ပ္ဍဲတွဵုရးဍုၚ်မန် ပွသွံတြးကပေါတ်ဗၞိက်ပ္တိတ်ဒပ်ပၞာန်တံနွံ၊ ဟၟဲ စၟဳတ်မံၚ်တုဲ သွက်ဂွံပ္တိုန်ဆေၚ်သွံတြးဂှ် ကဵုဇြဟတ်ဂရိုဟ်

မတ်မလီု၊ သေပ်တေမ်ဗာ(၁၇)

ပ္ဍဲဆေၚ်ဖျာမၞုံပ္ဍဲပွိုၚ်ဍုၚ်မတ်မလီုတံဂှ် ကၠောန်သ္ပမံၚ်ပရေၚ်စၟဳတ် ပွသွံတြးလဝ် ကပေါတ်ဗၞိက်ပ္တိတ်ဒပ်ပၞာန်တံနွံ၊ဟၟဲတံတုဲ ဟွံဒေါံဟွံဂွံ သွက်ဂွံပ္တိုန်ဆေၚ်သွံတြးအိုတ်ညိဂှ် လ္ပာ်ကံၚ်ဇြဳပၞာန်တံ ကဵုမံၚ်ဇြဟတ်ဂရိုဟ်ရဂှ် ဂွံတီကေတ် နူဇရေၚ်တၠဆေၚ်တံကဵု ကောန်ဍုၚ်တံရ။

ပ္ဍဲတ္ၚဲအကြာတံဏံ ပ္ဍဲဍုၚ်ဇြပ်ဗုကေုာံဍုၚ်ရေဝ် တွဵုရးဍုၚ်မန်တံဂှ် ဂကောံပံၚ်ကောံကံၚ်ဇြဳပၞာန် ဌာနစုၚ်ပါလုပ်တံဂှ် နကဵုဂီုကၠီု ဗၠာဲသၟိၚ်တံကဵု ဒပ်ပၞာန်တံဂှ် လုပ်စိုပ်ပ္ဍဲဆေၚ်လ္တူဍုၚ်တံကဵု ပ္ဍဲကွာန်လ္ၚဵုတံတုဲ ကၠောန်သ္ပမံၚ် ပရေၚ်စၟဳတ်သၟာန်သၟုက် ပရေၚ်သွံ၊ဟွံသွံ ကပေါတ်ဗၞိက်ပ္တိတ်ဒပ်ပၞာန်တံရ။

ကောန်ဍုၚ်ဇြပ်ဗုမွဲတၠဂှ်လေဝ် “တေံတ္ၚဲတေံဂှ် အဲဆဵုမံၚ်ရ။ ညးအုပ်ဓုပ်ကာနာနာ ကေုာံ ဒပ်ပၞာန်တံ ပံၚ်တောဲတုဲ လုပ်တိတ်စၟဳတ်မံၚ် ဆေၚ်ပ္ဍဲဍုၚ်တံဂှ်ဆဵုကေတ်ရ။ စၟဳတ်အဓိကဂှ်တှ်ေ ကပေါတ်တံဂှ် ညံၚ်ဟွံဂွံသွံပ္တိုန်ၚုဟ် လ္တူနူၚုဟ်ဗွဝ်ဖျာလၟုဟ်ဏံကီု တုဲပၠန် ညံၚ်ဂွံသွံတြးကဵု ကပေါတ်ဗၞိက်ပ္တိတ်ဒပ်ပၞာန်ဍေံတံကီု စၟဳတ်ဗီုတံဏံရ” သာ်ဝွံ ညးသ္ဂးရ။

မ္ၚးနူဆေၚ်ဟွံပ္တိုန်သွံ (မြန်မာဘီယာ)မပါလုပ် အရက်၊ ဗဳယာ၊ ဍာ်ယာမ မဒှ်ကပေါတ်ဗၞိက်ပ္တိတ်ဒပ်ပၞာန် နကဵုယၟုမပ္တံ Andaman Gold၊ Dagon၊ Black Shield၊ Army Rum တံဂှ် ကုဆေၚ်ဟွံပ္တိုန်သွံ ၜံက်Red Rubyကေုာံ ၜံက်Premiun Goldတံဂှ် ကၟာတ်သီရောၚ်သ္ဂးတုဲ လ္ပာ်ကံၚ်ဇြဳပၞာန်တံ ဘပဠဟီုဂးမံၚ်တံ နွံမံၚ်ရ။

