သ္ကိုပ်ဝန်ဇၞော်သေံတၟိ သွက်ဂွံဖျေံစၟတ်ဂလိုၚ်ပ္တိုန် မူဝါဒ မၞိဟ်ဒးကအ်ဂၠိုၚ်တံဂှ် စဳဇန်

ၜၚ်ကံက်၊ သေပ်တေမ်ဗာ (၁၉)

သ္ကိုပ်ဝန်ဇၞော်ဍုၚ်သေံတၟိ သရဳထာ တာဝဳဇြေန်ဂှ် နကဵုအလဵုအသဳညး ပ္ဍဲကဵုကၞောတ်သၞာံဏံ သာတုဲဖျေံစၟတ်အာ မူဝါဒ ဖအောန်ဖျေံ ၚုဟ်မဳတာပၟတ်တံ သိုက်က်ဂှ်ကီု၊ မူဝါဒ မဖအောန်ဖျေံခရိတ်အရပ်စပ်မၞိဟ် ပါလုပ်သီုကဵု ပရေၚ်သၠုၚ်ပ္တိုန်ၚုဟ်ကမၠောန် လၟေၚ်တ္ၚဲတံရောၚ်ဂှ် ပ္ဍဲဂိတုသေပ်တေမ်ဗာ (၁၈) ဂှ် ဟီုဂးလဝ်ရ။

သွက်ဂွံကလေၚ်ခၠေဝ် ဒဒှ်မဗၞိက်ပလံၚ်ပ္တိတ်သေံတံ ဇြဟတ်ရာန်အောန်ဒၟံၚ်ဂှ်ကဵု ဓဝ်ပတှ်ေညးဓလိုက်တမ်ရိုဟ်တံ အောန်ကၠုၚ်ဒၟံၚ်တံဂှ်တုဲ သ္ကိုပ်ဝန်ဇၞော်ကဵု အလဵုအသဳညး (၁၁) ဗော်တံဝွံ သွက်ဂွံဖျေံစၟတ်မူဝါဒ မပ္တံကဵု သၠုၚ်ပ္တိုန်ၚုဟ်သြန်ဂိတု အောန်အိုတ်တံဂှ်ကီု၊ ပွမလဇကဵုခတှ် သွက်သၟာဗ္ၚတံဂှ် ကၠောန်ၜိုတ်ဒၟံၚ်ရ။

သ္အာၚ်နူဂှ်ပၠန် သွက်ဂွံကလေၚ်ပၠောပ်လမျီု ကုပရေၚ်ပိုန်ဒြပ် အာယှဒိုဟ်အဂၞဲ ဒုတိယဇၞော်အိုတ်ဂှ်ကဵု မူဝါဒ မၞိဟ်ဒးဂၞပ်ဂၠိုၚ် ပါလုပ်သီုကဵု အစဳဇန်ထံက်ပၚ်ကဵု ညးဇၞော်ဇၞော်ဂမၠိုၚ် နူကဵုအစဳဇန်သြန်ဒေတ်ဂျေတ်ဒဴတံဂှ် ကဵုလဝ်ကတိရ။

“ဖအောန်ဖျေံကဵုလဝ် ၚုဟ်မဳတာပၟတ်တံတုဲယျ။ ဆ္ဂး မိက်ဂွံထပ်ဖအောန်ဖျေံညိပၠန်၊ သတ္တာဟလအ်ညိဏောၚ်” သာ်ဝွံ သ္ကိုပ်ဝန်ဇၞော်ဂှ် သ္ဂးလဝ်တုဲ အကာဲအရာပရေၚ်ိပုန်ဒြပ်ကၟိန်ဍုၚ်ဂှ် ဟွံခိုဟ်စကွေံပုဟ်ဂှ်လေဝ် ထပ်ဟီုဂးလဝ်ရ။

နကဵုတၟံကၠံ ပရေၚ်ပိုန်ဒြပ်တောတက်ဂှ်ဟီုမ္ဂး ပ္ဍဲကဵုသၞာံဏံဂှ် ၂ ဒဿမ ၈ တၟံကၠံ တောတက်ဏောၚ် ချိၚ်ခယျလဝ်ကီုလေဝ် သ္ကိုပ်ဝန်ဇၞော် သာရဳတာဂှ် လၟေၚ်သၞာံ ပရေၚ်တောတက် ၅ တၟံကၠံ စၟဳလဝ်ရောၚ် သ္ဂးရ။

