တုၚ်ဇြယာတ်၊ သေပ်တေမ်ဗာ(၁၅)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ဍုၚ်တုၚ်ဇြယာတ်၊ ပ္ဍဲကွာန်ခယွေဲ(ခရွဲ)ဂှ် နူဒပ်ကံၚ်ဇြဳပၞာန် ဟိုတ်နူပန်ဖျေံဒၟံၚ်လွဟ်ဇၞော်အရိုဟ်တ္ၚဲ ဆက်က်တုဲ ညးဒေသကောန်ဍုၚ်ကွာန်တအ် ၂၅၀၀ ပြၚ် ဒးဂြိပ်ဒဴပါဲဓလေတ်ဒၟံၚ်ရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ရးဒေသဇၞော်ဗဂေါ၊ ပွိုၚ်ဍုၚ်ဝဝ်၊ နူကဵုဒပ်ကံၚ်ဇြဳပၞာန်ဖျေံဗဒိုပ်သ္ဇိုၚ် ပ္ဍဲကွာန်ပေါက်တာန်ဂှ် သ္ပတံနူ ဂိတုသေပ်တေမ်ဗာ စၟတ်တ္ၚဲ (၉)တုဲ ပန်ဖျေံဒၟံၚ်လွဟ်ဇၞော် ပ္ဍဲကွာန်ခယွေဲ အရိုဟ်ဒဒှ်တ္ၚဲရ။
ဟိုတ်နူဒပ်ကံၚ်ဇြဳပၞာန် ပန်ဖျေံဒၟံၚ်လွဟ်ဇၞော်တုဲ ညးဒေသကွာန်ခယွေဲ ၂၅၀၀ ပြၚ်တအ် ဒးဂြိပ်ဒဴပါဲဓလေတ်ဒၟံၚ် သီုအလုံမွဲကွာန်တုဲ ညးဒေသနူကွာန်ဝေန်ကာန် ကေုာံကွာန်တုမ်ခွ မဒှ်ကွာန်ဇိုၚ်ကရပ်ဂှ် လ္ၚဵုတအ်လေဝ် ဒးဂြိပ်ဒဴပါဲဓလေတ်ဒၟံၚ် နွံရ။
အတိုၚ်ညးဒေသကွာန်ခယွေဲတအ်ဟီုမ္ဂး ဒပ်ကံၚ်ဇြဳပၞာန်ဂှ် မွဲမွဲတ္ၚဲမ္ဂး အောန်အိုတ် လွဟ်ဇၞော်နူ (၆)မ စဵုကဵု (၁၂)မ ပန်ဖျေံဒၟံၚ် နွံရဂှ် ဟီုလဝ်ရ။
ညးဍုၚ်ကွာန်ပါဲဘဲပၞာန် ဒးဂြိပ်ဒဴပါဲဓလေဝ်ဒၟံၚ် ဟိုတ်နူလွဟ်ဇၞော်တအ်ဂှ် ဒၟာနူဒးမံၚ်ဒၟံၚ် ပ္ဍဲကၠံဥဒျာန် ကေုာံပ္ဍဲဂြိုပ်ဒဵုတအ်ဂှ်ရ ပရေၚ်စသုၚ်မံၚ်စံၚ် ဒှ်ကၠုၚ်ဒၟံၚ်အခက်ခုဲရဂှ် ဂွံတီကေတ် အတိုၚ်ညးဍုၚ်ကွာန်ပါဲဘဲပၞာန်တအ် ဟီုသ္ဂးလဴလဝ်ရ။
ပ္ဍဲကွာန်ခယွေဲ ဒးဂြိပ်ဒဴပါဲဓလေတ်ဒၟံၚ် သီုအလုံမွဲကွာန်ဂှ် ဟိုတ်နူဒပ်ကံၚ်ဇြဳပၞာန် ပန်ဖျေံလွဟ်ဇၞော်တုဲ ၜိုန်ရသ္ၚိဌာန်တအ် ဇီုကပိုက်ဒးလီုလာ်လဝ် နွံကီုလေဝ် စဵုကဵုအခိၚ်လၟုဟ်ဏံ ဟိုတ်နူညးဒေသတအ် ဟွံဂံၚ်က္လေၚ်စဴ ဌာန်ဒၟံၚ်ဏီတုဲ ဟွံဂွံတီကေတ် အကာဲအရာလီုလာ် သောဲသောဲဗြောဲဗြောဲဂှ်ဏီရ။
ပ္ဍဲဂိတုအဝ်ဂါတ် ဒုတိယသတ္တာဟတုဲကၠုၚ်တေံလေဝ် ပ္ဍဲကဵုဗစပ်ပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ်ဂှ် ဟိုတ်နူဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန်ပၞာန်တုဲ ညးဒေသ ၃၀၀၀ ပြၚ် နူကွာန် (၅)ကွာန် ပါလုပ်သီုကွာန်ငှေက်ပျဝ်တဝ်တအ် ဒးဂြိပ်ဒဴပါဲဓလေတ်လဝ် ပ္ဍဲဒၞာဲဗၠးဘဲရ။
ပရိုၚ်- သြၚ်လောန်တိုၚ်(မ်)
ဗီုရုပ် – CJ
sanlontai