ကောန်ဒပ်ကံၚ်ဇြဳပၞာန်မွဲတၠ ကၠုၚ်စိုပ်ပံၚ်တောဲကဵု KNLA

မတ်မလီု၊ သေပ်တေမ်ဗာ(၂၀)

ကောန်ဒပ်ကံၚ်ဇြဳပၞာန် နူတံဒပ်ပၞာန်တိုက် စၟတ်(၉) ဖျေံသ္ဇိုၚ်ပွိုၚ်ဍုၚ်သဓီု တွဵုရးဍုၚ်မန်မွဲတၠဂှ် သီုကဵုသနိုက်ဗာမွဲဒကိုအ် ကၠုၚ်စိုပ်ပံၚ်တောဲ ဇရေၚ်ဒပ်ပၞာန်ဗၠးၜးကောန်ဂကူကရေၚ် KNLA ရဂှ် ဗဟဵု KNU လလောၚ်တြးလဝ်ရ။

ကောန်ဒပ်ပၞာန် သဝ်တေတ်နိုၚ်ထောန် အယုက် ၃၃ သၞာံဂှ် ပ္ဍဲဂိတုသေပ်တေမ်ဗာ စၟတ်တ္ၚဲ (၈)ဂှ် မွဲကရောံကဵု 338 Sniper မွဲဒကိုအ်၊ မကမ် 338 (၅၀) မ ကၠုၚ်စိုပ်ပံၚ်တောဲလဝ် ဇရေၚ် KNLA ရ။

​ကောန်ဒပ်ပၞာန် သဝ်တေတ်နိုၚ်ထောန်ဂှ် ဟိုတ်နူဟွံဒးဂၞပ်ကဵု သၞောတ်ပရေၚ်အုပ်ဓုပ်ဒပ်ကံၚ်ဇြဳပၞာန်တုဲ ကၠုၚ်စိုပ်ပၚ်တောဲလဝ် ဇရေၚ် KNLA တုဲ စဵုကဵုအခိၚ်ပၠန်ဂတးစိုပ်ဒတုဲ ဗတိုက်သရိုဟ်ပ္တိတ်အာ သၞောတ်တၠအဝဵုပၞာန်ရောၚ်ဂှ် ဂွံတီကေတ်ရ။

ကောန်ဒပ်ကံၚ်ဇြဳပၞာန် ကၠုၚ်စိုပ်ပံၚ်တောဲလဝ် ဇရေၚ် KNLA သဝ်တေတ်နိုၚ်ထောန်ဂှ် နူကဵုဗိုလ်ဒါဗဝ် သ္ကိုပ်ချဳဒရာၚ်ပၞာန် ကရောၚ်ပၞာန်ကဝ်ဗရာဂှ် ရီုဗၚ်ထံၚ်ပၚ်ကဵုလဝ် သြန်ၝာတ်သေံ မွဲကိုတ်ရဂှ် ဓမံက်လဝ် ပ္ဍဲတၚ်လလောၚ်တြး KNU ရ။

ဗော်သွးကောန်ဂကူကရေၚ် KNU ဂှ် နကဵုကောန်ဒပ်ပၞာန် ဟွံမိက်ယိုက်ဂၠေၚ်တာလျိုၚ် သၟဝ်တဲကံၚ်ဇြဳပၞာန်တအ်ဂှ် ဒဒှ်ရကၠုၚ်စိုပ်ပံၚ်တောဲမာန်ဒၟံၚ်ကီု ရီုဗၚ်ထံက်ပၚ်ကဵုအာ သွက်ပရေၚ်ဒတူလာၚ်ဘဝရောၚ်ဂှ် ကဵုလဝ်သမ္တီရ။

အလုံမွဲကၟိန်ဍုၚ်ဂှ် ဟိုတ်နူဟွံဒုၚ်တဲ ပရေၚ်သီအဝဵုတုဲ ကောန်ဒပ်ကံၚ်ဇြဳပၞာန် ၁၄၀၀၀ ပြၚ်တအ် ကၠုၚ်လုပ်ဇူဗ္ဒာဲလဝ် ဇရေၚ်ဂၠံသြိုဟ်ညးဍုၚ်ကွာန် နွံရဂှ် အလဵုအသဳညဳသၟဟ်ကောန်ဂကူ NUG လလောၚ်တြးလဝ် ပ္ဍဲဂိတုသေပ်တေမ်ဗာ စၟတ်တ္ၚဲ (၇)ဂှ်ရ။

ပရိုၚ် – သြၚ်လောန်တိုၚ်(မ်)

ဗီုရုပ် – KNU