ကနေဒါဘာတ်ပ္တိတ် သၞာဲဒဴကလုတ်အိန္ဒိယသၠုၚ်အိုတ်

နယူဒေလဳ၊ သေပ်တေမ်ဗာ (၂၀)

စပ်ကဵုက္ဍိုပ်သ္ကိုပ်ကောန်ဂကူသေက်ခ်မွဲတၠ ဒးဒုၚ်ပြိုက်ဂစိုတ်လဝ်တုဲ ဟိုတ်နူအလဵုအသဳကနေဒါ ထ္ဍေၚ်ဘာတ်ပ္တိတ်လဝ် အမာတ်ကလုတ်အိန္ဒိယသၠုၚ်အိုတ်မွဲတၠတုဲဂှ် ပရေၚ်ဆက်ဆောံအကြာၜါကၟိန်ဍုၚ် ကြံၚ်မ္ၚိုဟ်ဒၟံၚ်ရဂှ် ဂွံတီကေတ်ရ။

သၞာဲဒဴအိန္ဒိယ ဒးဒုၚ်ထ္ဍေၚ်ဘာတ်ပ္တိတ်လဝ်ဂှ် ပရေၚ်ဆေၚ်ဆက် စပ်ကဵုကိစ္စပြိုက်ဂစိုတ်လဝ် က္ဍိုက်သ္ကိုပ်သေက်ခ် ဟာဒိသေန်ဂျာ မဒယှ်တှ်ဒၟံၚ် နွံရဂှ် ဝန်ဇၞော်ဍုၚ်သ္အာၚ်ကနေဒါ ဒှ်ဒၟံၚ်သံသယရ။

အကာဲအရာဒးဒှ်ဓဝိၚ် ဂွိၚ်စံၚ်တူဒၟံၚ်ဗီုဏံ ဟီုထ္ၜးလဝ် ကုသ္ကိုပ်ဝန်ဇၞော်အိန္ဒိယမိုဝ်ဒဳ အလဵုဇကုမၞိဟ် တိုက်ရိုက်တုဲရဂှ် သ္ကိုပ်ဝန်ဇၞော်ကနေဒါ ဟီုထ္ၜးလဝ် နူအခိၚ်ပြဟ်ဟ်တေံရ။

ပွမပြိုက်ဂစိုတ်လဝ် ကောန်ဍုၚ်ကနေဒါ လ္တူတိဍာ်ကနေဒါဂှ် ဟိုတ်နူဇီုဓဗတ်ဒး အခေါၚ်အဝဵုကၟိန်ဍုၚ်တုဲ ဒုၚ်တဲဟွံဂွံရဂှ်လေဝ် သ္ကိုပ်ဝန်ဇၞော်ကနေဒါ ဆက်ဟီုလဝ်ရ။

နကဵုအလဵုအသဳအိန္ဒိယ တးပါဲလဝ် တၚ်သ္ကိုပ်ဝန်ဇၞော်ကနေဒါဟီုဂးလဝ်ဂှ်တုဲ ဗက်ပၟိက်စိုတ်တုဲ ဟီုဂးဒၟံၚ် အရေဝ်ဟၟဲကဵုအဓိပ္ပါယ်ရဂှ် ကလေၚ်ဟီုပလန်လဝ်ရ။

သ္အာၚ်နူဂှ်ပၠန် နကဵုကနေဒါဂှ် ကိစ္စက္တဵုဒှ်ဒၟံၚ် လ္တူတိဍာ်အခေါၚ်အဝဵုဇကုပိုၚ်ပြဳလဝ် အလုံသီုဖအိုတ်ဂှ် ညံၚ်ဂွံကၠောန်ရေၚ်တၠုၚ် ကေတ်အာအရေဝ် အတိုၚ်သၞောဝ်ဥပဒေကီု ကမၠောန်ညံၚ်သၞိၚ်ရုပ်အိန္ဒိယဒးစှ်ေဂှ် ညံၚ်ဂွံဝေၚ်ပါဲကဵုကီုဂှ် ဟီုဗတိုက်ဖ္အောဝ်လဝ်ရ။

“နကဵုပိုဲတအ် တၚ်လလောၚ်တြး ဝန်ဇၞော်ဍုၚ်သ္အာၚ်ကေုာံ သ္ကိုပ်ဝန်ဇၞော်ကနေဒါ ဟီုဂးလဝ် ပ္ဍဲပါလဳမာန်တအ်ဂှ် ဂွံဆဵုလဝ်တုဲ ပါဲတးဏာ တၚ်ဟီုဂးလဝ်တအ်ရ”ဂှ် ဝန်ဇၞော်ဍုၚ်သ္အာၚ်အိန္ဒိယ လလောၚ်တြးလဝ်ပ္ဍဲတ္ၚဲ အၚာဂှ်တုဲ ဟီုဂးလဝ်ရ။

အေဂျေန်ဇြဳထံၚ်ပရိုၚ်ကနေဒါတအ်ဂှ် စပ်ကဵုက္ဍိုပ်သ္ကိုပ်ဂကူသေက်ခ် ဒးချိုတ်လဝ်တုဲ ကၠောန်ရေၚ်တၠုၚ်ဒၟံၚ် ပရေၚ်ဂၠိုက်ဂၠာဲစၟဳစၟတ်ရဂှ်လေဝ် ဂွံတီကေတ်ရ။

က္ဍိုပ်သ္ကိုပ်ဟာဒိသေန်နဳဂျာ ညးမပြာကတ်ဒၟံၚ် ပ္ဍဲအရာအာတ်မိက်တိဍာ် ကေုာံပရေၚ်ဗၠးၜးဂကူသေက်ခ်ဂှ် ပ္ဍဲကဵုမ္ၚးဇြေန်တာယေန်သၞာၚ်သေက်ခ် မၞုံဍုၚ်သာရေ၊ ကိုဝ်လာမ်ဗဳယာ ဗျိတုၚ်ဂှ် ဒးဒုၚ်ပန်ပှ်ောလဝ် ပ္ဍဲဂိတုဂျောန် စၟတ်တ္ၚဲ (၁၈)ရဂှ် သ္ကိုပ်ဝန်ဇၞော်ကနေဒါ ဟီုလဝ် ပ္ဍဲပါလဳမာန်ရ။

“နကဵုပိုဲတအ်ဂှ် ဗွဲကိတ်ညဳကဵုဒဳမဝ်ကရေဇြဳ ယေန်သၞာၚ်လေပ်ဒၟံၚ်တုဲ ပရေၚ်အုပ်ဓပ်သၞောဝ်ဓဝ်ဂှ် စွံပ္တန်လဝ်ကတိကဝတ်ဗွဲတၟေၚ် နွံရ။ သၟာပ္ကီုပရာပ်စိုပ်တၞုၚ်တၞး ခါလီသတာနဳတအ်ဂှ် ကဵုလဝ်အခေါၚ်ဇူဗ္ဒာဲ ပ္ဍဲကနေဒါတုဲ နူကဵုဂှ်ရ ဘပဠဒၟံၚ် အခေါၚ်အဝဵုအိန္ဒိယ သီုကဵုဗီုပြၚ် တိဍာ်ပယျဵုဒၞက် နွံတန်တဴဒၟံၚ်ရ”ဂှ် အလဵုအသဳအိန္ဒိယ ကလေၚ်ဟီုပလန်လဝ်ရ။

Ref-Hindustan Times, Indian Express.com