ပ္ဍဲကဵုပေါဲဗ္တိုက် အလုံဍုၚ်မွဲတံဂှ် ကံၚ်ဇြဳပၞာန် ဒးသုၚ်စောဲကၠုၚ် သီုကဵုတရဴဍာ်

မျေတ်ကျဳနာ၊ သေပ်တေမ်ဗာ (၂၀)

ဒပ်ကံၚ်ဇြဳပၞာန် မ္ဒးကလေၚ်ဗ္တိုက်ဒၟံၚ် ပၞာန်တဝ်စၞေဟ်ညးဍုၚ်ကွာန် နူကဵုသီုဗလးတိ သီုကဵုမှဲအကးတေံ သ္ကာတ်တ်မြဟ်ဟ်ဂှ်ဝွံ အပ္ဍဲကာလသီအဝဵု ၜါသၞာံဘာ်ပြၚ်ဏံဂှ် ကၠောန်ကၠုၚ် သီုကဵုပရေၚ်ပြုပြေၚ်ပၞာန်တရဴကျာတံရောၚ်ဂှ် ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဟိုတ်နူပေါဲဗ္တိုက်ထပိုတ်ရိုဟ်ကၞက်တၠအဝဵုပၞာန် ဂကောံဒပ်ရပ်လွဟ် မမံက်ဂတဝ်ကၠုၚ် သွက်ပၞာန်တဝ်စၞေဟ်ညးဍုၚ်ကွာန် ဒၟါနူပရေၚ်ပၞာန်သီအဝဵုဂှ်တုဲ ဒဵုကဵုအခိၚ်လၟုဟ် ဒပ်ကံၚ်ဇြဳပၞာန်ဝွံ ဒးပံက်လဝ်မုက်ပၞာန် ကြပ်ဗ္ဒါဲဍုၚ်မွဲရ။

ဒပ်ကံၚ်ဇြဳပၞာန် မပံက်လဝ်မုက်ပၞာန် ကြပ်အလုံဍုၚ်မွဲဂှ်ဝွံ ဟိုတ်နူပရေၚ်တဝ်စၞေဟ်ဒစဵုဒစး ဂကောံဇြဟတ်ပၠန်ဂတးတံဂှ်တုဲ အပ္ဍဲကဵုအခိၚ်သီအဝဵုဂှ် မ္ၚးနူဒပ်တိုက်၊ ဒပ်ကျာဂှ် အခါလၟုဟ် ဒးသုၚ်စောဲဒၟံၚ် သီုကဵုဒပ်ဍာ်တံရ။

ဒပ်ဍာ်ကံၚ်ဇြဳပၞာန်ဝွံ မ္ၚးနူတွဵုရးကချေၚ်၊ ရးမဂွဵု၊ ရးသက်ကိုၚ် ကေုာံ ရးတၞၚ်သဳတံဂှ် ပ္ဍဲကဵုရး ကေုာံ တွဵုရး မဆက်စပ်ဒၟံၚ်ကဵု ဂၠံၚ်ၜဳတံဂှ်လေဝ် သုၚ်စောဲတရဴဍာ်တုဲ ဗ္တိုက်ကၠုၚ်တံ၊ ဗပေၚ်ကၠုၚ်ဇြဟတ် နကဵုလွဟ်လက်နက်တံဂှ် ကၠောန်ၜိုတ်ကၠုၚ်ရ။

