ပ္ဍဲသၞေဟ်ကၚ်ဍာ်ဗု ဒးဒုၚ်ပန်ကဵုသနာ်ပါတုဲ ကောန်ဒပ်ကံၚ်ဇြဳပၞာန် (၂) တၠ ချိုတ်အာ

ဍာ်ဗု၊ သေပ်တေမ်ဗာ (၂၀)

သၞေဟ်ကၚ်စၟဳတ်ကံၚ်ဇြဳပၞာန် မဖျေံလဝ်ဒပ် ဗ္ဒါဲကျာ်ဒတူ၊ ဍုၚ်ဍာ်ဗု၊ ရးဒေသဇၞော်တၞၚ်သဳ ဒးဒုၚ်ပန်ပှော်ဗ္တိုက်ကဵု သနာ်ပါတုဲ ကောန်ဒပ်ကံၚ်ဇြဳပၞာန် (၂) တၠ ချိုတ်အာလဝ်ရောၚ် ဂွံတီကေတ် ဇရေၚ်ဂကောံဒပ်စဵုဒၞါညးဒေသတံရ။

ဂကောံဒပ်ပံၚ်ကောံ စဵုဒၞါဒေသတံ ပ္ဍဲဂိတုသေပ်တေမ်ဗာ (၁၈) ၜိုတ်အခိၚ်နူဂယး ၁၁ နာဍဳတုဲကၠုၚ်တေံဂှ် အာစိုပ်ပန်ပှော်ဗ္တိုက်လဝ် ကုဗ္ဒိုပ်သၞေဟ်ကၚ်စၟဳတ်ဍာ်ဗု ဇြဟတ်ကောန်ဒပ် ၃၀ ပြၚ် မဖျေံဒၟံၚ်ဒပ်ဂှ် နကဵုသနာ်ပါရ။

ဟိုတ်နူပရေၚ်ပန်ပှော်ဗ္တိုက် သနာ်ပါ (၃) တၠဂှ်တုဲ ကောန်ဒပ်ကံၚ်ဇြဳပၞာန် (၂) တၠဝွံ ပ္ဍဲကဵုဒၞါဲဒှ်ပရူဂှ်ဟေၚ် ချိုတ်အာလဝ်ရောၚ် ညးတာလျိုၚ် ဂကောံဒပ်စဵုဒၞါညးဍုၚ်ကွာန်ထဝါဲမွဲတၠ ဟီုရ။

ကြဴနူဒးဒုၚ်ပန်ကဵု သနာ်ပါတုဲဂှ် နူကဵုလ္ပာ်ကံၚ်ဇြဳပၞာန်ဂှ် ကလေၚ်ပန်ပှော်လဝ် နကဵုလွဟ်ဇၞော်၊ လွဟ်ဍောတ်တံ နွံကီုလေဝ် ဇီုကပိုက်ဒးဟွံမွဲမွဲသာ် ဆုတ်ကလေၚ်မာန်လဝ်ရောၚ် သ္ဂးရ။

ဇွကောန်ဒပ်ကံၚ်ဇြဳပၞာန် (၂) တၠ ဒးဒုၚ်ပန်ပှော်တုဲ မချိုတ်အာလဝ်ဂှ် အခိၚ်ဇိုၚ်သဝ်တ္ၚဲဂှ် ကၠုၚ်စိုပ်ယိုက်ဏာလဝ်ရောၚ် ဂွံတီကေတ် အတိုၚ်ဂလာန်ညးဒေသတံရ။

ပရေၚ်ဗ္တိုက်ဏံဂှ် ဒပ်စြေက် DDT (၃) ၊ ဂကောံမှဲအကး ဍာ်ဗုကဵု ဂကောံဒပ်ဒမၠုက် (နဂါးနီ) တံ ပံၚ်တောဲဗ္တိုက်လဝ်ရ။

တုဲကၠုၚ် ပ္ဍဲဂိတုအဝ်ဂါတ် ၂၉ တေံဂှ်လေဝ် ဒပ်ကံၚ်ဇြဳပၞာန် မဖျေံလဝ်ဒပ် ဗ္ဒါဲကျာ်ဒတူဂှ် ဒးဒုၚ်ဗ္တိုက်လဝ်ဂှ်ရ (၃) တၠချိုတ်တုဲ (၄) တၠ ကလိဂွံလဝ်ဝပ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media