ပဠဝ်၊ သေပ်တေမ်ဗာ (၁၉)
ကြဴနူကရောၚ်ပၞာန်ဒပ်ကံၚ်ဇြဳပၞာန် လုပ်စိုပ်ကၠုၚ် အပ္ဍဲကွာန်ပျေန်ဖျူ၊ ပွိုၚ်ဍုၚ်ပဠဝ်၊ ရးဒေသဇၞော်တၞၚ်သဳတုဲဂှ် ဂစိုတ်ဏာလဝ် ညးဒေသ (၄) တၠရောၚ် ညးဒေသဂမၠိုၚ် ကေုာံ ညးတာလျိုၚ် နူကဵုတမ်ဒပ်(၁) ခရိုၚ်ဗိက်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် မဂေတ်ကွာန်ထ္ပက်ဒၟံၚ်ကရောၚ်ပၞာန် အပ္ဍဲပွိုၚ်ဍုၚ်ပဠဝ်ဂှ်ဝွံ ပ္ဍဲဂိတုသေပ်တေမ်ဗာ (၁၇) အခိၚ်ဇိုၚ်သဝ်တ္ၚဲဂှ် လုပ်စိုပ်ကၠုၚ်လဝ် အပ္ဍဲကွာန်ပျေန်ဖျူရ။
ဒပ်ကံၚ်ဇြဳပၞာန် မထ္ပက်ကၠုၚ်ကရောၚ်ပၞာန်ဂှ်ဝွံ ပန်ဂစိုတ်ဏာလဝ် ညးဒေသ (၄) တၠ တိတ်ကၠုၚ်နူကွာန် သွက်ဂွံဂြိပ်ဒဴပါဲဒလေတ်ဂှ် နကဵုသေနာတ် ပ္ဍဲကဵုတၞုၚ်ကွာန်ဂှ်ရ။
ဟိုတ်နူပရေၚ်ဂစိုတ်ဂယိုၚ် ကရောၚ်ပၞာန်ကံၚ်ဇြဳပၞာန်တံတုဲ ညးဒေသဂမၠိုၚ် ဒဝ်ဒါန္တာနဲ အာယုက် (၃၇) သၞာံ၊ ဒဝ်ယဳဝေန် အာယုက် (၄၀) သၞာံ၊ ဥူၚိုဲသဵု အာယုက် (၄၀) သၞာံ၊ ဥူဘကျေန် အာယုက် (၆၉) သၞာံတံ ဒးချိုတ်အာလဝ်ရောၚ်ဂှ် ညးဒေသတံ ဟီုဂးလဝ်ရ။
ကြဴနူဂစိုတ်ဏာလဝ် ညးဍုၚ်ကွာန်ဒေသတံတုဲ ကရောၚ်ပၞာန်ကံၚ်ဇြဳပၞာန် မစံၚ်ပလီုပလာ်ဏာ သ္ၚိဒၟံၚ် (၂) မဂှ်ဝွံ တိတ်အာ လ္ပာ်ကွာန်မျဒံၚ်ဂှ်တုဲ ပ္ဍဲကဵုဂိတုသေပ်တေမ်ဗာ (၁၈) ဂှ် ထပ်က္တဵုဒှ်ဒၟံၚ်ပေါဲဗ္တိုက် ကုဒပ်ပံၚ်ကောံစဵုဒၞါဒေသတံ ပ္ဍဲကဵုကွာန်မျဒံၚ်ဂှ်ရ။
ကရောၚ်ပၞာန်ကံၚ်ဇြဳပၞာန် ဂေတ်ကွာန်တုဲထ္ပက်ဒၟံၚ်ကရောၚ်ပၞာန်ဂှ်ရ ညးဒေသ (၂၀၀၀) ပြၚ် နူကဵုကွာန်ပေအ်ထံက်၊ ပျေန်ဖျူ၊ လက္ကူ၊ မျဒံၚ်၊ ပိတာပ် မၞုံပွိုၚ်ဍုၚ်ပဠဝ်တံ ဒးဂြိပ်ဒဴပါဲဒလေတ်ဒၟံၚ်ရ။
တုဲကၠုၚ် ပ္ဍဲဂိတုသေပ်တေမ်ဗာ (၁၅) ဂှ်လေဝ် ကရောၚ်ပၞာန်ကံၚ်ဇြဳပၞာန် စံၚ်ပလီုပလာ်ဏာလဝ် သ္ၚိဒၟံၚ်ညးဒေသ ကွာန်လက္ကူ မက္တဵုဒှ်လဝ်ပေါဲဗ္တိုက်တံ သ္ၚိ (၁၇) မဂှ် ဂွံတီကေတ် အတိုၚ်တၚ်လလောၚ်တြး ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု− CJ
sanlontai