ညးတာလျိုၚ် နူကဵုဂကောံဒပ်ပံၚ်ကောံ ၜဳချေၚ်တွေန် မွဲတၠဂှ် ဟိုတ်နူပေါဲဗ္တိုက် အပ္ဍဲရးသက်ကိုၚ်တံတုဲ ဒပ်ကံၚ်ဇြဳပၞာန်ဝွံ နူကဵုကရောၚ်ပၞာန်ဂှ် ဟိုတ်နူဗပေၚ်ဇြဟတ်ဒပ် ဟွံမာန်ဂှ်ရ ရပ်စပ်ကၠုၚ်တရဴဍာ်အဓိကရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ ဂၠံၚ်ကုန်တံဂှ် အာဟွံဂွံပုဟ်။ ဇၟာပ်ပ်အာ နူကဵုဂၠံၚ်ကုန်တံဂှ် ဟိုတ်နူဒးဒုၚ်ဗ္တိုက်ဖံက်ဗ္တိုဟ်ဒၟံၚ်မာၚ် ကုဍေံတံဂှ်ရ ဍေံတံ ပြံၚ်ရပ်စပ်ကၠုၚ် တရဴဍာ်ရ။ ပြံၚ်ရပ်စပ်တရဴဍာ်ပၠန်ဂှ်လေဝ် ဍေံတံ ဟွံပြေပြံၚ်ပုဟ်။ ဂကောံနူကဵု သြၚ်ပုၚ်ပါဲၜဳတံဂှ် အရိုဟ်ဟ်တိုန်ကၠုၚ် ဗ္တိုက်ဒၟံၚ်ဏောၚ်။ ဆ္ဂး နွံမွဲဂှ်တှ်ေ ပိုယ်တံဂှ် ဟိုတ်နူသုၚ်စောဲဒၟံၚ် ကၠောန်လဝ်ကဵုတဲတံသၟးရ မာန်ဂှ်တုဲ ပ္ဍဲအခိၚ်ဍာ်ဂၠိုၚ်တံဟီုတှ်ေ ဂၠံၚ်ၜဳဂှ်သၠဲတုဲ ပိုယ်တံ ဂွံစိုပ်တရဴဂှ် အောန်ဒၟံၚ်” သာ်ဝွံ သ္ဂးရ။

ပ္ဍဲကဵုဏံ ပ္ဍဲကဵုရးသက်ကိုၚ် ကေုာံ တွဵုရးကချေၚ် ဒၞါဲပၞာန်တဝ်စၞေဟ်ညးဍုၚ်ကွာန် ဇြဟတ်ခိုဟ်တံဂှ် သုၚ်စောဲဗ္တိုက်ကၠုၚ် တရဴဍာ်တံဂှ် ဂွံဆဵုကေတ်ဂၠိုၚ်အိုတ်ရောၚ် ညးမၚ်ရံၚ်ပရေၚ်ပၞာန်တံ သ္ဂးအိုတ်ရ။

အခိၚ်လၟုဟ်ဂှ် က္ၜၚ်ဖ္ဍိုက်ကၠုၚ် ဇြဟတ်ဒပ်တံ၊ လွဟ်လက်နက်မကမ် ကံၚ်ဇြဳပၞာန်တံဂှ်ဝွံ ပ္ဍဲကဵုဂၠံၚ်ၜဳဨရာဝတဳဂှ် ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ လ္ပာ်ကံၚ်ဇြဳပၞာန်ဂှ်လေဝ် ကလေၚ်ပန်ပှော်ဒၟံၚ် နကဵုလွဟ်ဇၞော်တံဂှ် ကၠောန်ၜိုတ်ဒၟံၚ်ရ။

ဟိုတ်နူမကမ်လွဟ်ဇၞော် နူကဵုက္ၜၚ်ကံၚ်ဇြဳပၞာန်တံ ကလေၚ်ပန်ပှော်လဝ်ဂှ်တုဲ သ္ၚိဒၟံၚ်ညးဒေသတံ ဇီုကပိုက်လီုလာ်ဂှ်ကဵု မၞိဟ်ချိုတ်တံဂှ်လေဝ် နွံဒၟံၚ်ရောၚ် ပရိုၚ်တမ်ရိုဟ်တွဵုရးကချေၚ်မွဲတၠ ဟီုဂးလဝ်ရ။

