ကံၚ်ဇြဳပၞာန် ပ္တိတ်ဇြဟတ် သွက်ဂွံရေက်ကးပ္တိတ်ပရဲ လ္တူဍာ်ဓတ်သြန်ဂိတု ကောန်ကလောန်ဍုၚ်ဗၟာ စိုပ်ဍုၚ်သ္အာၚ်ဂမၠိုၚ်

နေဗျဳဒဝ်၊ သေပ်တေမ်ဗာ (၁၅)

ဌာနဝန်ဇၞော်သၟာကမၠောန်ဂှ် စၞောန်ပ္ညုၚ်ကၠုၚ် သြန်ဂိတုကောန်ဍုၚ်ဗၟာ မအာစိုပ်ကၠောန်ဒၟံၚ်ကလောန် ပ္ဍဲကဵုဍုၚ်သ္အာၚ် မပလံၚ်ကဵုဒၟံၚ်ပ္ဍဲသ္ၚိတံ ၂၅ တၟံကၠံဂှ် ဟွံဒေါအ်ဟွံဂွံ သွက်ဂွံပလံၚ်ကဵု နူကဵုသၞောတ်ဗာန်မလုပ်သၞောဝ် ကံၚ်ဇြဳပၞာန် မထိၚ်ဒက်လဝ်ဂှ်ရောၚ် မဒှ်ရ။

အတိုၚ်လိက်စၞောန် ဌာနဝန်ဇၞော်သၟာကမၠောန်သၟဝ်သြဇာ ကံၚ်ဇြဳပၞာန်ဂှ်မ္ဂး နကဵုညးတိတ်ဍုၚ်သ္အာၚ် ကၠောန်ဒၟံၚ်ကမၠောန်တံ သြန်ဂိတုညးတံ ၂၅ တၟံကၠံဂှ် မွဲဂိတုမွဲဝါ ဟွံသေၚ်မ္ဂး ပိဂိတုမွဲဝါဂှ် ဟွံဒေါအ်ဟွံဂွံ မ္ဒးပလံၚ်ကဵုဏောၚ် မဒှ်ရ။

တၚ်ဏံဂှ် အကြာအေဂျေန်ဇြဳဂၠါဲကဵုကမၠောန်ကၟိတ်တံကဵု သၟာကမၠောန်တံဂှ် ဒဒှ်ရတုပ်စိုတ်ဂှ် နွံပၟိက် မ္ဒးချုက်လိက်ကသုက်တုဲ ပ္ဍဲကဵုတိုက်သြန်အပ္ဍဲဍုၚ်တံဂှ် ဒးပံက်လဝ် စရၚ်သြန် Special Account မွဲဏောၚ် မဒှ်ရ။

ဥူအံၚ်ကျဝ် ညးကဵုကသပ် ဇာဇၞိက်အခေါၚ်အရာသၟာကမၠောန်ဆုဲပြံၚ် (MWRN) ဖျေံသ္ဇိုၚ်ဍုၚ်သေံဂှ် ကောန်ကလောန်ဍုၚ်ဗၟာ မစိုပ်ဒၟံၚ်ဍုၚ်သ္အာၚ်ဂမၠိုၚ်ဝွံ အခိၚ်ပြၚ်လှုဲပ္ဍဲသ္ၚိတံဂှ် ဟိုတ်နူဂွံဒၟံၚ် နကဵုၚုဟ်မ္ၚးဏံဂှ်ရ လ္တူတၚ်စၞောန်ကံၚ်ဇြဳပၞာန်တံဂှ် ဟွံတုပ်စိုတ်အိုတ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“စပ်ကဵုညအ်တုဲ သၟာကမၠောန်စိုပ်ဒၟံၚ်မ္ၚးဍုၚ် ဗွဲမဂၠိုၚ်ဂှ် ဟွံဒုၚ်တဲအိုတ်ပုဟ်။ မူဟိုတ်ရောဟီုတှ်ေ ဓမ္မတာမ္ဂး အခိၚ်လှဲပြံၚ်သြန်ဂိတုညးတံ ပ္ဍဲကဵုသ္ၚိဂှ် ဂွံဒၟံၚ် နကဵုၚုဟ်မ္ၚးဏံ ပေၚ်ၚ်ဏောၚ်။ နူကဵုကံၚ်ဇြဳပၞာန်ဂှ် ပြံၚ်စုတ်ပ္ဍဲကဵုဗာန်ညးတံဏောၚ်၊ အပြံၚ်အလှာဲသြန်တံ ၚုဟ်တိုန်ၚုဟ်စှ်ေတံဂှ် သာတုဲဖေက်ဟွံကၠောန်ကဵုဂှ် ဂွိၚ်တဴအိုတ်ဂှ်ရ ဗွဲမဂၠိုၚ်ဂှ်တှ်ေ ကိစ္စဏံဂှ် ဟွံတုပ်စိုတ်ပုဟ်ဟီုဂှ် ဂွံမိၚ်ဒၟံၚ်ရ “ သာ်ဝွံ ညးသ္ဂးရ။

ဌာနဝန်ဇၞော်သၟာကမၠောန် NUG ဂှ် နကဵုကံၚ်ဇြဳပၞာန် အဓိကရန်တၟံလဝ် သွက်ဂွံရပ်စပ် ပ္ဍဲကဵုဒၞါဲရာန်ကၠေၚ်က္ၜၚ်ကျာပၞာန် မဗ္တိုက်ဂြာတ်ဒၟံၚ်ဗုမ် ကုကွာန်ဂမၠိုၚ် ကေုာံ သွက်ဂွံရာန်လွဟ်လက်နက်မကမ် မနွံဒၟံၚ်ပၟိက် သွက်ဂွံဂစိုတ်ဂယိုၚ်ဍဵုဍိုက်ပျဲပျာံ လ္တူညးဍုၚ်ကွာန်တံတုဲ ရေက်ကးပ္တိတ်ပရဲ လ္တူဍာ်ဓတ်ကာယသမ္မာအာဇဳဝတံဂှ်ကဵု သွက်ဂွံဍဵုဍိုက် ထ္ၜးအဝဵုဟွံဗဗွဲကဵုသၞောဝ် လ္တူသၟာကမၠောန်တံရောၚ်ဂှ် သ္ဂးရ။

ကံၚ်ဇြဳပၞာန်ဂှ် ယဝ်ရဟွံလှဲပြံၚ်နၚ် သြန်ဂိတု ၂၅ တၟံကၠံဂှ် နူကဵုဂၠံၚ်တရဴမဗဗွဲကဵုသၞောဝ်ဂှ်မ္ဂး မွဲဝါပၠန်မ္ဂး ကၟာတ်အာအခေါၚ်ကၠောန်ကမၠောန်တိတ်ဍုၚ်သ္အာၚ် ၃ သၞာံဏောၚ်တုဲ သီုကဵုဒးဒုၚ်ကေတ်အရေဝ် လ္ဂောံကဵုသၞောဝ်ဥပဒေပဋိညာန်တံရောၚ်ဂှ် ဘပဠလဝ်ရ။

ညးဗြဴကောန်ကလောန်ဆုဲပြံၚ် စိုပ်ဍုၚ်သ္အာၚ်မွဲတၠဂှ် သြန်ဂိတု ၂၅ တၟံကၠံဂှ် သွက်ဂွံလှဲပြံၚ်ကဵု ဇရေၚ်ကံၚ်ဇြဳပၞာန်ဂှ် ချပ်လဝ်ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“မိက်ဂွံဂွံ ၂၅ တၟံကၠံမ္ဂး ပိုယ်တံဂှ် ဗီုလဵုဂွံဟီုရောဟီုတှ်ေ ဟွံကဵုပုဟ်ဟီုမ္ဂး ကၟာတ်အာပိသၞာံဏောၚ်တှ်ေ လၟုဟ်ဂှ်ရော ပိုယ်တံစဴဂွံဟာ။ ခိုဟ်ဟ်သြန်န်ဂှ် စဴဟွံဂွံပုဟ်လေဝ်။ အေ ဂှ်တှ်ေ နကဵုပိုယ်တံဂှ် သွက်ဂွံကဵုဂှ် ချပ်လဝ်ဟွံမွဲပုဟ်။ အခိၚ်လၟုဟ် လုကဴပၠန်ဂတးဟွံတုဲမ္ဂး ဂွံစဴဂှ် ချပ်လဝ်ဟွံမွဲပုဟ်။ အခိၚ်ပြၚ်လှဲပ္ဍဲသ္ၚိဂှ် ဍေံတံဍေံတံ မူစိထပိုတ်ထပိုတ် ၂၅ တၟံကၠံဒှ်ဒှ်၊ ဍေံတံကံက်ကပှ်တၚ်နၚ်တုဲမှ ထပိုတ်ဒှ်ဒှ် ဗီုလဵုထပိုတ်တ် နူကဵုလ္ပာ်ပိုယ်ဏံ ဟွံကဵုမ္ဂး ဍေံတံဟွံဂွံပုဟ်လေဝ်။ ဂွံကဵုဂှ်လေဝ် ချပ်လဝ်ဟွံမွဲပုဟ်” သာ်ဝွံ သ္ဂးရ။

