ကျာ်ထဝ်၊ သေပ်တေမ်ဗာ(၁၄)
တွဵုရးဍုၚ်မန်၊ ပ္ဍဲသၞေဟ်ကၚ်စၟဳတ်လၟိုန် မၞုံပွိုၚ်ဍုၚ်ကျာ်ထဝ်ဂှ် ဟိုတ်နူဂကောံပံၚ်ကောံကံၚ်ဇြဳပၞာန်ဌာနစုၚ်ပါလုပ်တံ ပတေၚ်ဓရတ်လဝ်ပရေၚ်စၟဳတ်ဂှ်ရ ပွလဇုဲလဇဟွံမွဲပၟိက်တံ က္တဵုဒှ်မံၚ်ရဂှ် ညးအာတရဴတံကဵု သၟာကွဳစက်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ဂကောံပံၚ်ကောံကံၚ်ဇြဳပၞာန်ဂှ် သ္ပပ္တံနူဂိတုသေပ်တေမ်ဗာ သတ္တဟပထမတေံတုဲ နကဵုတၚ်ထ္ၜးဟိုတ်ပရေၚ်ဂီုကၠီုဂှ် ကဵုကွဳစက်တံ ရေၚ်ပၞောန်မၚ်တုဲ ကၠောန်သ္ပမံၚ်ပရေၚ်စၟဳတ်တံ အခိၚ်ဗွဲမလအ်လတုဲ သ္ပပတနူမၞိဟ်တံကဵုကပေါတ်တံဂှ်လေဝ် ကၠောန်သ္ပမံၚ်ပရေၚ်စၟဳတ်သောဲသောဲဗြောဲဗြောဲတံရ။
ဟိုတ်နူလ္ပာ်ကံၚ်ဇြဳပၞာန်တံ ပတေၚ်ဓရတ်လဝ် ပရေၚ်စၟဳတ်ဂှ်ရ လၟေၚ်တ္ၚဲကွဳစက်ဂၠိုၚ်ကဵုကၠံ ပရေၚ်ကၟာတ်ဆိုအ်တံ က္တဵုဒှ်မံၚ်တုဲ သွက်ဂွံတတ်ကၠောံအာကၠုၚ် သၞေဟ်ကၚ်မယာန်ချံၚ်ဂှ်တှ်ေ ဒးမၚ် အောန်အိုတ်နူပွိုၚ်(၂)နာဍဳ စဵုကဵု ပွဳူ(၃)နာဍဳတံနွံမံၚ်ရ။
ညးဒဳကွဳစက်မွဲတၠဂှ်တှ်ေ ပ္ဍဲသၞေဟ်ကၚ်မယာန်ချံၚ်ဂှ် ကွဳစက်ဗ္ဒါဲသီုဖအိုတ် သီုအာသီုကလေၚ်တံဂှ် ကၠောန်သ္ပမံၚ်ပရေၚ်စၟဳတ်တံတုဲ ဟိုတ်နူပွစၟဳတ်ဗီုလၟုဟ်တံဂှ်တုဲ ပွတရဴလဇုဲလဇတံ ဒှ်မံၚ်ရဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“လအ်မံၚ်ပ္ဍဲသၞေဟ်ကၚ်မယာန်ချံၚ်ဂှ်ကွေံကွေံဟီုဂှ် ဍေံတံဂှ်လေဝ် စၟဳတ်မံၚ်ကွဳစက်ပိုဲဂှ် မုစၟဳတ်မံၚ်မုလေဝ် ဟွံတီရ။ လၟုဟ်ဏံဂှ် စၟဳတ်ကွဳစက်ဖ္ဍိုက်ဗၞိက်ဇၞော်ဇၞော်တံမွဲတဲ၊ စၟဳတ်ကွဳစက်ဒ္ၚောဝ်လုၚ်တံမွဲတဲ ပ္ဍဲအကြာတ္ၚဲတံဏံရ ကြေပ်ဂြတ်တိုန်ရ။ ပ္ဍဲသၞေဟ်ကၚ်မယာန်ချံၚ်ဂှ် ကၠုၚ်နူလ္ဂုၚ်လေဝ် စၟဳတ်၊ သၟာန်သၟုက်ရ။ အာနူဏံလေဝ် စၟဳတ်သၟာန်သၟုက်ရ။ ပ္ဍဲအကြာတ္ၚဲတံဏံဂှ် လအ်ရ။ အဓိကတၚ်ပ္တဝ်က္ဍိုပ်ဍေံတံဂှ်တှ်ေ မုလေဝ်ဟွံသေၚ်ပုဟ်။ ညံၚ်ကွဳစက်တံ ဂွံလဇုဲလဇဂှ် ကၠောန်ရ။ ဂၠာဲမၞိဟ်တံမွဲတဲ၊ စၟဳတ်ကပေါတ်တံမွဲတဲ ကၠောန်မံၚ်ၜိုတ်တံဏံရ၊ လၟေၚ်တရဴလဇုဲလဇရ။ ဥပမာ ကွဳစက်တိတ်ကၠုၚ်နူလ္ဂုၚ်ဂှ် ကွဳစက်ဒးစိုပ် ၜိုတ်(၄)နာဍဳ၊ (၄)နာဍဳကဝိုက်ဂှ် လဆောဝ်လဆောဝ် ဟိုတ်နူအကာဲအရာ လအ်အာဗီုတံဏံတုဲ လဇုဲအာၜိုတ်(၂)နာဍဳရ၊ ဂှ်တှ်ေ ၜိုတ်(၆)နာဍဳကဝက်မှစိုပ် ဒှ်မံၚ်အကာဲအရာဏံရ” သာ်ဝွံ သ္ဂးရ။
သ္အာၚ်နူဂှ်ပၠန် ဂကောံသၟဝ်တဲကံၚ်ဇြဳပၞာန်တံဂှ် ပွဖံက်စၟဳတ်ကပေါတ်သောဲသောဲဗြောဲဗြောဲတံဂှ် ကၠောန်သ္ပမံၚ်တုဲ ဟိုတ်နူကၠောန်သ္ပမံၚ်ပရေၚ်စၟဳတ် ညးအာတရဴမွဲတၠတုဲမွဲတၠတံဂှ်ရ အခိၚ်တံသာတုဲလအ်လမံၚ်ရဂှ် ညးဆက်ဟီုရ။ ညးဒဳကွဳစက်ဂကောံပရဟိတမွဲတၠဂှ်လေဝ် ပ္ဍဲသၞေဟ်ကၚ်စၟဳတ်မယာန်ချံၚ်ဂှ် ဟိုတ်ပရေၚ်ကွဳစက်ကၟာတ်ဆိုအ်တံ က္တဵုဒှ်မံၚ်ဂှ်ရ စနူကဵုပ္ဍဲအရာပလံၚ်မၞိဟ်ယဲတံဂှ် အခက်ခုဲနွံကၠုၚ်ရဂှ် ဟီုရ။
“ပရေၚ်ကွဳစက်ကၟာတ်ဆိုအ်ဂှ် ဒှ်မံၚ်ကွေံကွေံရ။ ဒှ်မံၚ်ဂှ်ရ ပိုဲတံလေဝ် ဒှ်အာအကာဲအရာ ဒးပလံၚ်ထောံမၞိဟ်ယဲနူကဵုပ္ဍဲကွာန်တံရ။ တ္ၚဲယးဂတတေံ ကလေၚ်ကၠုၚ်လေဝ် ဗီုဂှ်ပၠန်ရ နူဂယး(၇)နာဍဳညိကွေံ။ ပရေၚ်ကွဳစက်ကၟာတ်ဆိုအ်တံ က္တဵုဒှ်မံၚ်ရ။ အဓိကဂှ် ရေၚ်ကွဳစက်လုပ်သၞေဟ်ကၚ်စၟဳတ်မယာန်ချံၚ်ဂှ် ဂၠိၚ်အာရ။ တုဲပၠန် တၠကွဳစက်လ္ၚဵုတံဂှ် စေဝ်ပၞောန်ဟွံမွဲမွဲသာ် ထပ်တိုန်အာ ပၞောန်ဒုတိယ မွဲရေၚ်ပၠန်ရ။ လ္ပာ်ဏံ ကွဳစက်နူလ္ဂုၚ်ကၠုၚ်မတ်မလီုတံ သီုဖအိုတ်ဂှ် ကၟာတ်အာတုဲ အာဟွံဂွံရပုဟ်။ အဓိကဂှ်တှ်ေ လ္ပာ်အလဵုသဳဂှ်လေဝ် ကဏ္ဍဍေံကဵုဍေံ ပရေၚ်စၟဳတ်လအ်လတံလေဝ် နွံမံၚ်ရ။ ဟိုတ်နူညးဒဳကွဳစက်လက္ကရဴတံ စေဝ်ပၞောန်ဟၟဲတံတုဲ ပရေၚ်ကွဳစက်ကၟာတ်ဆိုအ်တံ က္တဵုဒှ်မံၚ်ဂှ် ဂွံဆဵကေတ်ရ။ ဂှ်တှ်ေ ဒှ်မံၚ် သီုညးၜါလ္ပာ်ရ” သာ်ဝွံ သ္ဂးရ။
ပ္ဍဲသၞေဟ်ကၚ်စၟဳတ်မယာန်ချံၚ်ဂှ် ကွဳစက်ကၟာတ်ဆိုအ်တုဲ ဒးမၚ်မံၚ်အခိၚ်ဗွဲမလအ်လဂှ်ရ ဒှ်မံၚ်အကာဲအရာ ဒးဂွိၚ်မံၚ်ကုအန္တရာယ်လမျီု ညးယဲကာတၟေၚ်တံရောၚ်ဂှ် ဂကောံပရဟိတတံဟီုရ။
သၞေဟ်ကၚ်စၟဳတ်မယာန်ချံၚ်ဂှ် မၞုံတန်တဴဒၟံၚ် လ္တူဂၠံၚ်ကွဳစက် လ္ဂုၚ်-မတ်မလီု ဒးကူသာန်သွံရာန်မံၚ် ကုတွဵုရးဍုၚ်မန်၊ တွဵုရးကရေၚ် ကေုာံ ရးဒေသဇၞော်တၞၚ်သဳတံ အဓိကဂှ်တုဲ ဟိုတ်နူပွစၟဳတ်ဟၟဲပၟိက်ကံၚ်ဇြဳပၞာန်တံဂှ်တုဲ ပရေၚ်ဇီုကပိုက်လ္တူပရေၚ်ကူသာန်သွံရာန်တံ ဇၞော်မံၚ်ရ။
ပ္ဍဲကာလဒပ်ပၞာန်သီအဝဵုဂှ် ဒပ်ကံၚ်ဇြဳပၞာန်တံ နကဵုတၚ်ထ္ၜးဟိုတ် ပရေၚ်ဂီုကၠီုတံဂှ် ပံက်သၠဲပ္တိုန်လဝ် သၞေဟ်ကၚ်စၟဳတ်တံတုဲ ပရေၚ်အာတ်မိက်မံၚ်သြန်လှုဲ နူကဵုကွဳစက်အာတရဴတံကဵု ကွဳစက်ဖ္ဍိုက်ဗၞိက်တံ ဂၠိုၚ်ကဵုဆတံ နွံမံၚ်ရ။
ပရိုၚ်-သြၚ်လောန်တိုၚ်မ်
ဗီု-CJ
sanlontai