ဖိတာနုက်တိတ် နူဒဒှ်က္ဍိုပ်သ္ကိုပ် ဗော် Move Forward

ၜၚ်ကံက်၊ သေပ်တေမ်ဗာ(၁၆)

ပ္ဍဲကဵုပေါဲရုဲမာဲကၟိန်ဍုၚ်သေံ ပ္ဍဲဂိတုမေတုဲကၠုၚ်ဏံ က္ဍိုပ်သ္ကိုပ်ဗော် Move Forward မဂွံဇၞးကေတ်လဝ်ဒၞာဲအမာတ်လၟိဟ်ဂၠိုၚ်အိုတ် ဖိတာလေန်ဂျာရွောတ်ဂှ် နုက်တိတ်အာ နူဒဒှ်က္ဍိုပ်သ္ကိုပ်ဗော်ရဂှ် လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ(၁၅)ရ။

​ဗော် Move Forward (MFP) သၟတ်ညးမကော်ချဴတအ် က္ဍိုက်လဝ်က္ဍိုပ်ဂှ် ပ္ဍဲကဵုပေါဲရုဲမာဲ က္ဍိုက်လဝ်က္ဍိုပ်ပ္ဍဲဒၞာဲလ္တူအိုတ် မာန်လဝ်တုဲ ပ္ဍဲကဵုသၞောတ်ပရေၚ်အုပ်ဓုပ် အလဵုအသဳပၞာန် ထံက်ဗက်ကဵုဒၟံၚ် လ္ပာ်လကြဴ ဗ္ဒာဲပွိုၚ်ဗွဝ်စှ်သၞာံဂှ် သ္ပလဝ်တံ နူကဵုပရေၚ်ကလိုက်ကၟဵု တၠဆန္ဒမာဲတအ်လေဝ် ဒှ်ရ။

ဆ္ဂးပ္ဍဲကဵုပါလဳမာန်ဂှ် ဟိုတ်နူဒးဒုၚ်တာဒၞာလဝ်ကဵု ဂကောံကွောန်သာဗေတေပ်တုဲ ဖိတာဂှ် ဟွံဂွံဒှ်ကၠုၚ်သ္ကိုပ်ဝန်ဇၞော်တုဲ လကြဴဏံ သီုဒးဒုၚ်စၟဳဗျူလဝ် နူဒဒှ်အမာတ်ကၠတ်ထဝ်ရ။

​ဗော် MFP ဂှ် နုက်တိတ်လဝ် နူဒဒှ်မဟာမိတ်ပံၚ်တောဲ ကရောံဗော်ပြိုၚ်ပ္ကာန်ဖွေအ်ထိုၚ် မဟီုဂးကၠုၚ် ဒက်ပ္တန်အလဵုအသဳပံၚ်တောဲ မွဲကရောံကဵုဗော်နွံပၟိက်ဒပ်ပၞာန်တအ်တုဲ သ္ပအာဗော်ဒစဵုဒစးရောၚ်ဂှ်လေဝ် ဒှ်ရ။

“သွက်ဂွံလးကဵုဂၠံၚ်ဍာန် အရၚ်အမာတ်ကၠတ်ထဝ် ရမျှာၚ်ဂွံတိတ် ပ္ဍဲပါလဳမာန်မွဲတၠဂှ် နုက်တိတ်လဝ် နူဒဒှ်က္ဍိုပ်သ္ကိုပ်ဗော် MFP ရ” ဂှ် ဖိတာ ချူပ္တိုန်လဝ် ပ္ဍဲမုက်လိက်ဇာနှိက်ပရေၚ်မၞိဟ်ဖေတ်သဗော်လုပ်သၞောဝ်ညးရ။

အတိုၚ်သၞောဝ်ဥပဒေသလၟုဟ်ဏံမ္ဂး က္ဍိုပ်သ္ကိုပ်ဗော်ဒစဵုဒစးဂှ် ဒးဒှ်ညးစၞးကၠတ်ထဝ်ရောၚ် ပါလုပ်ဒၟံၚ်ရ။

“ဒၟာနူဒးဒုၚ်စၟဳဗျူလဝ် ဌာနန္တရအမာတ်ပါလဳမာန်အဲတုဲ ကာလခြာဟွံလအ်ဏံ နဒဒှ်က္ဍိုပ်သ္ကိုပ်ဒစဵုဒစး နကဵုဌာနန္တရအမာတ်ကၠတ်ထဝ် နွံကၠုၚ်မာန်ဟွံသေၚ်ရ” ဂှ် ဖိတာချူပ္တိုန်လဝ်ရ။

ပ္ဍဲကဵုဂိတုဂျူလာၚ်တုဲကၠုၚ်တေံ စပ်ကဵုပရေၚ်ပိုၚ်ပြဳ ဂကောံယှေဝ်ယာညး ပ္ဍဲကုမ္ပဏဳဇြောယှေဝ်မဳဒဳယာ ပလီုသီရုပ်ဏာလဝ်တုဲမွဲဂှ် ဃောမၚ်ဒၟံၚ် တၚ်စဳရေၚ်ရုၚ်သၞောဝ်ဓဝ် သၞောဝ်သ္ဇိုၚ်ဒက်ပ္တန်ဂှ်ဟေၚ် ဒးဒုၚ်စၟဳဗျူလဝ် နူဒဒှ်အမာတ်ကၠတ်ထဝ်ရ။

အတိုၚ်သၞောဝ်သ္ဇိုၚ်ဒက်ပ္တန်သေံဂှ် အခေါၚ်အမာတ်ကၠတ်ထဝ်တအ် ပိုၚ်ပြဳဇြောယှေဝ်မဳဒဳယာလေဝ် တာဒၞာလဝ်ရ။ သ္အာၚ်နူဂှ်ပၠန် ပဳတာဂှ် ပါလုပ်ဒၟံၚ်ပ္ဍဲကဵုဗော် စုက်စုက်လုက်လုက်ရောၚ်ဂှ် ဟီုလဝ်ဏီရ။

“အခန်ကဏ္ဍအဲ ဗီုပြၚ်လဵုဒှ်ဒှ်ရ ဆက်ပါလုပ်အာဒၟံၚ် ပ္ဍဲ MFP တုဲ နကဵုစရာဲဍာ်ဒကေဝ်ပေၚ်ၚ် ပံၚ်တောဲကၠောန်ရေၚ်တၠုၚ်အာ ကရောံညးဍုၚ်ကွာန်တအ် စုက်က်လုက်က်ဏောၚ်” ချူပ္တိုန်ဓမံက်ထ္ၜးလဝ် ပ္ဍဲမုက်လိက်ဖေတ်သဗော်ညးရ။

Ref: CAN