“က္ၜၚ်တံ တိုန်ကၠုၚ်မ္ဂး က္ၜၚ်ဍေံတံ ဒးဒုၚ်ဗ္တိုက်ဒၟံၚ် မွဲဏှမွဲဏှတုဲ ပန်ပှော်ဏာ သြၚ်ၜဳလ္ပာ်တေံလ္ပာ်ဏံ ကြာန်န်ဂှ် နွံ။ အာၜိုတ် တာပုၚ်ရဂှ် ဍေံတံ ဒးဒုၚ်ပန်ဒၟံၚ် ချိုတ်ပၠိုတ်ဂှ်ရ ကံၚ်ဇြဳပၞာန်ဂှ် ဟွံရုဲစှ် ဂၠံၚ်တရဴဏံရပုဟ်။ မူဟိုတ်ရောဟီုတှ်ေ ပ္ဍဲကဵုလ္ပာ်ဂၠံၚ်ဗာန်မဝ်ဂှ်တှ်ေ မ္ၚးနူ KIA ဂှ် ဒပ်ပၞာန်ကွးဘာလေဝ် ဟိုတ်နူဗ္တိုက်ဒၟံၚ် ကံၚ်ဇြဳပၞာန်ကီုဂှ်ရ အကြာဗာန်မဝ်ကဵု မာန္တလေဝ်ဂှ် ရပ်စပ်ဒၟံၚ် ၜဳဨရာဝတဳ သွက်ဂၠံၚ်တရဴပလံၚ်ဗစိုပ်ထံက်ပၚ်တံဂှ်ရောၚ်” သာ်ဝွံ သ္ဂးရ။

တုဲကၠုၚ် ပ္ဍဲဂိတုသေပ်တေမ်ဗာ (၁) တေံဂှ်လေဝ် ဒပ်ပံၚ်ကောံ ဒပ်ပၞာန်ဗၠးၜးကချေၚ် KIA, PDF တံ သီကေတ်လဝ် ဗ္ဒိုပ်ဒပ်ကံၚ်ဇြဳပၞာန် ကွာန်ကျံက်ကျဳ နူကဵုသြၚ်ၜဳဨရာဝတဳ မကေတ်ကဵုဒၟံၚ်ဂီုကၠီု ဂၠံၚ်တရဴက္ၜၚ်ပၞာန် ကံၚ်ဇြဳပၞာန်တံဂှ်ဏီရ။

ကံၚ်ဇြဳပၞာန်ဝွံ ရပ်စပ်စကာ ဂၠံၚ်ဍာ်တံတုဲ ဖ္ဍိုက်ဏာနၚ်ဒၟံၚ် ကၠေၚ်က္ၜၚ်ကျာတံကဵု ကၠေၚ်စၞပၟတ်တံတုဲ နူကဵုမှဲအကးတေံဂှ် ထံၚ်ပရိုၚ်ကီု ပသောၚ်ဂၠံၚ်ကီုတံဂှ် လေပ်ကၠောန်သ္ပတဴရောၚ် ဂကောံဇြဟတ်ပၠန်ဂတးတံ သ္ဂးအိုတ်ရ။

ညးဒုၚ်တာလျိုၚ် (ပကဖ) ရးတၞၚ်သဳ ကိုဝ်သတာဂှ်လေဝ် ဒပ်ကံၚ်ဇြဳပၞာန်ဝွံ ရပ်စပ်စကာကၠုၚ်ဒၟံၚ် တရဴဍာ်အပ္ဍဲရးတၞၚ်သဳတံ သွက်ဂွံပလံၚ်လွဟ်လက်နက်၊ ဇွောံမတံသၟးဟွံက သုၚ်စောဲကၠုၚ်ဒၟံၚ် သီုကဵုသွက်ပရေၚ်ဗ္တိုက်တံရောၚ်ဂှ် ဟီုဂးကၠုၚ်ရ။

“အဓိကဂှ်တှ်ေ သုၚ်စောဲဒၟံၚ် သီုၜါလ္ပာ်ဏောၚ်။ လ္ပာ်ကဵုအရီုဗၚ်ပၞာန်တံဂှ် သုၚ်စောဲဒၟံၚ် သွက်ပရေၚ်ဗ္တိုက်အဓိကဏောၚ်။ လက္ကရဴဏံ လ္ပာ် Logistics ဍေံတံလေဝ် သုၚ်စောဲကၠုၚ် သီုကဵုတရဴကျာတံရ။ မူဟိုတ်ရောဟီုတှ်ေ လ္တူဂၠံၚ်ဇၞော်ဗျဳထံၚ်သုဂှ် ဍေံတံ ဒးဒုၚ်ဗ္တိုက်ဒၟံၚ် မွဲဏှမွဲဏှရ။ ဟိုတ်နူဒးဒုၚ်ဗ္တိုက်ဒၟံၚ်ဂှ်ရ လက္ကရဴဏံ သုၚ်စောဲဂှ် အောန်အာရ။ အေ ဂှ်တှ်ေ ပရေၚ်ဗ္တိုက်ကီု၊ လ္ပာ် Logistics တံကီုဂှ် သုၚ်စောဲကၠုၚ် တရဴဍာ်တံဂၠိုၚ်ရ” သာ်ဝွံ သ္ဂးရ။

