ပလဝ်၊ သေပ်တေမ်ဗာ (၁၇)
ကွာန်လေက္ကူ၊ ပွိုၚ်ဍုၚ်ပလဝ်၊ ရးဒေသဇၞော်တၞၚ်သြဳ ပေါဲဗတိုက်ဒှ်ဒၟံၚ်ဂှ် ဟိုတ်နူဒပ်ပၞာန်စံၚ်ပလီုဒၟံၚ်တုဲ သ္ၚိဒၟံၚ်ဟွံအောန်နူ (၁၀)မ တူပၟတ်ဒးလီုလာ်လဝ်ရဂှ် ဂွံတီကေတ် နူဂကောံဇြဟတ်ပၠန်ဂတးတအ်ရ။
ကရောၚ်ပၞာန်ကံၚ်ဇြဳပၞာန် ဇြဟတ်နွံ ဗ္ဒာဲ ၁၀၀ ဂှ် သ္ပတံနူဂိတုသေပ်တေမ်ဗာ စၟတ်တ္ၚဲ (၁၄)တေံတုဲ ဟိုတ်နူထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်လေက္ကူတုဲ စဒှ်လဝ်ပေါဲဗတိုက် အကြာဒပ်ပံၚ်ကောံ ဒပ်စဵုဒၞာဒေသတအ်ရ။
ကြဴနူပေါဲဗတိုက်ဒှ်လဝ်တုဲဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၅) ဒပ်ကံၚ်ဇြဳပၞာန် လုပ်စိုပ်ကၠုၚ် ပ္ဍဲကွာန်လေက္ကူတုဲ စံၚ်ပလီုဒၟံၚ် သ္ၚိဌာန်ညးဍုၚ်ကွာန်တအ်ရ။
ဟိုတ်နူဒပ်ကံၚ်ဇြဳပၞာန်စံၚ်ပလီုလဝ်တုဲ ပြဟ်ဟ်ဏံ သ္ၚိဒၟံၚ်ဟွံအောန်နူ (၁၀)မ ဒးတူပၟတ် လီုလာ်လဝ်တုဲ ဟိုတ်နူဒပ်ကံၚ်ဇြဳပၞာန် နွံဒၟံၚ်ပ္ဍဲကွာန်တုဲ လၟိဟ်ချိုတ်တ်ပၠိုတ်တ် ဟွံဂွံတီကေတ်ဏီရဂှ် ညးတာလျိုၚ်လလောၚ်ပရိုၚ် ခရိုၚ်ဗိက် တံဒပ်လၟိဟ် (၁) ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ဟိုတ်နူပေါဲဗတိုက်တုဲ ညးဒေသ နူကွာန်လေက္ကူ ဒးဂြိပ်ဒဴဴပါဲဓလေတ် ဒၟံၚ်သီုအလုံကွာန်မွဲတုဲ ကောန်ကွာန် ၜိုတ် ၁၀၀ ဂှ်မ္ဂး ဒးဒုၚ်ကၟာတ်ဂွံလဝ် ပ္ဍဲဘာလကျာ်ကွာန်ရဂှ် ဂွံတီကေတ် အတိုၚ်လဟီု ညးဒေသတအ်ရ။
ပေါဲကဵုဗတိုက်တအ်ဂှ် တ္ၚဲဏံဂိတုသေပ်တေမ်ဗာ စၟတ်တ္ၚဲ (၁၆)ဏံလေဝ် ပေါဲဗတိုက်ဆက်ဒှ်ဒၟံၚ်တုဲ ဟွံဂွံတီကေတ် အကာဲအရာဇီုကပိုက် သောဲသောဲဗြောဲဗြောဲဏီရ။
ပ္ဍဲရးဒေသဇၞော်တၞၚ်သြဳဂှ် ပ္ဍဲဂိတုအဝ်ဂါတ်တုဲကၠုၚ်တေံ ဒပ်ကံၚ်ဇြဳပၞာန် စံၚ်ပလီုပလာ်လဝ် သ္ၚိဌာန်ညးဍုၚ်ကွာန် ဗ္ဒာဲ (၂၀)မရဂှ် ဂကောံသုတေသန ပ္ဍဲဒေသဂှ် လလောၚ်တြးလဝ်ရ။
ပရိုၚ်- သြၚ်လောန်တိုၚ်(မ်)
ဗီုရုပ် – CJ
sanlontai