ပ္ဍဲကဵုစရၚ်ကောန်ဗော်ပရေၚ်ဍုၚ်ကွာန်ပန်ဗော် ပါလုပ်သီုဗော်ပျဳခိုၚ်ဖျိုဝ် ညးယိုက်ဝန်တအ်ပါလုပ်ဒၟံၚ်

နေပျဳဒဝ်၊ သေပ်တေမ်ဗာ(၂၁)

ပၞောဝ်ကဵုဗော်ပရေၚ်ဍုၚ်ကွာန် မၞုံတန်တဴဒၟံၚ်တအ်ဂှ် ပ္ဍဲစရၚ်ကောန်ဗော်ပျဳခိုၚ်ဖျိုဝ်၊ ဗော်တစည၊ ဗော်ဒဳမဝ်ကရေတ်တေတ်ကောန်ဂကူ ကေုာံဗော်ဖေတ်ဒရေဝ်ဒဳမဝ်ကရေတ်တေတ်ကောန်ဂကူတအ်ဂှ် ညးယိုက်ဝန်တအ် ပါလုပ်ဒၟံၚ်ရဂှ် ကဝ်မယှေန်ပေါဲရုဲမာဲကၟိန်ဍုၚ် (UEC) ကံၚ်ဇြဳပၞာန်ခါန်ကၞက် ဟီုလဝ်ရ။

စရၚ်ကောန်ဗော်မပိုၚ်ခြာလဝ် ဗော်ဂမၠိုၚ်ပလံၚ်ဗစိုပ်နၚ်တအ်ဂှ် ပံၚ်တောဲကဵုအုပ်ဓုပ်၊ လဝက ကေုာံ ဂကောံကဝ်မယှေန်ပေါဲရုဲမာဲပွိုၚ်ဍုၚ် မၞုံပွိုၚ်ဍုၚ်မဆေၚ်စပ်တအ်တုဲ သွက်ဂွံပံၚ်တောဲရေၚ်တၠုၚ်အာ လၟေၚ်ကမၠောန်စၟဳစၟတ်ဂှ် ကၠောန်ဗဒှ်လဝ်ကောံဓရီု ပ္ဍဲဗဂေါ ကေုာံအၚ်ဝ ပ္ဍဲဂိတုသေပ်တေမ်ဗာ စၟတ်တ္ၚဲ(၁၈)ဂှ်ရ။

ကောံဓရီုဂှ် ဥက္ကဋ္ဌဗော်ပျဳထောၚ်သုကျခိုၚ်ယျေနှေအ်ဖောအ်ဖျုဝ်ယျေ၊ ဗော်တိုၚ်ယျေန်တာဇြဳလုမ်ညဳညောတ်ယျေ၊ ဗော်ဒဳမဝ်ကရေတ်တေတ်ပရေၚ်ဍုၚ်ကွာန်ကောန်ဂကူ ကေုာံဗော်ဖေတ်ဒရေဝ်ဒဳမဝ်ကရေတ်တေတ်တအ်ကီု သီုညးတာလျိုၚ်မဆေၚ်စပ်တအ် တိုန်စိုပ်လဝ်ရ။

နူကဵုဗော်တိုန်စိုပ် ပန်ဗော်တအ်ဂှ် ပ္ဍဲကဵုစရၚ်ကောန်ဗော်ပလံၚ်ဗစိုပ်လဝ် ပ္ဍဲကာလအပိုၚ်ခြာဂှ် ညးစရၚ်ဒၟံၚ်တန်တဴ ဟွံညဳသၟဟ်ကဵုသၞောဝ်ဥပဒေတအ်၊ ညးတၞးကာဒ်ကောန်ဍုၚ်ကဵု ယၟုဟွံတုပ်သၟဟ်တအ်၊ စၟတ်သမ္တီတၞးကာဒ်တုပ်ဒၟံၚ်တအ် မပ္တံသာ်ဏံ ကောန်ဗော်ဟွံကိတ်ညဳကဵုအရာပိုၚ်ခြာလဝ် ပါလုပ်ဒၟံၚ်ရဂှ် ဟီုသ္ဂးလဝ်ရ။

သ္အာၚ်နူဂှ်ပၠန် ပ္ဍဲစရၚ်ကောန်ဗော်တအ်ဂှ် ညးယိုက်ဝန်တအ် ပါလုပ်ဒၟံၚ်တုဲ ကောန်ဗော်ဌာန်ဒၟံၚ်ဟွံဍိုက်ပေၚ်တအ် ပါလုပ်ဒၟံၚ်ဂှ်လေဝ် ဂွံဆဵုညာတ်ကေတ်လဝ်ရဂှ် ဥူသိုဝ်ဥူကဵု ဥူတာန်အောၚ်ကျဝ် ညးလုပ်ဂကောံ UEC ကံၚ်ဇြဳပၞာန်တအ် ဟီုလဝ် ပ္ဍဲကောံဓရီု ကၠောန်ဗဒှ်လဝ် ပ္ဍဲဗဂေါကဵုအၚ်ဝဂှ်ရ။

အတိုၚ်သၞောဝ်ဥပဒေပ္တိုန်စရၚ်ဗော်ပရေၚ်ဍုၚ်ကွာန် ဂဂွံကဵုၝောံပိုဒ် ၁၀ ဂှ်မ္ဂး ကောန်ဗော်တအ် ဒးဒှ်ကောန်ဍုၚ်၊ ကောန်ဍုၚ်ကၟုဲ ကေုာံ ဒးဒှ်ညးမသ္ပကဵုလဝ်အခေါၚ်ကောန်ဍုၚ်တုဲ ဒးဒှ်ညးယိုက်ဝန်ကၟိန်ဍုၚ်ဟွံသေၚ် ပျးဌာန်လဝ်သာ်ဏံ နကဵုတၚ် ၁၀ တၚ်ရ။

