ၜၚ်ကံက်၊ သေပ်တေမ်ဗာ(၁၇)
ပရေၚ်သုၚ်စောဲဂဥုဲဘၚ် သွက်ဂွံပရေလၟောၚ်ဂှ် ဒဒှ်ရဒစဵုဒစးပေၚ်ၚ်ကီု နကဵုဂကောံပရေၚ်အုပ်ဓုပ်ညးတအ်လေဝ် ဖျေံအာမူဝါဒ သွက်ဂွံသုၚ်စောဲဂဥုဲဘၚ် အရာဆေၚ်စပ်ကဵုသွာၚ်ဂဥုဲဟေၚ်ရောၚ်ဂှ် သ္ကိုပ်ဝန်ဇၞော်သေံတၟိ ဆထရဳထာတာဗဳဇြေန် ဟီုလဝ်ရ။
ကၟိန်ဍုၚ်သေံဂှ် ပ္ဍဲသၞာံ ၂၀၂၂ တေံ ဒှ်ကၠုၚ်ကၟိန်ဍုၚ် ပိုၚ်ခြာပါဲပ္တိတ်လဝ် ဂဥုဲဘၚ် နူကဵုဒဒှ်ဂဥုဲၜူမာဲ ပ္ဍဲအာယှဒိုဟ်အဂၞဲ မွဲကၟိန်ဍုၚ် အလန်ကိုပ်ကၠာအိုတ်ရ။
“မူဝါဒဂဥုဲဘၚ်ဂှ် သွက်ဂွံသုၚ်စောဲ ပ္ဍဲအရာဆေၚ်ကဵုသွာၚ်ဂဥုဲဟေၚ် ဆက်ကၠောန် ရေၚ်တၠုၚ်အာဏောၚ်။ အကာဲအရာသုၚ်စောဲ သွက်ဂွံပရေလၟောၚ်ဂှ် ပိုဲတုပ်စိုတ်ဟွံမာန်လးလးပုဟ်”ဂှ် မာဿတာဆရဳထာ ဟီုလဝ်ကဵုဌာန်ပရိုၚ် The Standard ဖျေံသ္ဇိုၚ်ဍုၚ်သေံရ။
ဂကောံအလဵုအသဳပံၚ်ကောံ ဗော် ၁၁ ဗော် ဗော် Pheu Thai က္ဍိုက်လဝ်က္ဍိုပ်ဂှ် စကေတ်လဝ်အဝဵု ပ္ဍဲဂိတုအဝ်ဂါတ်တုဲ လက်ထက်အလဵုအသဳကၠာတေံ ဗော် Bhumjaithai မဒှ်ဗော်မဟာမိတ်ညးတအ်ဇၞော်အိုတ်ဂှ် ပါဲပ္တိတ်လဝ် ဂဥုဲဘၚ် နူကဵုဒဒှ်ဂဥုဲၜူမာဲရ။
သီုၜါဗော်ဏံဂှ်မ္ဂး သွက်ဂွံသုၚ်စောဲဂဥုဲဘၚ် ပ္ဍဲအရာသွာၚ်ဂဥုဲဇဗဟေၚ် ထံက်ဂလာန်ရောၚ်ဂှ် တၚ်ဟီုဂးလဝ်လေဝ် နွံရ။
ကၟိန်ဍုၚ်သေံဂှ် နူကဵုကမၠောန်ကၠောန်ပ္တိတ်၊ သွံရာန် ဂဥုဲဘၚ်ဂှ် အာဂတနူဏံ (၅)သၞာံမ္ဂး စဵုကဵုၚုဟ်မးဒဝ်ဠာအမေရိကာန် ၁ ဒသမ ၂ ဗဳလျာန် သွက်ဂွံထံက်ပၚ် ကဵုအခေါန်မာန်ဂှ် စဳမာန်ရေၚ်တၠုၚ်လဝ်ရ။
“ပရေၚ်ဟွံဂရုကဵုဂဥုဲဇဗ သွက်ကၟိန်ဍုၚ်ဏံ ဒှ်ဒၟံၚ်ပြဒ္ဒညာဇၞော်ဇၞော် မွဲတန်တုဲ အကာဲအရာရပ်စပ် ကိစ္စတအ်ဏံ ဇြဟတ်ဍိုန်ဒၟံၚ်ရ။ ဂဥုဲဘၚ်ဂှ် သွက်ဂဥုဲဇဗဟေၚ် ထေက်ကဵုဒးသုၚ်စောဲရ”ဂှ် မာဿတာဆရဳထာ ထပ်ဟီုဂးလဝ်ရ။
ကၟိန်ဍုၚ်သေံ ပိုၚ်ပြဳလဝ်ကမၠောန်ပရေၚ်ပိုန်ဒြပ် ဇၞော်အိုတ်မရနုက်ကဵုဒုတိယ ပ္ဍဲအာယှဒိုဟ်အဂၞဲဂှ် ပ္ဍဲလက်ထက်အလဵုအသဳတၟိဏံ မူဝါဒပရေၚ်ပိုန်ဒြပ် ရန်လဝ်သွက်ဂွံသၠုၚ် ပတိုန်ဗ္ၜတ်ပရေၚ်ရေၚ်တၠုၚ် ညးသုၚ်စောဲ ကေုာံ စရိတ်အသုၚ်စောဲဂှ်လေဝ် လလောၚ်တြးလဝ်ရ။
မူဝါဒကဵုအာ ကောန်ဍုၚ်သေံ လ္တူအယုက် (၁၆)သၞာံတအ် မွဲတၠမ္ဂး ၝာတ် ၁၀,၀၀၀ နကဵုသြန်ဒေတ်ဂျေတ်တေဝ်ဂှ်လေဝ် ထ္ပက်လဝ်စၟတ်တဲတုဲ မူဝါဒဏံ သၠုၚ်ပတိုန်စရိတ်သုၚ်စောဲပ္ဍဲဍုၚ် သၠဲသၠဲလးလးမာန်ရောၚ်ဂှ်လေဝ် သ္ကိုပ်ဝန်ဇၞော်သေံ ဟီုသ္ဂးလဝ်ရ။
Ref – REUTERS
sanlontai