သွက်ဂွံကဵုဇြဟတ်ဂရိုဟ် ကုရုယှာဂှ် ဝန်ဇၞော် G7 ဂမၠိုၚ် ဖ္တိုက်ဖ္အောဝ်ကြုက်

တိုဝ်ကျိုဝ်၊ သေပ်တေမ်ဗာ (၂၀)

ပ္ဍဲကဵုပေါဲဆဵုဂဗတၞဟ်ခြာ ကောံဓရီုကုလသမဂ္ဂနာနာဂှ် ညံၚ်ပရေၚ်ဂၠါဲသၞရုယှာတံ ဂွံဒေါအ်ဒေၚ်အာ နကဵုကြုက် သွက်ဂွံကဵုဇြဟတ်ဂရိုဟ်မာန်ဂှ် ဝန်ဇၞော်ကာဍုၚ်သ္အာၚ် G7 တံ ပ္တိတ်လဝ်တၚ်လလောၚ်တြးပံၚ်တောဲ အာတ်မိက်လဝ်ရ။

ပ္ဍဲကဵုတၚ်လလောၚ်တြး ဌာနဝန်ဇၞော် ကာဍုၚ်သ္အာၚ်ဍုၚ်ဂျပါန် မဒှ်ဥက္ကဌ ဂကောံ G7 ဂှ် ဍုၚ်မလုပ်ဂကောံဂမၠိုၚ်ဝွံ ဒဒှ်ရစၟဳလဝ် နကဵုကြုက် သွက်ဂွံကဵုဇြဟတ်ဂရိုဟ် ကုရုယှာ ညံၚ်ဒပ်ရုယှာတံ ဂွံတိတ်အာ နူကဵုယူကရုၚ်လွာဲဂှ်ဒတုဲဂှ် ဟီုဂးကၠုၚ်လဝ်ရ။

တၚ်လလောၚ်တြးဏံဂှ်ဝွံ ကြဴနူကလုတ်တမာန်ဍုၚ်ကြုက် ဝါန်ယဳ အာစိုပ်ဂေတ်ဝေၚ် ဍုၚ်ရုယှာ ပွိုၚ် (၄) တ္ၚဲတုဲ အခိၚ်သမ္မတဗလာဒဳမာပူတေန် ကၠုၚ်စိုပ်ကြုက် ဒှ်မာန်ဂၠိုၚ်ဒၟံၚ်ဂှ် မံက်တိတ်ကၠုၚ်လဝ်ရ။

ကောန်ဂကောံ G7 ဂမၠိုၚ်ဝွံ ပ္ဍဲကဵုကောံဓရီုမကၠောန်ဗဒှ်လဝ် ပ္ဍဲကဵုဂျေဝ်ဒါတ် နူကဵုယူကရုၚ် မသ္ကိုပ်သ္ကဂှ် ဒုၚ်လဝ်တၠုၚ် ကုပရေၚ်ပါလုပ်ဍုၚ်ကြုက်ဂှ်တုဲ သွက်ဂွံကလိဂွံ ပရေၚ်ၜိုဟ်လလမ် မတန်တဴအာအဓာန်ဇမၠိၚ်မာန်တုဲ ဗဗွဲဓဝ်တံဂှ်ကီု သီုကဵုပရေၚ်ဆဵုဂဗသဳကၠဳတိုက်ရိုက် ကုယူကရုၚ်တံဂှ် ညံၚ်ဂွံထပ်ကဵုဇြဟတ်ထံက်ဂလာန် ကုဍုၚ်ကြုက်ဂှ် ဟီုဂးလဝ် ပ္ဍဲကဵုတၚ်လလောၚ်တြးဂှ်ရ။

နကဵုပူတေန် ပ္ဍဲကဵုသတ္တာဟတုဲကၠုၚ်တေံ ဆဵုဂဗလဝ်ကဵု က္ဍိုပ်သ္ကိုပ်ကိုဝ်ရဳယျာသၟဝ်ကျာ ကေန်ဂျုၚ်အောန် ပ္ဍဲမဝ်သကိုဝ်တုဲ နကဵုပရေၚ်ပၞာန် ပရေၚ်ဆက်ဆောံကြပ်ပ်တံ နွံကၠုၚ်လဝ်တုဲ လၟေၚ်ဒဒှ်ဏံဝွံ သ္ကဵုအမေရိကာန် ကေုာံ မဟာမိတ်ဍုၚ်ပလိုတ်တၞဟ်ဟ်တံ ဂွိၚ်ဂွါဲဖေက်လကိုတ်တဴအိုတ်ရ။

လ္တူတၚ်ခယျ ဒဒှ်ရကိုဝ်ရဳယျာသၟဝ်ကျာ ထံက်ပၚ်ကဵုလဝ်လွဟ်လက်နက် ကုဍုၚ်ရုယှာ မသုၚ်စောဲလဝ်လွဟ်လက်နက် ဗွဲမဂၠိုၚ်ဂၠေၚ် အပ္ဍဲပေါဲပၞာန်ယူကရုၚ် ပွိုၚ် (၁၈) ဂိတုပြၚ်ဏံဂှ် ပျုၚ်ယာန် ကေုာံ မဝ်သကိုဝ်တံ ကယျာန်ပါဲလဝ်ရ။

Ref: CNA