ပ္ဍဲပေါဲဗတိုက်လှာဒကှ် ပါလုပ်သီုသ္ကိုပ်တံဒပ်ကံၚ်ဇြဳပၞာန် ဒးချိုတ်လဝ် (၁၀) တၠ

လှာဒကှ်၊ သေပ်တေမ်ဗာ(၁၉)

တွဵုရးကရေၚ် ပွိုၚ်ဍုၚ်လှာဒကှ် ပ္ဍဲကဵုပေါဲဗတိုက်က္တဵုဒှ်ဒၟံၚ် ပ္ဍဲကွာန်ခလေဝ်တခေါန်ဒေၚ်ဂှ် လ္ပာ်ကံၚ်ဇြဳပၞာန် ပါလုပ်သီုသ္ကိုပ်တံဒပ် ဒးချိုတ်လဝ် ဟွံအောန်နူ (၁၀)တၠနွံရဂှ် ကရောၚ်ပၞာန်နဂါနဳ လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၈) ဂှ်ရ။

သ္ပတံနူဂိတုသေပ်တေမ်ဗာ စၟတ်တ္ၚဲ (၁၄) တုဲကၠုၚ်တေံတုဲ အကြာဒပ်ကံၚ်ဇြဳပၞာန် ထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်ခလေဝ်တခေါန်ဒေၚ်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တအ် ပေါဲဗတိုက်ၜါလ္ပာ် စက္တဵုဒှ်လဝ်ရ။

ပ္ဍဲတ္ၚဲပေါဲဗတိုက်စဒှ်ဂှ်ဟေၚ် လ္ပာ်ကံၚ်ဇြဳပၞာန်ဒးဂိလဝ် ဆုတ်ကလေၚ်တိတ်လဝ်တုဲ ပ္ဍဲကဵုပေါဲဗတိုက်ဂှ် နူလ္ပာ်ဒပ်ကံၚ်ဇြဳပၞာန် ပါဲနူကၠုၚ်ပန်ကဵုက္ၜၚ်ကျာ Mi-35 ဗ္ဒာဲပွိုၚ် ၂၅ မိနေတ်တုဲ နူကဵုဒပ်အမၠံက်ကွာန်အၜေတ်လေဝ် ပန်ရီုကဵုလဝ်လွဟ်ဇၞော် ၁၂၂ မမ ဟောၚ်ဝေစ်ဇြာရ။

ပ္ဍဲကဵုပေါဲဗတိုက်ကွာန်ခလေဝ်တခေါန်ဒေၚ်ဂှ် ဒုတိယသ္ကိုပ်ဗိုလ်ဇၞော် သ္ကိုပ်တံဒပ်ကံၚ်ဇြဳပၞာန်မွဲတၠဂှ်မ္ဂး ဟိုတ်နူလ္ပာ်ကရောၚ်ပၞာန်နဂါနဳ ပန်ပှော်လဝ်ကဵု လွဟ်သနိုက်ဗာ ဒးချိုတ်လဝ်တုဲ ပါလုပ်သီုသ္ကိုပ်ဒပ်လ္ပာ် BGF သီုဖအိုတ် ဟွံအောန်နူ (၁၀)တၠ ဒးချိုတ်လဝ်တုဲ ဒးလဝ်ဘဲဝပ် (၇)တၠရဂှ် ဓမံက်လဝ် ပ္ဍဲတၚ်လလောၚ်တြးရ။

ပ္ဍဲကဵုပေါဲဗတိုက်ဂှ် သ္ဂံၚ်နူလ္ပာ်ကရောၚ်ပၞာန်နဂါနဳမွဲတၠ ဒးသၠးပူဇဴဏာလမျီု သၠုၚ်ၚ်ပြဲပြဲရဂှ် ဓမံက်ထ္ၜးလဝ်ရ။

ပ္ဍဲဂိတုသေပ်တေမ်ဗာ စၟတ်တ္ၚဲ (၁၈) အခိၚ်နူဂယးတ္ၚဲဏံလေဝ် ပ္ဍဲကဵုကွာန်ခလေဝ်တခေါန်ဒေၚ်ဂှ် ဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တအ် ပေါဲဗတိုက်ဆက်ဒှ်ဒၟံၚ်ရဂှ် ဂွံတီကေတ် အတိုၚ်လဟီုညးဒေသတအ်ရ။

ဟိုတ်နူပေါဲဗတိုက်ဒှ်ဒၟံၚ် ပ္ဍဲဂကောံကွာန်ခလေဝ်တခေါန်ဒေၚ်တုဲ ညးဒေသ ကောန်ညးဍုၚ်ကွာန် ၁၅၀၀၀ ပြၚ်တအ်ဂှ် ပြဟ်ဟ်ဏံ ဒးဂြိပ်ဒဴပါဲဓလေတ်ဒၟံၚ်တုဲ ညးဍုၚ်ကွာန်ဒးပါဲဒၟံၚ်ဘဲပၞာန်တအ်ဂှ် ဟိုတ်နူကဵုဗြဲဂူစှ်ေ အဆက်က်ကီု သီုကဵုဍာ်ဒဵုစှ်ေဒၟံၚ်တုဲ ပါဲနူဒၞာဲဒၟံၚ် ကၟဳဗ္ဒၚ် ဟၟဲရုမ်မ်ဂပ်ပ်ဂှ် ဗဒိုပ်ပါဲဓလေတ်ပၞာန်လေဝ် ဟိုတ်ဟၟဲတၞဟ်ခြာဂှ်ရ ဒးဆေၚ်ဒၟံၚ်မုက်ကဵု တၚ်ခက်ခုဲဗွဲမဂၠိုၚ်ရဂှ် KNU လလောၚ်တြးလဝ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – ကရောၚ်ပၞာန်နဂါနဳ