံၚ်ကဵု ဂကောံအုပ်ဓုပ်ကွာန် ကံၚ်ဇြဳပၞာန်ခါန်ကၞက်တံ နွံဒၟံၚ်ရောၚ်ဂှ် ဟီုဂးဒၟံၚ်တံ နွံဒၟံၚ်ရ။
ဂကောံလဵု ပန်ပှော်လဝ် ဥူကျာကျဳ နကဵုသေနာတ်ရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ်မွဲမွဲသာ်ဂှ် ဟွံဂွံဆဵုကေတ်ဏီရ။
တုဲကၠုၚ် ပ္ဍဲဂိတုသေပ်တေမ်ဗာ ၃ တေံဂှ်လေဝ် ကြဴနူဗၠာဲသၟိၚ်ထိၚ်ရး ကိုဝ်ဝ်လွေန် နူကဵုဗ္ဒိုပ်ဗၠာဲသၟိၚ်ၝောံဍုၚ်ပံၚ် ဒးဒုၚ်ပန်ပှော်ကဵုသေနာတ်တုဲဂှ် ညးဍုၚ်ကွာန်ဒေသ နူကဵုကွာန် (ဥတ္တံတား) ပွိုၚ်ဍုၚ်ပံၚ် ဟွံအောန်နူကဵု ၁၅ တၠ ဒးဒုၚ်ရပ်ဒက်စၟဳတ်ဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−PAN
sanlontai