တိုၚ်ပေ၊ သေပ်တေမ်ဗာ(၁၉)
ပ္ဍဲဗ္ဒာဲတ္ကအ်ထိုၚ်ဝါန်ဂှ် ဟိုတ်နူပရေၚ်ဒပ်ပၞာန်ကြုက် ပ္ကတ်ပကေၚ်ပၞာန် သၠုၚ်ဂၠိုၚ်တိုန်ကၠုၚ်ဒၟံၚ်တီတီတုဲ သွက်ဂွံဒေါံကဵု ပရေၚ်ချဳဒရာၚ်ပၞာန် ရေၚ်တၠုၚ်ဏာဒၟံၚ် လ္ပာ်အကာဲအရာပရေံ မွဲလ္ပာ်ဏံဂှ် သ္ကိုပ်ဝန်ဇၞော်ထိုၚ်ဝါန် ဗတိုက်ဖ္အောဝ်လဝ်ကြုက် ပ္ဍဲဂိတုသေပ်တေမ်ဗာ စၟတ်တ္ၚဲ (၁၈)ဂှ်ရ။
ကၟိန်ဍုၚ်တ္ကအ် မအုပ်ဓုပ်ဒၟံၚ် နသၞောတ်ဒဳမဝ်ကရေဇြဳစှ်ေစှ်ေဂှ် ကၟိန်ဍုၚ်ကြုက် ညာတ်ကေတ်လဝ် နဒဒှ်အပိုၚ်ခြာ ပရေၚ်ပိုၚ်ပြဳညးတအ်ဂှ် သွက်ဂွံအာတ်မိက်ကေတ် အခေါၚ်အဝဵုညးတအ်ခိုၚ်ၚ်ဗိုနန်န်ကီု သီုသွက်ဂွံကဵုအာဇြဟတ်ဓရိုဟ် ကုတိုၚ်ပေဂှ်လေဝ် ကၠောန်သ္ပရေၚ်တၠုၚ်ဒၟံၚ်ရ။
သ္အာၚ်နူဂှ်ပၠန် ပရေၚ်ပ္ကတ်ပကေၚ်ပၞာန် ပ္ဍဲမွဲဗွိုၚ်တ္ကအ်ထိုၚ်ဝါန်ဂှ်လေဝ် ကၠောန်သ္ပ သၠုၚ်ပ္တိုန်ဒၟံၚ်အသိၚ်ရ။
ပ္ဍဲဂိတုသေပ်တေမ်ဗာ စၟတ်တ္ၚဲ (၁၇)တုဲကၠုၚ်တေံလေဝ် ဂွံဆဵုကေတ်လဝ် က္ၜၚ်ကျာပၞာန်ကြုက် ပ္ဍဲၜဳ (၁၀၃)ဖ္ဍိုက်တုဲ လၟိဟ်ဏံဂှ် ပြဟ်ဟ်ဏံ ဒှ်လၟိဟ်ဂၠိုၚ်အိုတ်မွဲမာန်ရဂှ် ဌာနဝန်ဇၞော်ပရေၚ်စဵုဒၞာထိုၚ်ဝါန် ဟီုသ္ဂးလဝ်ရ။
ပ္ဍဲကဵုဗီုပြၚ်တိပရေၚ်ချဳဒရာၚ်က္ၜၚ်ကျာပၞာန် ပ္ဍဲပွိုၚ် (၂၄)နာဍဳဂှ်မ္ဂး ထ္ၜးပျးလဝ် ဒဒှ်ရတတ်ကၠောံလဝ် စေဝ်လ္ဒောဝ်ကလိုဟ်ၜဳဂၚ်ထိုၚ်ဝါန်ရ။ စေဝ်ဏံဂှ် နဒဒှ်ပရေၚ်တာဒၞာ ဟွံလုပ်သၞောဝ်သီုၜါလ္ပာ် လ္ပာ်ကြုက်ပိုၚ်ခြာလဝ်တုဲ နူကဵုသၞာံတုဲကၠုၚ်တေံ ကၠောန်သ္ပကၠုၚ်ဒၟံၚ် ပရေၚ်တတ်ကၠောံဒၟံၚ် လၟေၚ်ဍာံရ။
က္ၜၚ်ကျာသ္အာၚ်မွဲဖ္ဍိုက်ဂှ်လေဝ် တတ်ကၠောံအာ ဘာရဳချာန်နေဝ် မဒှ်တ္ကအ်ပါ်တိတ်နူဖိလေတ်ပိုၚ်တုဲ ပဝ်လုပ်အာ လ္ပာ်သၠုၚ်ကျာထိုၚ်ဝါန်ရဂှ် ဟီုလဝ်ရ။
ပရေၚ်ကၟိန်ဍုၚ်ကြုက် ကၠောန်ရေၚ်တၠုၚ်ဒၟံၚ် အကြာမွဲၜါတ္ၚဲဏံဂှ် က္တဵုဗဒှ်ကဵုဒၟံၚ် တၚ်ကော်ချဴဴ သွက်ပရေၚ်ဂီုကၠီု ကလိုဟ်ၜဳဂၚ်ထိုၚ်ဝါန်ကီု ပရေၚ်ဂီုကၠီုဒေသ သ္ကာတ်တ်မြဟ်ဟ်ရဂှ် ဓမံက်ထ္ၜးလဝ် ပ္ဍဲတၚ်လလောၚ်တြးပံၚ်တောဲ ဌာနဝန်ဇၞော်ပရေၚ်စဵုဒၞာရ။
ပရေၚ်ၜိုဟ်လလံ ကေုာံပရေၚ်ညိၚ်ဝတ် ကလိုဟ်ၜဳဂၚ်ထိုၚ်ဝါန်ဂှ် ဒဒှ်ရဒှ်တာလျိုၚ် ညးပါလုပ်ဆေၚ်စပ်သီုဖအိုတ်ရဂှ်လေဝ် ထပ်ဟီုလဝ် ပ္ဍဲတၚ်လလောၚ်တြးဂှ်ရ။
