မတ်မလီု၊ သေပ်တေမ်ဗာ (၁၇)
ၚုဟ်နှေန်လှုဲဍုၚ်သ္အာၚ်တံ ကလေၚ်စှ်ေကၠုၚ်ကီုလေဝ် ၚုဟ်ကၠေၚ်စက်ကံၚ်ဇြဳပၞာန် မထိၚ်ဒက်လဝ်ဂှ်ဝွံ အရိုဟ်ဒဒှ်တ္ၚဲ ထပ်သၠုၚ်တိုန်ကၠုၚ်ဒၟံၚ်ရောၚ် တၠကမၠောန်ပရေၚ်သွံရာန်ကၠေၚ်စက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်လှုဲဍုၚ်သ္အာၚ် မသၠုၚ်ဒၟံၚ်သၟးဂှ်ဝွံ စနူဂိတုသေပ်တေမ်ဗာ သတ္တာဟပထမဂှ်တုဲ ဒဝ်ဠာအမေရိကာန် မွဲဒဝ်ဠာဂှ် နူကဵု (၃၉၀၀) ဂှ် ၚုဟ်စှ်ေအာ စဵုကဵု (၃၄၀၀) ဒ္ကေဝ်ပြၚ်တုဲ ၚုဟ်လှုဲသေံဂှ်လေဝ် မွဲၝာတ် နူကဵု (၁၂၀) ဒ္ကေဝ်ပြၚ်ဂှ် ၚုဟ်စှ်ေကၠုၚ် စဵုကဵု (၉၉) ဒ္ကေဝ်ရ။
ၚုဟ်လှုဲဍုၚ်သ္အာၚ်တံ ကလေၚ်စှ်ေကၠုၚ်ကီုလေဝ် ကၠေၚ်ဓာတ် ၉၅ မွဲလဳတာ ၚုဟ်မၞုံလဝ် ၜိုတ် ၂၄၀၀ ဒ္ကေဝ်ဓဝ်ဂှ်ဝွံ ၚုဟ်သၠုၚ်တိုန်ကၠုၚ်လဝ် စဵုကဵု ၂၆၀၀ ဒ္ကေဝ်တုဲ ကၠေၚ်ဓာတ် ၉၂ မွဲလဳတာဂှ်လေဝ် နူကဵု ၂၃၀၀ ဒ္ကေဝ်ဂှ် ၚုဟ်ဗက်သၠုၚ်တိုန်ကၠုၚ် စဵုကဵုပွဳပွူ ၂၅၀၀ ဒ္ကေဝ်ရ။
သ္အာၚ်နူဂှ်ပၠန် ပရဳမဳယာန်ဒဳဇြေဝ်ဂှ်လေဝ် မွဲလဳတာ နူကဵု ၂၅၀၀ ဒ္ကေဝ်ဂှ် ၚုဟ်သၠုၚ်တိုန်ကၠုၚ် စဵုကဵု ၂၈၀၀ ဒ္ကေဝ်၊ ကၠေၚ်ဒဳဇြေဝ်ဓမ္မတာဂှ် နူကဵု ၂၅၀၀ ဒ္ကေဝ်ဂှ် ၚုဟ်ထပ်သၠုၚ်တိုန်ကၠုၚ် စဵုကဵု ၂၇၀၀ ဒ္ကေဝ်ရ။
ၚုဟ်ကၠေၚ်စက်ဝွံ ကရောံၚုဟ်ကၠေၚ်စက်ဂၠးတိ ကလေၚ်သၠုၚ်တိုန်ကၠုၚ်ဂှ် ဟိုတ်နူပရေၚ်ထိၚ်ဒက်သၞောတ်ဗ္ၜတ် ကံၚ်ဇြဳပၞာန်တံတုဲ ၚုဟ်ထပ်သၠုၚ်တိုန်ကၠုၚ်လဝ်ရောၚ် တၠကမၠောန်သွံရာန်ကၠေၚ်စက်မွဲတၠ ဟီုရ။
