ပ္ဍဲမုၚ် ကရောၚ်ပၞာန်လုပ်ကၠုၚ်တုဲ ညးဒေသဂၠိုၚ်ကဵုလ္ၚီ ထပ်ဒးဂြိပ်ဒဴဒၟံၚ်

မုၚ်၊ သေပ်တေမ်ဗာ (၁၉)

ဒပ်ကံၚ်ဇြဳပၞာန် မလုပ်စိုပ်ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်မုၚ် ခရိုၚ်ညံၚ်လေဝ်ပေန် ဒပ်မဟာ (၃) ဗော်သွးကောန်ဂကူကရေၚ် KNU ဂှ် ဟိုတ်နူစံၚ်ပလီုပလာ်လဝ် သ္ၚိဒၟံၚ်တံဂှ်ရ လၟိဟ်ညးဒေသ (၁၀၀၀) ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် KNU ဗဟဵု လလောၚ်ပ္တိတ်လဝ်ရ။

တုဲကၠုၚ် ပ္ဍဲဂိတုသေပ်တေမ်ဗာ (၁၄) တေံ အခိၚ်ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ် အပ္ဍဲကွာန်(ငထွေစုတ်) ၊ ပွိုၚ်ဍုၚ်မုၚ် KNU ဂှ် ပ္ဍဲကဵုကွာန်ဂှ် ကောန်ကွာန် (၈) တၠ သှ်ေဒၟံၚ်ရောၚ် ပါလုပ် ပ္ဍဲတၚ်လလောၚ်တြးဂှ်ရ။

ကောန်ကွာန် (၈) တၠဂှ် ဂွံမိၚ်ကေတ်ပရိုၚ် ကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ် အပ္ဍဲကွာန် (ငထွေစုတ်) ဂှ်တုဲ ဂြိပ်တိတ်ကီုလေဝ် ညးဗြဴ (၃) တၠဝွံ ဟိုတ်ဟွံမွဲမွဲသာ် ဒးဒုၚ်ရပ်လဝ်တုဲ သ္ၚိဒၟံၚ် (၁၂) မ အပ္ဍဲကဵုကွာန်ဂှ်လေဝ် ဒးဒုၚ်စံၚ်ပလီုပလာ်လဝ်ရောၚ် သ္ဂးလဝ် ပ္ဍဲကဵုတၚ်လလောၚ်တြးဂှ်ရ။

ကရောၚ်ပၞာန် ဒပ်ကံၚ်ဇြဳပၞာန်ဝွံ ထ္ပက်ကရောၚ်ပၞာန်လုပ်စိုပ် အပ္ဍဲကဵုကွာန်မျာတ်ယျေဝ်ကဵု ကွာန် (ငထွေစုတ်) တုဲ ဟိုတ်နူဖျေံလဝ်ဒပ်ဂှ်ရ ပ္ဍဲကဵုဂိတုသေပ်တေမ်ဗာ (၁၅) ဂှ် လၟိဟ်မၞိဟ် ၁၅၃၄ တၠ နူကဵုလၟိဟ်သ္ၚိ (၁၉၂) မ နူကဵုကွာန်ယျေလေဝ်ကရေၚ်ကဵု ကွာန်ယျေလေဝ်ဗၟာတံဝွံ ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတံရောၚ်ဂှ် KNU လလောၚ်ပ္တိတ်လဝ်ရ။

အခိၚ်လၟုဟ်ဂှ်လေဝ် ဟိုတ်နူဒှ်အခိၚ်ကာလကသီုဂှ်ရ ညးဍုၚ်ကွာန်ဒေသ မ္ဒးဂြိပ်ဒဴပါဲဒလေတ်ဒၟံၚ်ဂမၠိုၚ်ဝွံ ဒးဆေၚ်ဒၟံၚ်မုက် ကုပြသၞာ ဇွောံမစၞစသ္ဇိုၚ်၊ ဂဥုဲဇဗ ကေုာံ ဒၞါဲမံၚ်စ္ၜုဲစ္ၜော်တံ ဟွံရုမ်ဂပ်ရောၚ်ဂှ်တုဲ ဆက်စၠောံကေတ်အဆက် ဇရေၚ်ဌာန်လလောၚ်ပရိုၚ်ဗဟဵု KNU ဟွံသေၚ်မ္ဂး ပရေၚ်ရီုဗၚ်ဟံၚ်ပြာ်ကာတၟေၚ်ကရေၚ်တံမာန်ရောင်ဂှ် ဂွံတီကေတ် အတိုင်တင်လလောင်တြးဂ်ှရ။

ပ္ဍဲကဵုတိဍာ်ဒပ်မဟာ (၃) ခရိုၚ်ညံၚ်လေဝ်ပေန် KNU ဂှ် ဟိုတ်နူဒပ်ကံၚ်ဇြဳပၞာန် ကၠောန်သ္ပပန်ပှော်ဗ္တိုက်လဝ် တရဴကျာ ကေုာံ လွဟ်ဇၞော်တံဂှ်တုဲ လၟိဟ်မၞိဟ်ၜါကိုဋ်ပြၚ်ဝွံ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံတုဲ အရီုဗၚ်ကာတၟေၚ်တံလေဝ် ဆက်နွံဒၟံၚ်ပၟိက်ရောၚ်ဂှ် ဂွံတီကေတ် ဇရေၚ်ဂကောံမှာဇန်ကရေၚ်တံရ။

ပရိုၚ်−သြၚ်လောန်တိုၚ်(မ်)

ဗီု−KNU