ထဝါဲ၊ သေပ်တေမ်ဗာ(၁၇)
ရးဒေသဇၞော်တၞၚ်သြဳ၊ ပွိုၚ်ဍုၚ်ထဝါဲ၊ ဗ္ဒာဲကွာန်မောၚ်မေဝ်ယှောၚ်ဂှ် ဒပ်ကံၚ်ဇြဳပၞာန် ကၠုၚ်ကေတ်ဒၟံၚ်ဂီုကၠီု ဂၠံၚ်တရဴဝန်ဇၞော်ဂှ် ဟိုတ်နူဒးဒုၚ်ဗတိုက်လဝ်တုဲ ကောန်ဒပ်ကံၚ်ဇြဳပၞာန် (၅)တၠ ဒးချိတ်လဝ်ရဂှ် ဂွံတီကေတ် နူဇရေၚ် ဒပ်ပၠန်ဂတး ပၠန်ဂတးထဝါဲ (DGRF)ရ။
ဒပ်ကံၚ်ဇြဳပၞာန် ကၠုၚ်ကေတ်ဂီုကၠီု ဂၠံၚ်တရဴဝန်ဇၞော် ဇြဟတ်နွံ ဗ္ဒာဲ (၇၀)ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၅)အခိၚ်နူဂယး ၜိုတ် (၇)နာဍဳ ဒပ်ဒမၠုက်ပၠန်ဂတးထဝါဲ (DGRF) ပန်ဗတိုက်လဝ်ကဵု သနိုက်ဗာကၠာရ။
ဟိုတ်နူဒးဒၚ်ပန်ပှော်လဝ်ကဵုသနိုက်ဗာတုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၂)တၠတုဲ ကြဴနူပရေၚ်ပရောဏံ က္တဵုဒှ်တုဲ အကြာဒပ်ကံၚ်ဇြဳပၞာန်ကဵု ဒပ်စဵုဒၞာဒေသတအ် ပေါဲဗတိုက်ၜါလ္ပာ် ထပ်က္တဵုဒှ်လဝ် ဗ္ဒာဲကဝက်နာဍဳရ။
ပ္ဍဲပရေၚ်ပန်ပှော်ၜါလ္ပာ်ဏံ ကောန်ဒပ်ကံၚ်ဇြဳပၞာန် ဟွံအောန်နူ (၃)တၠ ဒးထပ်ချိုတ်လဝ်နွံတုဲ ညးဒးလဝ်ဘဲဝပ်လေဝ် နွံရဂှ် ညးတာလျိုၚ်လလောၚ်ပရိုၚ် ဒပ်ဒမၠုက်ပၠန်ဂတးထဝါဲ (DGRF) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ကြဴနူပန်ပှော်တုဲ အခိၚ်ၜိုတ် (၁၂)နာဍဳဒေါဝ်တ္ၚဲ ဃောဝန်ဇၞော်ကံၚ်ဇြဳပၞာန်မွဲတၠ ကၠုၚ်စိုပ်ဇရေၚ်တက္ကသိုလ်နဲကဲကွတ်ပညာထဝါဲဂှ် ချိၚ်ချပန်ပှော်လဝ် လၟေၚ်ဂၠံၚ်တရဴဴဝန်ဇၞော်တုဲ ဃောဆက်လ္ၚတ်ဂၠိုက်ဂၠာဲဒၟံၚ် အကာဲရာဇီုကပိုက်ဒးလဝ်ရဂှ် ဟီုလဝ်ရ။
ပရေၚ်ပန်ပှော်ဏံ ဒပ်ပံၚ်တောဲ ဒပ်ဒမၠုက် ပၠန်ဂတးထဝါဲ (DGRF)ကေုာံ ကရောၚ်ပၞာန်ဥဩတအ် ကၠောန်ချဳဒရာၚ်လဝ်ရဂှ် ဂွံတီကေတ်ရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၁၁)တုဲကၠုၚ်တေံလေဝ် သၞေဟ်ကၚ်ကျာ်ဗ္စံက်ကံၚ်ဇြဳပၞာန် မၞုံဗ္ဒာဲကွာန်မောၚ်မေဝ်ယှောၚ်ဂှ် ဒးဒုၚ်ပန်လဝ်ကဵုသနိုက်ဗာတုဲ ကောန်ဒပ်ကံၚ်ဇြဳပၞာန် ဒးချိုတ်လဝ် (၂) တၠဏီရ။
ပရိုၚ် – သြၚ်လောန်တိုၚ်(မ်)
ဗီုရုပ် – DGRF
sanlontai