ကျာ်ထဝ်၊ သေပ်တေမ်ဗာ(၁၆)
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ကြဴနူဂကောံသ္ၚိကၟိန် ဒုသ္ကိုပ်ဗိုလ်ဇၞော်ဒေါံဇူ ဥူအောၚ်လွေန် ဒၟံၚ်အရာပ်တောၚ်ဒူသု ဒးဒုၚ်ပန်ပှော်လဝ်တုဲဂှ် ညးဒေသ ဟွံအောန်နူ (၅)တၠ ဒးဒုၚ်ရပ်စၟဳစၟတ်ဒၟံၚ်ရဂှ် ကောန်ဍုၚ်ကျာ်ထဝ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၈) တုဲကၠုၚ်တေံ ဂကောံသ္ၚိကၟိန်ဥူအောၚ်လွေန် ညးမဒေါံဇူနူဒပ်ပၞာန်ဂှ် သၟာရပ်လွဟ်ဟွံတီယၟု (၂)တၠ မၚ်ဒၟံၚ်ကဵုကွဳလိုန်ဓာတ်တုဲ ဒးဒုၚ်ပန်ပှော်လဝ်ကဵုလွဟ် ဂတမုက်သ္ၚိဒၟံၚ်ညးတအ်ဂှ်ရ။
ကြဴနူပရေၚ်ပရောဏံက္တဵုဒှ်တုဲဂှ် ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲအရာပ်လ္တူဍုၚ်ကီု ပါလုပ်သီုကွာန်ကျာ်ပိတုဲ ရပ်ကေတ်ဏာ ညးဒေသဆက်စပ်ဒၟံၚ်ကဵု ဒပ်စဵုဒၞာညးဍုၚ်ကွာန် PDF တအ်ရ။
ပ္ဍဲကဵုညးဒးဒုၚ်ရပ်ဏာတအ်ဂှ် ကိုဝ်ဗလ သၟာတက္ကသဳ ဒၟံၚ်အရာပ်ကအ်သာန် ဍုၚ်ကျာ်ထဝ်၊ သမ္ဘာတၠသ္ၚိ ဒၟံၚ်ဂၠံၚ်သၞေဟ်ကွဳပၟတ်ကျာ်ထဝ် (၂)တၠကီု သီုမၞိဟ်တြုံ ဒၟံၚ်အရာပ်သၟဝ်ကျာ (၂)တၠ၊ အပံၚ်လၟိဟ်ကောန်အရာပ် (၅)တၠ ပါလုပ်ဒၟံၚ်ရဂှ် ညးဒေသတအ် ဟီုရ။
ညးဒေသဒးဒုၚ်ရပ်လဝ်တအ်ဂှ် ကံၚ်ဇြဳပၞာန် ပလံၚ်ဗစိုပ်လဝ် ဇရေၚ်ပရေၚ်စၟဳစၟတ် ဗဒိုပ်ဗၠာဲသၟိၚ်ၝောံဍုၚ်ကျာ်ထဝ်ရဂှ် ဂွံတီကေတ် နူညးလုက်စုက်ကဵု ကံၚ်ဇြဳပၞာန်တအ်ရ။
ပ္ဍဲကဵုပရေၚ်ဒဒှ်ဂကောံသ္ၚိကၟိန် ဥူအောၚ်လွေန် ဒးဒုၚ်ပန်ပှော်လဝ်ဂှ် သမ္ဘာညး ဒဝ်စန္ဒာသိုဝ် ဒးချိုတ်လဝ်တုဲ ကောန်ဗၠာဲညး မာံအောၚ်ညုၚ်မောၚ် အယုက် (၇)သၞာံဂှ်လေဝ် ဒးလဝ်ဘဲဝပ်လွဟ်မကမ်ရ။
ပ္ဍဲပွိုၚ်ဍုၚ်ကျာ်ထဝ်ဂှ်မ္ဂး မွဲကာလဒပ်ပၞာန်သီအဝဵုဏံ ဟိုတ်နူဒပ်ကံၚ်ဇြဳပၞာန် ထ္ၜးဟိုတ်နာနာ ရပ်စပ်ဒၟံၚ်တုဲ ညးဒေသ ဟွံအောန်နူ (၅၀)တၠ ဒးဒုၚ်ရပ်လဝ်တုဲ ပ္ဍဲကဵုဂှ် ညးဒေသ (၃၀)တၠပြၚ်တအ်ဂှ် ဒးဒုၚ်ဖျေံလဝ်ဒုဟ်ဒဏ်ထံၚ်ညးသ္ကအ်ရဂှ် ဂွံတီကေတ် အတိုၚ်တၚ်လဟီု ညးဒေသတအ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – CJ
sanlontai