တၠဆေၚ်နူဍုၚ်ၜဳကလေၚ်မွဲတၠဂှ်လေဝ် “ပြဟ်ဟ်ဏံ သွံ၊ဟွံသွံ ကပေါတ်နူဒပ်ပၞာန်တံဟာဂှ် ကၠုၚ်စၟဳတ်ရောၚ်ဂှ် ဟီုလဝ်ရ။ ပိုဲမိၚ်လဝ်ဂှ်တှ်ေ ဗက်စၟဳတ် ကပေါတ်ဗၞိက်ပ္တိတ်နူဒပ်ပၞာန်တံဏောၚ်ဂှ် ဟီုလဝ်ရ။ ကေတ်အရေဝ်ဏောၚ် မုဏောၚ်ဂှ် ဟွံဂွံမိၚ်ဏီရ။ မိၚ်မံၚ်လၟုဟ်ဂှ် ဟွံသွံမ္ဂး ဗီုပြၚ်ကဵုကၟာတ်ဆေၚ်တံရ။ ဟွံသွံမ္ဂး လ္ပသွံလးလး၊ သွံမ္ဂး ကပေါတ်ဍေံတံရသွံ ဂးတုဲ ကၠောန်မံၚ်ဗီုဂှ်ရ။ ကြေပ်ဂြတ်ကွေံရ ပါဲဟွံဗၠးကွေံကွေံရတှ်ေ ဒးကပှ်ပ္တိုန်လဝ်ရ။ ထ္ၜးစဗီုပြၚ်သၟးရ ကၠုၚ်စၟဳတ်မ္ဂး ပ္တိတ်ထ္ၜးကဵုဏောၚ်။ သှ်ေမံၚ်တံဂှ် သွံအိုတ်အာယျ မုဟုတီ သ္ပဗီုဏံရ” သာ်ဝွံ ညးသ္ဂးရ။

ကြဴနူသီအဝဵုတုဲ လ္တူညးဍုၚ်ကွာန်တံဗ္ကပ်လဝ်ဗဗေၚ် ကုဗၞိက်ပ္တိတ်ဒပ်ပၞာန်တံဂှ် ကံၚ်ဇြဳပၞာန် ဒးဂိမံၚ်လ္ဂောံကဵုပရေၚ်ပိုန်ဒြပ်တံဂှ် ပ္ဍဲဂိတုသေပ်တေမ်ဗာ စၟတ်တ္ၚဲ(၁၁)ဂှ် ကော်ကေတ်ကောံဓရီုသဳကၠဳပ္ညဳပ္ညပ်တုဲ ဒှ်ကၠုၚ်စဵုကဵုအကာဲအရာ ဒးစၞောန်ပ္ညုၚ်ကၠုၚ် သွက်ဂွံစၟဳတ် ပရေၚ်သွံတြးကပေါတ်ဗၞိက်ပ္တိတ်ဒပ်ပၞာန်တံ နွံ၊ဟွံမွဲ ပ္ဍဲဆေၚ်အလုံမွဲကၟိန်ဍုၚ်တံဂှ်ရ။

နအလဵုဝန်ဇၞော်ပ္ဍဲဍုၚ် ဒုသ္ကိုပ်ဗိုလ်ဇၞော်ယျာပျေအ်ဂှ် သွက်ဂွံကလေၚ်သွံတြး ဗၞိက်ပ္တိတ်ဒပ်ပၞာန် အရက်ဗဳယာတံကဵု ကပေါတ်တၞဟ်သ္အာၚ်တံ ပ္ဍဲသေန်တာရာန်ဖျာတံ၊ ပ္ဍဲသူဗာမာကေတ်တံ၊ ပ္ဍဲဆေၚ်သတိုဝ်တံကဵု ပ္ဍဲဆေၚ်ဖျာ နူနေဗျဳဒဝ်မပါလုပ် ပ္ဍဲရးကေုာံ တွဵုရးနာနာတံမာန် စၞောန်ပ္ညုၚ်လဝ်ရဂှ် ပရိုၚ်ဂမၠိုၚ်လေဝ်မံက်တိတ်လဝ်ရ။

ညးမၞံအခေါၚ်ဟီုဂး ရုၚ်သ္ကိုပ်ဝန်ဇၞော်အလဵုသဳညဳသၟဟ်ဂကူ (NUG) ဥူနေဖုမ်လာတ်ဂှ် ပရေၚ်ချဳဓရာၚ် ထပိုတ်သြန်လုပ်ဖေတ်သေတ်တံဂှ် လ္ပာ်ကံၚ်ဇြဳပၞာန်တံ စဵုကဵုဒးကဵုကၠုၚ်ဇြဟတ်ဂရိုဟ်ဗွဲအဓမ္မတံဂှ် ဒးခၠေဝ်ပၠန်မံၚ် ဗွဲမဖေက်လ္ကိုတ်ရဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။

