ပ္ဍဲကျာ်ထဝ်ကဵုသဓီု ဟိုတ်နူလွဟ်ဇၞော်စှ်ေတုဲ ပါလုပ်သီုကောန်ၚာ် ဒးလဝ်ဘဲဝပ် (၆) တၠ

ကျာ်ထဝ်၊ သေပ်တေမ်ဗာ(၁၇)

တွဵုရးဍုၚ်မန်၊ ပ္ဍဲပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်သဓီုဂှ် လောန်ကၠုၚ်မွဲၜါတ္ၚဲဏံ နူဒပ်ကံၚ်ဇြဳပၞာန် ဟိုတ်နူပန်ဖျေံနၚ်လွဟ်ဇၞော်တုဲ ပါလုပ်သီုကောန်ၚာ်မွဲတၠ ကောန်အရာပ် ဒးလဝ်ဘဲဝပ် (၆)တၠရဂှ် ညးဒေသတအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၁၄)တုဲကၠုၚ်တေံ ကြဴနူဗဒိုပ်ဗၠာဲသၟိၚ်တိဍာ်တုၚ်ဇြယာတ် ဒးဒုၚ်ဗတိုက်လဝ်တုဲ ဟိုတ်နူပန်ဖျေံလဝ်လွဟ်ဇၞော် နူကဵုဒပ်ကံၚ်ဇြဳပၞာန်ကြာန်န်တုဲ ဒတုံစှ်ေပါ်ခတိုဟ်လဝ် ပ္ဍဲအရာပ်ယွာလေဝ် ပါ်ခတိုဟ်လဝ်ဂှ်ရ ကောန်ဒေသ ဒဝ်ဌေဌေမဝ် အယုက် (၃၃)သၞာံ ကေုာံ သၟတ်ဗြဴအယုက် (၁၆)သၞာံမွဲတၠ ဒးလဝ်ဘဲဝပ် လွဟ်မကမ်ရ။

ကြဴနူဂှ် ပ္ဍဲဂတုသေပ်တေမ်ဗာ စၟတ်တ္ၚဲ (၁၅)တေံလေဝ် နူကဵုတံဒပ်ကံၚ်ဇြဳပၞာန် ဖျေံသ္ဇိုၚ်တုၚ်ဇြယာတ် ၂ တံဒပ် ပန်ဖျေံလဝ်လွဟ်ဇၞော် ပ္ဍဲကွာန်ဝါဒေတ်ကွေန် ကေုာံကွာန်တုမ်ခွယျေကျဝ်တအ် ဟွံအောန်နူ (၁၀)မရ။

ဟိုတ်နူလွဟ်ဇၞော်ဒပ်ကံၚ်ဇြဳပၞာန် ပန်ဖျေံလဝ်တုဲ ဥူဝေန်လှာၚ်အယုက် (၄၅)သၞာံ ဒၟံၚ်ကွာန်တုမ်ခွယျေကျဝ် ကေုာံညးသမ္ဘာညး ဒဝ်တာန်တာန်အေတအ် ဒးလဝ်ဘဲဝပ်လွဟ်မကမ်တုဲ ပလံၚ်ဗစိုပ်လွဳလွတ်ဒၟံၚ် ပ္ဍဲရုၚ်ဂဥုဲညးဍုၚ်ကွာန် ခရိုၚ်သဓီုရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၈)တုဲကၠုၚ်တေံလေဝ် နူကဵုဗဒိုပ်ပုၚ်နေဝ်တဝ်ကံၚ်ဇြဳပၞာန် ဖျေံသ္ဇိုၚ်ပွိုၚ်ဍုၚ်သဓီု ဟိုတ်နူပန်ဖျေံလဝ်လွဟ်ဇၞော် (၄)မတုဲ မောၚ်ဇြဝ်ဖျိုဝ်ဥူ အယုက် (၁၃)သၞာံ ကေုာံနဝ်ခိုၚ်ၚ်အယုက် (၃၈) သၞာံတအ် ဒးလဝ်ဘဲဝပ်ညးသ္ကအ်အိုတ်ရ။

ဟိုတ်နူလွဟ်ဇၞော်ဒပ်ကံၚ်ဇြဳပၞာန် ပန်ဖျေံလဝ်တုဲ သ္ၚိဒၟံၚ်ညးဍုၚ်ကွာန်ပိုၚ် (၇)မ ဇီုကပိုက်ဒးလီုလာ်လဝ်ရဂှ် ဂွံတီကေတ်နူ တၚ်လလောၚ်တြး KNU ခရိုၚ်သဓီုရ။

ပ္ဍဲကဵုခရိုၚ်သဓီု KNU ဂှ် အကြာမွဲၜါတ္ၚဲဏံ ဟိုတ်နူလွဟ်ဇၞော် ပန်ဖျေံနၚ် နူဒပ်ကံၚ်ဇြဳပၞာန်တုဲ ကောန်အရာပ်ညးဍုၚ်ကွာန် ၅၀၀၀ တၠပြၚ် ဒးဂြိပ်ဒဴပါဲဓလေတ်ဒၟံၚ်တုဲ နွံဒၟံၚ်ပၟိက်ကဵု အရီုဗၚ်ဗ္စာရဏာပရေၚ်မၞိဟ်ရဂှ် ဂကောံညးအရာပ်ကရေၚ်တအ် ပ္တိတ်တၚ်လလောၚ်တြး ကဵုလဝ်သမ္တီရ။

ပရိုၚ် -သြၚ်လောန်တိုၚ်(မ်)

ဗီုရုပ် – KNU