“ပရေၚ်ပလာပ်ပထုဲဒပ်ပၞာန်ကောန်မျူနေတ် အတိုၚ်ပရေၚ်ပၞာန် အဆက်ဟွံပိုတ်သ္ကုတ်ဂှ် ပရေၚ်ကြံၚ်မ္ၚိုဟ်တအ် ဂၠိုၚ်တိုၚ်ကၠုၚ်ဒၟံၚ်တီတီတုဲ ပရေၚ်ဂီုကၠီုပ္ဍဲဒေသဂှ် သာတုဲ သ္ပကဵုအကာဲအရာပရေံကၠုၚ်မာန်ရ။ ညးပိုၚ်ပြဳအဝဵုပေကျေန်တအ်ဂှ် သွက်ပရေၚ်ကၠောန်ရေၚ်တၠုၚ်ဏံ ကေတ်တာလျိုၚ်တုဲ ညံၚ်ဂွံဒေါံကဵု ပရေၚ်ချဳဒရာၚ် ရေၚ်တၠုၚ်ဏာဒၟံၚ် လ္ပာ်အကာဲအရာပရေံ မွဲလ္ပာ်ဓဝ်ဏံ လွာဲလၟုဟ်ဂှ် ပိုဲအာတ်မိက်ဏာရ”ဂှ် ဌာနဝန်ဇၞော်ပရေၚ်စဵုဒၞာ ဟီုသ္ဂးလဝ်ရ။
စပ်ကဵုကိစ္စဏံတုဲ နကဵုဌာန်ပရိုၚ်ရိုက်တာ သွက်ဌာနဝန်ဇၞော်ပရေၚ်စဵုဒၞာကြုက် ဂွံကဵုတၚ်သမ္တီဂှ် ပ္ဍဲအရာမအာတ်မိက်လဝ်ဂှ်မ္ဂး ကလေၚ်ဟီုဂးကဵုလဝ်တၚ်သမ္တီ ဟၟဲရ။
ပ္ဍဲကဵုသတ္တာဟတုဲကၠုၚ်တေံ မ္ၚးနူပရေၚ်ဒပ်ပၞာန်ကျာကြုက် လောန်ၜက်လုပ်စိုပ်လဝ် ပ္ဍဲဗ္ဒာဲထိုၚ်ဝါန်တုဲ ပ္ဍဲကဵုၜဳသၠုၚ်ကျာကြုက်ကေုာံ ပ္ဍဲဗလးၜဳၜက်သြၚ် သ္ကုတ်ဒိုဟ်ဨသာန်ထိုၚ်ဝါန်ဂှ်လေတ် သွက်ဂွံပ္ကတ်ပကေၚ်ပၞာန် ဗလးလဝ် က္ၜၚ်ဒပ်ပၞာန်ဍာ်ကြုက် (၁၀၀)ပြၚ်ရဂှ် သၞာဲဒပရေၚ်ဂီုကၠီုဒေသဂှ်မွဲတၠ ဟီုကဵု ဌာန်ပရိုၚ်ရိုက်တာရ။
သၞာဲဒဴဟွံမိက်ဓမံက်ယၟုမွဲတၠဂှ်မ္ဂး ပရေၚ်ချဳဒရာၚ်ဏံ က္တဵုဗဒှ်ကဵုဒၟံၚ်ဇြဟတ်ဓရိုဟ် ဇၟာပ်မၞိဟ် မၞုံပ္ဍဲဒေသတုဲ လၟိဟ်ဗၞတ်ဗ္ၜတ်ပရေၚ်ဒပ်ပၞာန်ဍာ် ပ္ကတ်ပကေၚ်ပၞာန်ဂှ် ၜိုတ်သၞာံတုဲတုဲကၠုၚ်ဏံ ဒှ်ကၠုၚ်ဇၞော်အိုတ်ရဂှ် ဟီုသ္ဂးလဝ်ရ။
ပ္ဍဲမွဲဒမြိပ်ပြၚ်ၜဳဂှ်လေဝ် သ္ပတံနူဂိတုဂျူလာၚ် စဵုကဵုဂိတုသေပ်တေမ်ဗာဂှ် ဒှ်ရာသဳကြုက် ပ္ကတ်ပကေၚ်လဝ်ပၞာန် လၟိဟ်ဂၠိုၚ်အိုတ်ရဂှ် ဌာနဝန်ဇၞော်ပရေၚ်စဵုဒၞာထိုၚ်ဝါန် ကဵုလဝ်တၚ်သမ္တီရ။
ကြုက်ဂှ် ပ္ဍဲကဵုဗဒိုပ်ပၞာန်ကျာ ထပ်သၠဲပ္တိတ်လဝ်တအ်ဂှ် သွက်ဂွံဆေၚ်မုက်ကဵုထိုၚ်ဝါန် ပၠလဝ်ဒပ် က္ၜၚ်ကျာဗတိုက် ကေုာံဒရုမ်တအ်လၟိုန်တုဲ ဒဒှ်ရကၠောန်သ္ပဒၟံၚ် ညံၚ်ဇြဟတ်ပၞာန်ကျာဂွံခိုဟ်ရဂှ် ဌာနဝန်ဇၞော်ထိုၚ်ဝါန် ဓမံက်ထ္ၜး ဟီုဂးလဝ် ပ္ဍဲလိက်ဒုၚ်စဳရေၚ် ပေၚ်သၞာံဂှ်ရ။
Ref: Reuters
sanlontai