“ကၠေၚ်ဂှ်တှ်ေ ၚုဟ်ဂၠးတိတိုန်တုဲ တိုန်ကီုရ။ ၚုဟ်သေန်ကာပေါဝ်တိုန်တုဲ တိုန်ကီုရ။ ယဝ်ၚုဟ်ဂၠးတိစှ်ေတှ်ေ ဍေံဂှ် ဗက်စှ်ေလွာဲဂှ်ရ။ ၚုဟ်ဂၠးတိတိုန်တှ်ေ ဗက်တိုန်လွာဲဂှ်ရ။ လၟုဟ် အခိၚ်ဍေံဂြဲဖျေံဒၟံၚ်အရာရာအိုဿီုဂှ် ကၠေၚ်ဂှ်ၚုဟ်တိုန်ဒၟံၚ်ရ။ တိုန်ဒၟံၚ်ဟီုဂှ်လေဝ် အခိၚ်လၟုဟ် ဒးဟီုသောၚ်ၚ်မ္ဂး ၚုဟ်ဂၠးတိဂှ်တိုန်ဒၟံၚ်ကွေံကွေံရ။ ၚုဟ်သေန်ကာပေါဝ် နူကဵု (၁၀၀) ပြၚ်ၚ် (၉၀) ပြၚ်ဂှ် လၟုဟ်ဒှ်အာ ၜိုတ် (၁၃၀) ပြၚ်ယျ။ ၚုဟ်လၟုဟ်တံဂှ် ဒးဟီုသောၚ်ၚ်မ္ဂး အတိုၚ်ၚုဟ်ဍေံတံ မစၞောန်လဝ်ဂှ် ဟွံသွံမ္ဂး ဒးဒဏ်သၟးဟွံသေၚ်ရပုဟ်။ ဒးကၟာတ်မွဲအလန်ဓဝ်တံဂှ် ပါကၠုၚ်ရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲကဵုဒၞါဲရာန်ကၠေၚ်စက်တံဂှ်လေဝ် ဟိုတ်နူကံၚ်ဇြဳပၞာန် ထိၚ်ဒက်လဝ်ဂှ်ရ အခိၚ်ၚုဟ်ကၠေၚ်စက်ဂၠးတိ စှ်ေဒၟံၚ်ဂှ် ၜိုတ်ဒးစိုတ် ရာန်ကေတ်ဟွံဂွံဂှ်ကီု၊ ၚုဟ်ကၠေၚ်စက် မပြံၚ်လှာဲကၠုၚ်ဒၟံၚ်တံဂှ် ဟိုတ်နူဒးရာန်ကေတ် နကဵုၚုဟ်က္ဍၚ်ၚ်တံဂှ်တုဲ ဒးဂဗဒၟံၚ်ကဵု ၚုဟ်ကၠေၚ်က္ဍၚ်တိုန်ကၠုၚ်တံ တီတီရောၚ်ဂှ် ညးဆက်ဟီုရ။
ညးလိၚ်ဒဳယာန်မွဲတၠဂှ်လေဝ် ၚုဟ်ကၠေၚ်စက်တံ ဆက်သၠုၚ်တိုန်ကၠုၚ်ဂှ်ရ သွက်ဂွံဆက်ကၠောန်ကမၠောန်လိၚ်ဒဳယာန်တံဂှ် ဒးဂဗဒၟံၚ် အခက်အခုဲနာနာသာ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တၚ်ဝါတ်ဂါတ်ဂှ် ဒှ်အာတၟာဂလိုၚ်ယျ။ မူဟိုတ်ရောဟီုတှ်ေ အာမွဲတရဴဂှ် လ္တူနူကဵုကၠောန်မွဲတ္ၚဲစမွဲတ္ၚဲဂှ် သြန်လုပ်ဂှ်မွဲဆ၊ သြန်တိတ်ဂှ် ဒှ်ဒၟံၚ်ၜိုတ်ပိဆဏောၚ်။ ၚုဟ်ဒှ်ဒၟံၚ်လၟုဟ်ဂှ်လေဝ် ကၠာတေံဂှ်လေဝ် အာမွဲလ္တုန်မ္ဂး ဂွံၜိုတ် (၃၀၀၀) ရ။ လၟုဟ်လေဝ် အာမွဲလ္တုန်မ္ဂး ဂွံၜိုတ် (၃၀၀၀) ရဏောၚ်။ လၟုဟ်အခိၚ်ကၠောန်ဒၟံၚ်ကမၠောန်ဂှ် ဂွံဂွံခရိတ်ကၠေၚ်ရဂှ် ဒးဂ္စါန်ဒၟံၚ်ကၠာဏောၚ်။ ကဵုၚုဟ်ကၠေၚ်ဏံဂှ်တှ်ေ ဂွံဆက်ကၠောန်အာဂတတေံဟီုဂှ် ဟွံလောဲသွာပုဟ်။ တၚ်ခက်ခုဲတံဂှ်တှ်ေ သာတုဲသၠုၚ်အာယျ။ နကဵုညးဍုၚ်ကွာန်မွဲမ္ဂး ညအ်ဂှ် ဒှ်သွဟ်ဟွံခိုဟ်မွဲပေၚ်ၚ်ရ။ ပိုယ်တံဂှ် ကၠာဂွိုအ်သီအဝဵုတေံဟီုမ္ဂး ပိုယ်တံ ဒဳကၠုၚ်လဝ် နကဵုကၠေၚ်စက် မွဲလဳတာ (၆၀၀) ပြၚ်ရ။ လၟုဟ် ကၠေၚ်စက်မွဲလဳတာ ဂွံပေၚ် (၂၅၀၀) ဂှ် ယအ်မံၚ် (၁၅) ဒ္ကေဝ်ပၠန်ရဏောၚ်။ ညံၚ်ဂြောဝ်ဂတာသီုဖအိုတ် ဂွံပြေပြံၚ်ဟီုမ္ဂး သွက်ၚုဟ်ဖျာတံ ဂွံစှ်ေကဵုဂှ် မိက်ဂွံအာတ်မိက်ဏာရ” သာ်ဝွံ သ္ဂးရ။
မွဲလ္ပာ်ပၠန်ဂှ်လေဝ် ကံၚ်ဇြဳပၞာန်ဝွံ သွံတြးကဵုဒၟံၚ် ကၠေၚ်စက်တံ နကဵုသၞောတ် ပရအ်သွံကဵုတံသၟးရတုဲ အတိုၚ်ၚုဟ်နှေန် ညးတံ မစၟတ်လဝ်ဂှ် ယဝ်ရဟွံသွံမ္ဂးလေဝ် ဆေၚ်သွံကၠေၚ်စက်တံဏံဂှ် ကၟာတ်အာဒတုဲရောၚ် ဘပဠဒၟံၚ်တံဂှ် ကၠောန်ၜိုတ်ဒၟံၚ်ရ။
ကံၚ်ဇြဳပၞာန်ဝွံ ပ္ဍဲကဵုသၞာံတုဲတေံမံက်ဂှ် ညံၚ်ၚုဟ်ကၠေၚ်ဂွံစှ်ေဂးတုဲ နူကဵုတိုက်သြန်ဗဟဵုသၟဝ်တဲဂှ် ထံက်ပၚ်သြန်ဒဝ်ဠာအမေရိကာန် ၂၀၀ ပြကောဋိကိုဋ် အပ္ဍဲကဵုဗွဝ်ဖျာသြန်ဍုၚ်သ္အာၚ်တံဂှ်ကီု၊ ပၠောပ်ပ္တိုန်ကၠေၚ်စက်ရုယှာတံဂှ် ကၠောန်လဝ်ကီုလေဝ် ဟွံအံၚ်ဇၞးလဝ်ရ။
ပ္ဍဲကဵုဍုၚ်ဗၟာဂှ် ၚုဟ်ကၠေၚ်စက်ဝွံ ကၠာဂွိုအ်သီအဝဵုဂှ် မွဲလဳတာ ကလိဂွံလဝ် ၜိုတ် ၆၀၀ ဒ္ကေဝ်ဓဝ်ပြၚ်ကီုလေဝ် ကြဴနူဒပ်ပၞာန်သီအဝဵုတုဲ သၠုၚ်တိုန်ကၠုၚ် စဵုကဵု ၄ ဆတုဲ ၚုဟ်ကၠေၚ်စက်ပိုတ်အိုတ်တံကဵု ၚုဟ်ကၠေၚ်ဟွံညိၚ်ဝတ်တံဂှ် က္တဵုဒှ်ဒၟံၚ် အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−Social Media
sanlontai