ပ္ဍဲပလဝ် ဗဒိုက် PDF မွဲဗဒိုပ် ဒးဒုၚ်က္ဍိုက်ဗတိုက်လဝ်တုဲ သ္ဂံၚ် (၈)တၠ ဒးပြဟ်လလုဲလဝ်

ပလဝ်၊ သေပ်တေမ်ဗာ(၂၀)

ရးဒေသဇၞော်တၞၚ်သြဳ၊ ပွိုၚ်ဍုၚ်ပလဝ်၊ ဗဒိုပ်ဒပ်စဵုဒၞာညးဍုၚ်ကွာန် PDF မၞုံဗ္ဒာဲကွာန်မျဒေါၚ်မွဲဗဒိုပ် ဒးဒုၚ်က္ဍိုက်ဗတိုက်လဝ်တုဲ သ္ဂံၚ် PDF (၈)တၠ ဒးပြဟ်လလုဲလဝ်ရဂှ် ညးတာလျိုၚ်(ပကဖ) ရးဒေသတအ် ဟီုကဵုဌာန်ပရိုၚ် သြၚ်လောန်တိုၚ်(မ်)ရ။

ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် ဂေတ်လၟေၚ်ကွာန် ပ္ဍဲဒေသပလဝ်ဂှ် ပ္ဍဲကဵုဂိတုသေပ်တေမ်ဗာ စၟတ်တ္ၚဲ (၁၈) အခိၚ်နူဂယး ၜိုတ် (၉)နာဍဳဂှ် လုပ်စိုပ်က္ဍိုက်ဗတိုက်လဝ် ဗဒိုပ် PDF မၞုံဗ္ဒာဲကွာန်မျဒေါၚ် နကဵုဇြဟတ်ပေၚ်ၚ်ရ။

ဟိုတ်နူ ဗဒိုပ်ဒးဒုၚ်က္ဍိုက်ဗတိုက်လဝ်တုဲ သ္ဂံၚ် PDF (၈) တၠ ဒးပြဟ်လလုဲလဝ်တုဲ ပါလုပ်သီုလွဟ် (၇) ဒကိုအ် ဒးဒုၚ်သီကေတ်ဏာလဝ် သီုမကမ်လ္ၚဵုဂှ်ရ။

ပ္ဍဲကဵုပရေၚ်ဒဒှ် ဗဒိုပ်ဒးဒုၚ်က္ဍိုက်ဗတိုက်လဝ်ဏံ သ္ဂံၚ် PDF လ္ၚဵုဂှ်ၜိုန်ကၠေံဒၟံၚ်နွံကီုလေဝ် ဆက်လ္ၚတ်ဂၠိုက်ဂၠာဲဒၟံၚ် အကာဲအရာ သောဲသောဲဗြောဲဗြောဲရဂှ် ညးတာလျိုၚ်ဒပ်စဵုဒၞာညးဍုၚ်ကွာန် ရးဒေသဇၞော်တၞၚ်သြဳမွဲတၠ ဟီုရ။

အတိုၚ်ကောန်ဒပ်စဵုဒၞာညးဍုၚ်ကွာန်တအ် ဟီုသ္ဂးလဝ်မ္ဂး ဟိုတ်နူဒလာန်ကဵုပရိုၚ်တုဲ ဗဒိုပ်ဏံ ဒးဒုၚ်က္ဍိုက်ဗတိုက်လဝ်ရဂှ် ပရေၚ်ဟီုဂးပါ်ပါဲဒၟံၚ်လေဝ် နွံရ။

ဒပ်ကံၚ်ဇြဳပၞာန်က္ဍိုက်ဗတိုက်ဏာလဝ်ဗဒိုပ်ဏံဂှ် လုပ်စိုပ်ဒကဵုဂၟာဲဒၟံၚ် ကွာန်မျဒေါၚ် ညးဍုၚ်ကွာန်တအ် ဂြိပ်ဒဴပါဲဓလေတ်တိတ်လဝ် သီုအလုံမွဲကွာန်ရဂှ် ဂွံတီကေတ် အတိုၚ်ညးဒေသတအ်ဟီုလဝ်ရ။

ကရောၚ်ပၞာန်ဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၁၇)တေံလေဝ် ဃောထ္ပက်လုပ်ကၠုၚ်ကရောၚ်ပၞာန် ပ္ဍဲကွာန်ပျေန်ဖျူ ပွိုၚ်ဍုၚ်ပလဝ်ဂှ် ရပ်ဒက်ပြိုက်ဂစိုတ်ဏာလဝ် ကောန်အရာပ်ညးဒေသ (၄)တၠတုဲ သ္ၚိဒၟံၚ် (၂)မဂှ်လေဝ် စံၚ်ပလီုဏာလဝ်ဏီရ။

ပ္ဍဲပွိုၚ်ဍုၚ်ပလဝ်ဂှ် ဟိုတ်နူဒပ်ကံၚ်ဇြဳပၞာန်ထ္ပက်ဒၟံၚ်ကရောၚ်ပၞာန်တုဲ ညးဒေသနူကွာန်မျဒေါၚ်၊ ပျေန်ဖျူ၊ လေက္ကူ ကေုာံ ပိတာတ်တအ် ၄၀၀၀ ပြၚ်ဂှ် ဒးဂြိပ်ဒဴပါဲဓလေတ်ဒၟံၚ် ပ္ဍဲဒၞာဲဗၠးဘဲရ။

ပရိုၚ် – သြၚ်လောန်တိုၚ်(မ်)

ဗီုရုပ် – ချာန်နေဝ်တြးဝါဒကံၚ်ဇြဳပၞာန်