ညးဟွံကိတ်ညဳကဵု တၚ်ပ္ဍဲၝောံပိုဒ် ၁၀ တၚ်ဂှ် မွဲမွဲသာ်မ္ဂး ဟွံပါဲပ္တိတ် နူဒဒှ်ကောန်ဗော်တုဲ သီုတီဒၟံၚ်ယဝ်စွံလဝ်အတိုၚ်ဂှ်မ္ဂး အခေါၚ်ဂွံဆက်ဒတူလာၚ်အာ နဒဒှ်ဗော်ပရေၚ်ဍုၚ်ကွာန် ဟွံဂွံမွဲရဂှ် ဓမံက်လဝ် ပ္ဍဲၝောံပိုဒ် ၁၂ ရ။

ပၞောဝ်ကဵုဗော်ပန်ဗော်ဏံ ဗော်ပျဳခိုၚ်ဖျိုဝ်ဂှ် ဒှ်ဗော်ပတိုန်လဝ်စၟတ်သမ္တီ ဇရေၚ် UEC အလန်ကိုပ်ကၠာအိုတ်မွဲဗော်ဒှ်တုဲ ပၞောဝ်ကဵုဗော်ပရေၚ်ဍုၚ်ကွာန် က္လိဂွံလဝ်အခေါၚ်စၟတ်သမ္တီ ၃၇ ဗော်တအ်ဂှ် ဒှ်ဗော်က္လိဂွံလဝ်စၟတ်သမ္တီ လၟေၚ် (၁) ရ။

မွဲလ္ပာ်ပၠန်ဂှ် က္ဍိုပ်သ္ကိုပ်ပၞာန် ဂအုပ်သ္ကိုပ်ဗိုလ်ဇၞော်မေန်အံၚ်လှာၚ် တၠအဝဵုပၞာန် ခေတ်တၟိ ထံက်ရီုကဵုလဝ်လကြဴတုဲ သၞာဲဒဴပၞာန်တြေံတအ် အုပ်ဓလီုဒၟံၚ်မွဲဗော်လေဝ် ဒှ်ရ။

ဗော်တိုၚ်ယျေန်တာဇြဳလုမ်ညဳညောတ်ယျေ ပြာကတ်ဒၟံၚ် ရဴဝွံမ္ဂး ဗော်တစညဂှ်မ္ဂး ကၠာနူပၠန်ဂတးညးဍုၚ်ကွာန် ဟွံဂွံက္တဵုဒှ်ဏီတေံ အခိၚ်ကာလဒ္ဂေတ်ဗက်ဒၟံၚ် သၞောတ်တၠအဝဵုမွဲဗော်တေံဂှ် နူကဵုဗော်မျာန်မဇြောယှေဝ်လေတ်လာမ်ဇြေန်ဂှ် ပြံၚ်သၠာဲလဝ်ယၟု ပ္ဍဲဂိတုသေပ်တေမ်ဗာ သၞာံ ၁၉၈၈ တေံရ။

ဗော်ဖေတ်ဒရေဝ်ဒဳမဝ်ကရေတ်တေတ်ဂှ်မ္ဂး ဗော်ဒဳမဝ်ကရေတ်တေတ်(မျာန်မာ) ကၠာတေံဂှ် ပြံၚ်သၠာဲလဝ်ယၟုတုဲ ပတိုန်လဝ်စရၚ် အခေါၚ်ဒက်ပ္တန်ဗော် ကေုာံအခေါၚ်စၟတ်သမ္တီ နဒဒှ်ဗော်တၟိရ။

သ္အာၚ်နူဂှ် ဗော်ဒဳမဝ်ကရေတ်တေတ်ပရေၚ်ဍုၚ်ကွာန်ကောန်ဂကူလေဝ် ဒှ်ဗော်ပရေၚ်ဍုၚ်ကွာန် ချဳဒရာၚ်ကတိုၚ်ကၟဟ် ပ္ဍဲပရေၚ်မၚ်မွဲရံၚ်စံၚ် ဂကူဘာသာသာသနာမွဲဗော်ရ။

UEC ကံၚ်ဇြဳပၞာန်ဂှ်မ္ဂး စရၚ်ကောန်ဗော် ဗော်ပရေၚ်ဍုၚ်ကွာန်တအ် ပ္တိုန်ထ္ၜးနၚ်တအ်ဂှ် ပရေၚ်ဒဒှ်ဍာံနွံ ဟၟဲ ပ္ဍဲဗလးမုက်တိ ဒၟံၚ်တန်တဴဒၟံၚ် နွံဟၟဲဂှ် ပံၚ်တောဲကဵု အုပ်ဓုပ်၊ လဝက ကေုာံ ဂကောံလ္ပာ်ကဝ်မယှေန်ရုဲမာဲပွိုၚ်ဍုၚ် ပ္ဍဲပွိုၚ်ဍုၚ်မဆေၚ်စပ်တအ်တုဲ စၟဳစၟတ်အာ ပ္ဍဲကာလအပိုၚ်ခြာရောၚ်ဂှ် ဟီုသ္ဂးလဝ်ရ။

ပရိုၚ် – သြၚ်လောန်တိုၚ်(မ်)

ဗီရုပ် – Twitter