ပ္ဍဲကဵုဝှဝ်ရာမ် နူကဵုပရိုၚ်မဳဒဳယျာသေံမွဲ “ထာဲရာတ်” မကေတ်တာလျိုၚ် ကၠောန်ဗဒှ်ကဵုလဝ် ပ္ဍဲကဵုဂိတုတုဲကၠုၚ်တေံဂှ်လေဝ် သ္ကိုပ်ဝန်ဇၞော် သာရဳထာဂှ် ဖ္တိုက်ဖ္အောဝ်ဟီုဂးလဝ် သွက်ဂွံလ္ၚတ်ဂၠိုက်ဂၠါဲ ပရူပရေၚ်ဇီုကပိုက် လၟေၚ်ဒဒှ်ရာသဳဥတု အေဝ်လ်နဳညဵုတံဂှ်ကီု၊ တၚ်နွံပၟိက် သတ်သ္ဂောံတဵုထ္ပက်အဇာတံကဵု အခိၚ်ရတ်သီသြောံ အလန်ဒုတိယ ပ္ဍဲသၞာံဏံ ဍုၚ်တဵုလွဳဒၟံၚ်သြောံသ္ၚုတံဂှ် ဖ္တိုက်ဖ္အောဝ်ဟီုဂးလဝ်ရ။

နကဵုအလဵုအသဳညးလေဝ် သွက်အာဖရိက ကေုာံ သ္ကုတ်လဒေါဝ်ဗၟံက်တံဂှ် စွံအဓိကကဵု ဗၞိက်ပ္တိတ်ဟာလာ(လ်) တံဂှ်တုဲ ဒဒှ်ရသွက်ဂွံပံက် ဗွဝ်ဖျာပရေၚ်တဵုလွဳတၟိတံဂှ်ကီု မိက်ဂွံသၠဲပ္တိတ် တၚ်တုပ်စိုတ်ပရေၚ်သွံရာန်ဗၞိက် ကုဍုၚ်အဖဝ်မိတ်ဂမၠိုၚ် ဗွဲမဗၠးၜးဂှ် ဟီုဂးလဝ်ရ။

သာရဳထာ နူကဵုတၠကမၠောန်တိသ္ၚိကၠအ် ဒှ်ကၠုၚ်သၟာပရေၚ်ဍုၚ်ကွာန်ဂှ်ဝွံ တၚ်ပ္တဝ်က္ဍိုပ် ပိုတ်တ်သ္ကုတ်တ် သောၚ်ၚ်ကၠးကၠး သွက်မူဝါဒတံ ဟွံမွဲပုဟ်ဂှ် ဒးဒုၚ်ပါ်ပါဲဒၟံၚ် ကုဗော်ဒစဵုဒစးတံ ပ္ဍဲကဵုပါလဳမာန်တံ ဗွဲမသ္ကာတ်မြဟ်ရ။

ဆ္ဂး မူဝါဒဂမၠိုၚ်ဝွံ လ္ဂောံကဵုပရေၚ်ဘဏ္ဍာမ္ဂး တာလျိုၚ်နွံရောၚ် သ္ကိုပ်ဝန်ဇၞော်ဂှ် ခၠေဝ်ပလန်ဟီုဂးလဝ်ရ။

သ္ကိုပ်ဝန်ဇၞော်သေံဝွံ အပ္ဍဲသတ္တာဟဏံ သွက်ဂွံတိုန်စိုပ် ကောံဓရီုနာနာ ကုလသမဂ္ဂ မကၠောန်ဗဒှ်အာ ပ္ဍဲဍုၚ်နျူယျံက်ဂှ် စဳဇန်လဝ်တုဲ ပ္ဍဲလ္တူစၚ်ဂၠးတိသၠုၚ်ဂှ် ဆက်ထိၚ်ဒက်အာ တၚ်ဒတူလိုၚ်မံၚ်အကြာ ကၟိန်ဍုၚ်ဂှ်ရောၚ်ဂှ် သ္ဂးရ။

“ပိုယ်တံဂှ် ကုကြုက်၊ အမေရိကာန်တံဂှ် ပရေၚ်ဆက်ဆောံခိုဟ်ဟ် နွံဒၟံၚ်ရ။ မွဲနဲဟွံသေၚ်မွဲနဲ မွဲမွဲလ္ပာ် ညံၚ်ဂွိုအ်ဒစေၚ်အာဂှ် ပိုယ်တံ ဒးမံၚ်အကြာဏောၚ်” သာ်ဝွံ ညးဟီုဂးလဝ်ရ။

သွက်ဂွံတံၚ်ဂြဲ ပရေၚ်ဓလိုက်တမ်ရိုဟ် ဍုၚ်သ္အာၚ်တံမာန်ဂှ်လေဝ် အပ္ဍဲလၟေၚ်တရဴအမေရိကာန်ညးဂှ် သွက်ဂွံဆဵုဂဗကဵု သၞာဲဒဴရေၚ်တၠုၚ်ကေၚ်ကာ ပရေၚ်ပိုန်ဒြပ်ကဆံၚ်လ္တူတံဂှ် စဳဇန်လဝ်ရောၚ် သ္ဂးလဝ်ရ။

Ref: Reuters