တိုက်သြန်ဗဟဵုဂှ် သြန်ဂိတု မကလိဂွံ နကဵုသြန်ဍုၚ်သ္အာၚ် ကောန်ဍုၚ်မကၠောန်ဒၟံၚ်ကမၠောန် ပ္ဍဲကဵုဍုၚ်သ္အာၚ်တံဂှ် ကလေၚ်လှဲပြံၚ်နၚ်ဗွဲမလုပ်သၞောဝ် နူကဵုတိုက်သြန်ဂွံလဝ်လာၚ်ဇြေန် (AD) မသွံရာန်ဒၟံၚ်သြန်ဍုၚ်သ္အာၚ်တံဂှ်တုဲ ရပ်စပ်ကြိုက်စိုတ်မာန်ရောၚ်ဂှ် လလောၚ်ပ္တိတ်လဝ်ရ။

ဌာနက္ဍိုက်ပ်အကံက်ခေါန်အပ္ဍဲဍုၚ်ဂှ်လေဝ် သြန်လှဲပြံၚ်နၚ်အပ္ဍဲဍုၚ် ဗွဲမလုပ်သၞောဝ် နူကဵုဍုၚ်သ္အာၚ်တံဂှ် ရာန်ယာန်စက်တံကီု၊ ရာန်ကပေါတ်ဗၞိက်သ္ဇိုၚ်တံကီု၊ ပ္ဍဲဒၞါဲသိုၚ်ခၞံတံကဵု ဓလိုက်တမ်ရိုဟ်တံဂှ် ကဵုဗၠးနူအကံက်ခေါန်ဏောၚ်ဂှ် ကဵုလဝ်သမ္တီရ။

အခိၚ်လၟုဟ်ဂှ် နူကဵုတိုက်သြန်ဗဟဵုကံၚ်ဇြဳပၞာန်ဂှ် သြန်ဒဝ်ဠာအမေရိကာန် မွဲဒဝ်ဠာဂှ် ၜိုန်ရစၟတ်လဝ် ၂၁၀၀ ဒ္ကေဝ်ကီုလေဝ် မ္ၚးဏံဂှ် မွဲဒဝ်ဠာဂှ် သြန်ဗၟာ ၚုဟ်မၞုံဒၟံၚ် ၜိုတ် ၃၅၀၀ ဒ္ကေဝ်ရ။

ဌာနဝန်ဇၞော်သၟာကမၠောန် အလဵုအသဳညဳသၟဟ်ဂကူဂှ် အေဂျေန်ဇြဳဒှ်ဒှ် ဟွံသေၚ်မ္ဂး ပူဂဵုလဵုဟွံဟီု ထပိုတ်သြန်ဂိတုကောန်ကလောန်ဍုၚ်ဗၟာ စိုပ်ဍုၚ်သ္အာၚ်တံဂှ်ကီု၊ နကဵုနဲကဲမွဲမွဲသာ် ကၠောန်သ္ပကဵုဇြဟတ်ဂရိုဟ် သွက်ဂွံလှဲပြံၚ်တံဂှ်မ္ဂး နကဵု NUG ကေတ်အာဒုဟ် ဗွဲမသ္ကာတ်မြဟ်ရောၚ်ဂှ် ပ္ဍဲဂိတုသေပ်တေမ်ဗာ ၈ တေံ လလောၚ်ပ္တိတ်ကဵုလဝ်သတိရ။

ပရိုၚ်−သြၚ်လောန်တိုၚ်(မ်)

ဗီု−CJ