ပ္ဍဲကဵုရးတၞၚ်သဳဂှ် ဒပ်ကံၚ်ဇြဳပၞာန်ဝွံ နူ (ဘုတ်ပြင်း) − ကအ်သံၚ် အာလ္ပာ်ဗိက်၊ နူဗိက် အာပဠဝ်၊ ထဝါဲကဵု လံၚ်လုၚ်တံဂှ် သုၚ်စောဲကၠုၚ် တရဴဍာ်တံ အဓိကရ။

ကံၚ်ဇြဳပၞာန်ဝွံ ပ္ဍဲကဵုဂၠံၚ်ကုန်ဂှ် ကျကၠုၚ်ပရေၚ်ပၞာန်ဂှ်ကီု၊ နူကဵုမှဲအကးဂှ် ဟိုတ်နူခရိတ်ပလံၚ်ဗစိုပ်တံ ဇၞော်သၠုၚ်ကၠုၚ်ဂှ်ရ သုၚ်စောဲတရဴဍာ်တုဲ ဒးဗပေၚ်ကၠုၚ်ဒၟံၚ် ဇြဟတ်ဒပ်၊ ဇြဟတ်ဇွောံမတံရောၚ်ဂှ် ညးမၚ်ရံၚ် ပရေၚ်ပၞာန်တံ သ္ၚဳဂၠိပ်လဝ်အိုတ်ရ။

အခိၚ်လၟုဟ်ဂှ် ဟိုတ်နူပရေၚ်တဝ်စၞေဟ်ဒစဵုဒစး ဂကောံဒပ်စဵုဒၞါဒေသ ကေုာံ ဂကောံရပ်လွဟ်ကောန်ဍုၚ်အရၚ် (EAOs ) တံဂှ်တုဲ အပ္ဍဲကာလသီအဝဵု ၜါသၞာံပြၚ်ဏံ ဗီုပြၚ်က္တဵုဒှ်ပေါဲဗ္တိုက်တံ ပြံၚ်လှာဲကၠုၚ်တုဲ ဒပ်ကံၚ်ဇြဳပၞာန်ဝွံ နူကဵုပၞာန်ထ္ပက်ဂှ် ပြံၚ်လှာဲကၠုၚ် လွေဟ်ပၞာန်ဒုၚ်ရောၚ် ဂွံတီကေတ် အတိုၚ်တၚ်လလောၚ်တြး ဂကောံသုတေသနမွဲဂကောံရ။

အတိုၚ်ဂလာန် ဂကောံသုတေသန ISP-Myanmar ဂှ်မ္ဂး အပ္ဍဲကာလသီအဝဵုပွိုၚ်ၜါသၞာံဘာ်ပြၚ်ဏံ အလုံမွဲကၟိန်ဍုၚ်ဂှ် ပေါဲဗ္တိုက်အပံၚ် မွဲဠက်ပြၚ် က္တဵုဒှ်လဝ်တုဲ ပ္ဍဲကဵုပေါဲဗ္တိုက်တံဂှ် ဒပ်ကံၚ်ဇြဳပၞာန်ဝွံ ကောန်ကွာန်ဟွံရုဲ ဗ္တိုက်ဒၟံၚ်တံ နွံကၠုၚ်ဂှ် လလောၚ်ပ္တိတ်လဝ် အပ္ဍဲဂိတုအဝ်ဂါတ်တေံရ။

ပရိုၚ်−သြၚ်လောန်တိုၚ်(မ်)

ဗီု−ANPTT