ပ္ဍဲမုၚ် ဟိုတ်နူပရေၚ်ဗ္တိုက်တရဴကျာတုဲ ညးဒေသ (၅၀၀၀) ပြၚ် ဒးဂြိပ်ဒဴဒၟံၚ်

မုၚ်၊ သေပ်တေမ်ဗာ (၁၆)

ပ္ဍဲကဵုပွိုၚ်ဍုၚ်မုၚ်၊ ခရိုၚ်ညံၚ်လေဝ်ပေန်၊ ဗော်သွးကောန်ဂကူကရေၚ် KNU ဂှ် ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန် စွံပွန်လ္တူညးဍုၚ်ကွာန်ကောန်အရာပ်တံဂှ်တုဲ ညးဒေသ ၅၀၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ပ္ဍဲဂိတုသေပ်တေမ်ဗာ (၁၅) တေံ KNU ဗဟဵု လလောၚ်ပ္တိတ်လဝ်ရ။

ဒပ်ကံၚ်ဇြဳပၞာန်ဝွံ ပ္ဍဲဂိတုသေပ်တေမ်ဗာ (၁၄) စနူအခိၚ်နူဂယး (၁၁) နာဍဳပြၚ်တုဲ ပေါဲဗ္တိုက်ဟွံမွဲမွဲသာ် ပ္ဍဲကဵုကွာန်ဟဝ်ခိုဝ်ဂဝ်၊ မေဝ်တလေန် ကေုာံ ကွာန်သေန်ပလေဝ် မၞုံပွိုၚ်ဍုၚ်မုၚ် KNU ဂှ် ကၠုၚ်စိုပ်ပန်ပှော်ဏာလဝ် နကဵုက္ၜၚ်ကျာသၞေၚ်ဝဲ အရပ်စပ်ပ္ဍဲပရေၚ်ဗ္တိုက်တံ (၃) ဖ္ဍိုက် (၁၃) ဝါရ။

ဟိုတ်နူပရေၚ်ဗ္တိုက်တရဴကျာဂှ်တုဲ လၟိဟ်မၞိဟ် ၅၂၉၅ တၠ၊ ဂြောဝ်ဂတာ (၉၄၇) မၞုံပ္ဍဲကွာန်ထွာနဳကုန်၊ မေဝ်တလေန်၊ လူအယဲ၊ သေန်ပလေဝ်၊ ဝိုၚ်ကျဳ၊ ဟဝ်ခိုဝ်ဂဝ်တံဂှ်ဝွံ ထောံလသာသ္ၚိဌာန်တုဲ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ဂှ်ရ။

အပ္ဍဲပရေၚ်ဗ္တိုက်တရဴကျာဂှ် ညးဍုၚ်ကွာန်တံ ဇီုကပိုက်ဒးဟွံမွဲကီုလေဝ် စမြိုၚ်သ္ၚိဒၟံၚ် ညးဍုၚ်ကွာန်တံ လီုလာ်ဆောံလေၚ်အာတံ ဗွဲမဂၠိုၚ်နွံဒၟံၚ်ကီုလေဝ် ဟိုတ်နူဒပ်ကံၚ်ဇြဳပၞာန်တံ ဖျေံလဝ်သ္ဇိုၚ် အပ္ဍဲကဵုကွာန်ဂှ်ရ စရၚ်လီုလာ်ဆောံလေၚ် ချိုတ်တ်ပၠိုတ်တ်ဂှ် ကံက်ကပှ်ကေတ်ဟွံမာန်ဏီရောၚ် သ္ဂးရ။

သ္အာၚ်နူဂှ်ပၠန် ဟိုတ်နူဒှ်အခိၚ်ဗြဲတုဲ လၟိဟ်ဂြောဝ်ဂတာ (၃၆) နူကဵုကွာန်တမဝ် ကေုာံ ကွာန်ယာန်မျဵုအံၚ် ပွိုၚ်ဍုၚ်မုၚ်တံဂှ်ဝွံ ဒးဒုၚ်စသိုၚ်ဒၟံၚ် ဘဲဒဏ်ဍာ်ဇၞော်တံရောၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။

သွက်ညးဍုၚ်ကွာန် မ္ဒးဂြိပ်ဒဴပါဲဒလေတ်ဒၟံၚ် ဟိုတ်နူဘဲပၞာန်တံကဵု ဘဲအန္တရာယ်သဘာဝတံဂှ် နွံပၟိက်ဒၟံၚ် အရီုဗၚ် စပ်ကဵုပရေၚ်ဗ္စာရဏာမၞိဟ်ကာတၟေၚ် မပ္တံကဵုဇွောံမစၞစ၊ ဂဥုဲဇဗ၊ ဒၞါဲစ္ၜုဲစ္ၜော်တံရောၚ်ဂှ် KNU လလောၚ်ပ္တိတ်ကဵုလဝ်သမ္တီရ။

ဗီုဓာတ်−KNU

ပရိုၚ်−သြၚ်လောန်တိုၚ်(မ်)