“ပရေၚ်ချဳဒရာၚ်ညးဍုၚ်ကွာန် ထ္ပိုတ်သြန်လုပ်ဖေတ်သေတ် ဒက်ပ္တန်ဘဏ္ဍာညးဍုၚ်ကွာန်တံဂှ် စိုပ်တရဴဗွဲမလောန်ရဂှ် ဟီုစဂွံရ။ လၟုဟ်ဂှ် လ္ပာ်ကံၚ်ဇြဳပၞာန်တံ စပ်ကဵုကိစ္စဏံဂှ် ကဵုဇြဟတ်ဂရိုဟ်ဗွဲအဓမ္မတံ၊ ကၠောန်သ္ပကောံဓရီုတံဂှ် ဂွံဆဵုကေတ်ရ။ အရာဏံဂှ် ဒှ်အကာဲအရာ ဒးခၠေဝ်ပၠန်မံၚ် ဗွဲမဖေက်လကိုတ်ရ။ ဒးဟီုတပ်ပ်တှ်ေ ဣဏံဂှ် နွံမံၚ်ကဆံၚ်ပထမညိကွေံရ။ လၟုဟ် ပ္ဍဲ၂ဂိတုဏံဂှ် အရက်၊ ဗဳယာ၊ ၜံက်တံရ။ စွံပွန်လ္တူဏံတုဲ ကၠောန်မံၚ်ဂှ် ဂွံဆဵုကေတ်ရ။ ၂ ဂိတုဏံပေၚ်တုဲတှ်ေ နဒဒှ်လဂါံဇိုၚ်ဒုတိယဂှ် အကာဲအရာဆက်ချဳဒရာၚ် ဗ္ကပ်အာဗဗၚ် ကုဗၞိက်ပ္တိတ်ထံက်ပၚ်ကဵုမံၚ် သြန်လုပ်ဒပ်ပၞာန်ပကီုပရာပ် မမိက်ကဵုမွဲမွဲတံ အဆက်က်ရောၚ် လလောၚ်တြးလဝ်ဂှ်လေဝ် ဂွံဆဵုကေတ်ရ။ ဗွဲတၟေၚ် လ္တူပွညးဍုၚ်ကွာန်တံ ပါလုပ်ပ္ဍဲပၠန်ဂတးတံစိန်န်ဝုန်န်ဂှ် ထ္မံက်ထ္ၜးမံၚ်အကာဲအရာ လ္ပာ်ကံၚ်ဇြဳပၞာန်တံ ဖေက်လကိုတ်မံၚ်ကွေံကွေံရဂှ် မိက်ဂွံဟီုရ” သာ်ဝွံ ညးသ္ဂးရ။

သ္ပပ္တံနူဂိတုအဝ်ဂါတ်တုဲကၠုၚ်တေံတုဲ စဵုကဵုဂိတုသေပ်တေမ်ဗာဂှ် ပ္ဍဲပရေၚ်ချဳဒရာၚ်ဗလးတိတံဂှ် နကဵုကာမ်ဖုၚ် မသ္ဂး”ထပိုတ်သြန်လုပ်ဖေတ်သေတ် ဒက်ပ္တန်ဘဏ္ဍာညးဍုၚ်ကွာန်”ဂှ် ဇၟာပ်ဒဒှ်တ္ၚဲ ညံၚ်ဟွံဂွံသုၚ်စောဲ ဗၞိက်ပ္တိတ်ဒပ်ပၞာန်တံဂှ် ဆဝ်မ္ၚုဟ်ဖ္တိုက်ဖ္အောဝ်မံၚ်ရ။

ဂကောံဇြဟတ်ပၠန်ဂတးတံဂှ်တှ်ေ ပ္ဍဲဆေၚ်ဆေၚ်စပ်မၞုံပ္ဍဲဒေသတံဂှ် ညံၚ်ဟွံဂွံသွံတြး ဗၞိက်ပ္တိတ်ဒပ်ပၞာန် အရက်၊ဗဳယာ၊ၜံက်တံကဵု ကပေါတ်ဗၞိက်တၞဟ်ဟ်တံဂှ်ကဵု ယဝ်ရဆဵုဂဗဒး သွံတြးမံၚ်တံဂှ်မ္ဂးလေဝ် သီကေတ်ပလီုပလာ်ထောံဏောၚ်ဂှ် ပ္တိတ်လဝ်တၚ်လလောၚ်တြးအိုတ်ရ။

ပရိုၚ်-သြၚ်လောန်တိုၚ်မ်

ဗီု-CJ