ရေဝ်၊ သေပ်တေမ်ဗာ(၁၉)
ပ္ဍဲအရာပ်အံၚ်သုခ၊ ဍုၚ်ရေဝ်၊ တွဵုရးဍုၚ်မန် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၈) အခိၚ်နူဂယးၜိုတ် (၁၀)နာဍဳဂှ် ဂအုပ်ဗၠာဲသၟိၚ် ဒပ်ပရိုၚ်ဗၠာဲသၟိၚ်မွဲတၠ ဟိုတ်နူဒးဒုၚ်ပန်လဝ်ကဵုလွဟ်သေနာတ်တုဲ ဒးချိုတ်လဝ်ရဂှ် ကောန်ဍုၚ်ရေဝ်တအ် ဟီုကဵု ဌာန်ပရိုၚ်သြၚ်လောန်တိုၚ်(မ်)ရ။
ညးတာလျိုၚ်ဒပ်ပရိုၚ်ဗၠာဲသၟိၚ်ပွိုၚ်ဍုၚ်ရေဝ် ဂအုပ်ဗၠာဲသၟိၚ်မျေအ်လွေန်ဂှ် ဃောတိတ်အာနကဵုကွဳစက်သ္ၚိညးမွဲဓဝ်ဂှ် သၟာရပ်လွဟ် ဟွံတီယၟုတအ် ဗက်ကၠုၚ်ကဵုကွဳလိုန်ဓာတ်တုဲ ပန်ပှော်လဝ် နကဵုလွဟ်သေနာတ်ရ။
ဟိုတ်နူဒးဒုၚ်ပန်ပှော်လဝ်ကဵုလွဟ်သေနာတ်တုဲ ဂအုပ်ဗၠာဲသၟိၚ်မျေအ်လွေန်ဂှ် ဒးလဝ်ဘဲလွဟ် (၇)လစုတ်တုဲ ပ္ဍဲဒၞာဲဒှ်ပရေၚ်ပရောဂှ်ဟေၚ် ဒးချိုတ်လဝ်ရ။
ကြဴနူဂအုပ်ဗၠာဲသၟိၚ်မျေအ်လွေန် ဒးဒုၚ်ပန်ပှော်တုဲဂှ် ဒပ်ကံၚ်ဇြဳပၞာန်ကီု သီုဂကောံဒပ်ဗၠာဲသၟိၚ်တအ် ကၠုၚ်စိုပ်စၟဳစၟတ်လဝ်တုဲ ဇွဂှ် ပ္ဍိုက်ကေတ်ဏာလဝ် ပ္ဍဲရုၚ်ဂဥုဲညးဍုၚ်ကွာန် ပွိုၚ်ဍုၚ်ရေဝ်ရဂှ် ညးဒေသတအ် ဟီုရ။
ကြဴနူပရေၚ်ပရောဏံက္တဵုဒှ်တုဲ နူကဵုဒပ်ကံၚ်ဇြဳပၞာန် ကၟာတ်ဒၞာစၟဳစၟတ်ဒၟံၚ် ပ္ဍဲဒၞာဲလုပ်တိတ်ဍုၚ်တအ်တုဲ သီုက္ညာၚ်ကရေဲ တ္ၜေဟ်လက်လဝ် ညးဍုၚ်ကွာန်အာတရဴလ္ၚဵုတအ်ရဂှ် ဂွံတီကေတ် အတိုၚ်လဟီု ညးဒေသတအ်ရ။
ဂအုပ်ဗၠာဲသၟိၚ်မျေအ်လွေန်ဂှ် ဂကောံလကိုဟ်ဍုၚ်ရေဝ် ပန်ပသောၚ်သ္အးလဝ်ရဂှ် က္ဍိုပ်သ္ကိုပ်လကိုဟ်ဍုၚ်ရေဝ် ချူပ္တိုန်လဝ် ပ္ဍဲမုက်လိက်ဇာနှိက်ပရေၚ်မၞိဟ် ဖေတ်သဗော်ညးရ။
ပ္ဍဲပွိုၚ်ဍုၚ်ရေဝ်ဂှ် ပါဲနူဒပ်ကံၚ်ဇြဳပၞာန် ကေုာံကောန်ဒပ်ဗၠာဲသၟိၚ်တအ်တုဲ ရုၚ်ဌာနမဆေၚ်စပ်တအ် ဟိုတ်နူဒးဒုၚ်ပန်ပှော်ဗတိုက်ဒၟံၚ် ခြာဟွံလအ်ဟွံလအ်နွံဂှ်ရ နူကဵုကံၚ်ဇြဳပၞာန် လလောၚ်တြးလဝ်ပရေၚ်အုပ်ဓုပ်ပၞာန်တုဲ ပတေၚ်ဂြတ်လဝ်ပရေၚ်ဂီုကၠီု ဗွဲတၟေၚ်ရ။
ပရိုၚ် – သြၚ်လောန်တိုၚ်(မ်)
ဗီုရုပ် – လကိုဟ်ဍုၚ်ရေဝ်
sanlontai