အစောန်စရာဲဍာ်ဒကေဝ် ဒပ်ကံၚ်ဇြဳပၞာန် ခရိုဟ်စှ်ေဒၟံၚ်အိုတ်ယျ KNU ဟီု

မတ်မလီု၊ သေပ်တေမ်ဗာ (၁၇)

ဂိတုဏံမွဲဂိတုဟေၚ်ဂှ် ဒပ်ကံၚ်ဇြဳပၞာန် ဒးဒုၚ်ဆောံလေၚ်လဝ် ဗဒိုပ်ပၞာန် စဵုကဵု (၃)ဗဒိုပ် ပါဲနူသွာၚ်စိုတ်ဓာတ်တုဲ အစောန်စရာဲဍာ်ဒကေဝ် ခရိုဟ်လီုစှ်ေဒၟံၚ်အိုတ်ယျဂှ် ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ပဒိုဝ်သဝ်တဝ်နဳ ဟီုလဝ်ရ။

ဗဒိုပ်တေတ်ချဇြုက်၊ ဗဒိုပ်သာလဝ်ကျိုဝ်ခေဝ်ပူ ကေုာံဗဒိုပ်ယျေတလျောက် မၞုံပ္ဍဲတိဍာ်အုပ်ဓုပ် KNU (၃)ဗဒိုပ်တအ်ဂှ် နူဂိတုသေပ်တေမ်ဗာ စၟတ်တ္ၚဲ (၁)စဵုကဵုစၟတ်တ္ၚဲ (၁၄) ပ္ဍဲပွိုၚ်ၜါသတ္တာဟဂှ် ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ဗတိုက်သီကေတ်မာန်လဝ်ရ။

ပ္ဍဲကဵုဂှ် ဗဒိုပ်ယျေတလျောက် မၞုံဗ္ဒာဲပယျဵု သေံ-ဗၟာ ပွိုၚ်ဍုၚ်လှာဒကှ်၊ တွဵုရးကရေၚ် ဗတိုက်သီကေတ်လဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၄) ဂှ်မ္ဂး ပ္ဍဲအခိၚ်ပွိုၚ် (၂၅)မိနေတ်ဓဝ် ဒပ်ပံၚ်ကောံ KNLA တအ် ဗတိုက်သီကေတ်လဝ် သီုအလုံဗဒိုပ်မွဲ သီုဖအိုတ် မာန်လဝ်ရ။

ပ္ဍဲပေါဲဗတိုက်သီဗဒိုပ်ယျေတလျောက်ဂှ်မ္ဂး လ္ပာ်ဒပ်ကံၚ်ဇြဳပၞာန် ဒးချိုတ်လဝ် (၉)တၠတုဲ ကောန်ဒပ်ကံၚ်ဇြဳပၞာန် သှ်ေနူဂှ်တအ် ဂြိပ်တိတ်ဗၠးအာလဝ် နွံတုဲ လွဟ်လက်နက်မကမ်ဗွဲမဂၠိုၚ်ဂှ်လေဝ် ဂကောံဒပ်ပၠန်ဂတး ပံၚ်ကောံ KNLA တအ် သီဂွံလဝ်ရ။

“အခိၚ်ဒှ်လဝ်ပေါဲဗတိုက် ပွိုၚ်ကဝက်နာဍဳ ဟွံပေၚ်ပုဟ်။ ဗဒိုပ်စှ်ေအာရ။ ကာလရံၚ်ကေတ် ကပေါတ်လွဟ်လက်နက်ပၞာန်ဍေံတအ် ဖအိုတ်ဂှ် ကပေါတ်လွဟ်လက်နက်ပၞာန်ဂှ် ညိညဓဝ် ဟွံသေၚ်ပုဟ်ဏး။ ဒးဖ္ဍိုက်ကဵုကွဳစက် မူစိဖ္ဍိုက်ဟွံတီရ။ လွဟ်လက်နက်မကမ် ဂၠိုၚ်ဂလိုၚ်ဏံ ယဝ်ရဍေံတအ်ဒုၚ်ဗတိုက်တှ်ေ ဗတိုက်ဂွံဒၟံၚ် တၟာဂလိုၚ်ဏီ။ ဆ္ဂးပွိုၚ် ၂၅ မိနေတ်ဓဝ်စှ်ေအာဟီုတှ်ေ ဣဏံဂှ် ယဝ်ဒးဟီုကၠးကၠးတှ်ေ စရာဲဍာ်ဒကေဝ်ဍေံတအ်ကီု သွာၚ်စိုတ်ဓာတ်ဍေံတအ်ကီု ခရိုဟ်လီုစှ်ေအာအိုတ်ယျဟီုဂှ် ကၠးသောၚ်ဒၟံၚ်ရ”ဂှ် ညးမၞုံအခေါၚ်ဟီုဂး KNU ပဒိုဝ်သဝ်တဝ်နဳ ဟီုလဝ်ရ။

လၟုဟ်ဏံလေဝ် ဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲဂကောံကွာန်ခလေဝ်တခေါန်ဒေၚ် တိဍာ်ဒပ်မဟာ (၆) ပွိုၚ်ဍုၚ်လှာဒကှ် တွဵုရးကရေၚ်ဂှ်ကဵု ဒပ်ပံၚ်ကောံ KNLA တအ် အကာဲအရာပၞာန် ကြံၚ်မ္ၚိုဟ်ဒၟံၚ်တုဲ ပ္ဍဲကဵုဗဒိုပ်ကွဳလုမ်ကံၚ်ဇြဳပၞာန် ကြပ်ဒၟံၚ်ကဵုပယျဵုသေံ-ဗၟာ လ္ပာ်လ္တူဍုၚ်ကြုၚ်ဒဵု ပွိုၚ်ဍုၚ်လှာဒကှ်ဂှ်လေဝ် ဂကောံဒပ်ပံၚ်ကောံတအ် စဗတိုက်လဝ် ပ္ဍဲဂိတုအဝ်ဂါတ် စၟတ်တ္ၚဲ (၂၄)တုဲကၠုၚ်တေံရ။

ညံၚ်ဗဒိုပ်ကွဳလုမ် ဟွံဂွံစှ်ေအာဂှ် ကရောၚ်ပၞာန်ကံၚ်ဇြဳပၞာန် ပလံၚ်ဗလးနၚ်ပၞာန်ရီုဂှ်လေဝ် ဂကောံပၠန်ဂတး KNLA တအ် ကြတ်ဗတိုက်လဝ်တုဲ ဒပ်ကံၚ်ဇြဳပၞာန် ဒးဂြိပ်တိတ်အာ လ္ပာ်တိဍာ်သေံ နွံဒၟံၚ်ရဂှ် တံရိုဟ်တၚ်ဂၞၚ်ပရိုၚ်တအ် ဟီုလဝ်ရ။

ဗဒိုပ်ကံၚ်ဇြဳပၞာန်တအ်ဂှ် ဒပ်ပံၚ်ကောံပၠန်ဂတး KNLA တအ် တ္ၚီုက္ဍိုက်ဗတိုက်ကီု၊ ဒမၠုက်ပန်ပှော်ကီု သီုကဵုကြတ်ဗတိုက် ကရောၚ်ပၞာန်ကံၚ်ဇြဳပၞာန်တအ်ဂှ် ဟိုတ်နူကၠောန်သ္ပဒၟံၚ် အရိုဟ်ဟ်တ္ၚဲတုဲ လ္ပာ်ဒပ်ကံၚ်ဇြဳပၞာန် ညးဒးချိုတ် ဇီုကပိုက်ဒးလဝ်ဘဲဝပ် သာဂၠိုၚ်ကၠုၚ်တုဲ သွာၚ်စိုတ်ဓာတ်လေဝ် စှ်ေဒၟံၚ်တုဲ ပရေၚ်ကၠုၚ်ပံၚ်တောဲကဵု KNU နွံဒၟံၚ်ရဂှ် ခရိုၚ်ဒူပလာယာလေဝ် လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU